Ovina Viatete wa Lilongisa Vembimbiliya vi Pondola Oku ku Kuatisa Cilo

1. Ovina viatete tua lilongisa Vembimbiliya via pongolola ndati ekalo liomuenyo wetu?

OVINA viatete tua lilongisa eci tua fetika oku lilongisa Embimbiliya, via pongolola ekalo liomuenyo wetu. Ndeci, eci tua lilongisa okuti onduko ya Suku Yehova, ca tu kuatisa oku pamisa ukamba wetu laye. (Isa. 42:8) Noke lioku lilongisa eci ci pondola oku lipita lomanu vana va fa, tua liwekapo oku lipula nda vangandietu vana va fa va kasi oku tala ohali. (Uku. 9:10) Handi vali, eci tua lilongisa okuti ongongo yi ka linga ocumbo celau, tua liwekapo oku sakalala lekalo lietu lio kovaso yoloneke. Tua kuata ekolelo liokuti ka tu ka kala lika komuenyo ci soka 70 ale 80 kanyamo, pole, tu ka kala otembo ka yi pui.—Osa. 37:29; 90:10.

2. Momo lie tu popela okuti ndaño muẽle Akristão va pama konepa yespiritu, va pondola oku kuatisiwa lovina viatete va lilongisa Vembimbiliya? (2 Petulu 1:​12, 13)

² Lalimue eteke ka tu ka ivaliko esilivilo liovina viatete tua lilongisa Vembimbiliya. Upostolo Petulu wa sonehela ukanda waye wavali Kakristão va ‘sevetiwile vocili’ ale, vana va pamele konepa yespiritu. (Tanga 2 Petulu 1:​12, 13.) Pole, kotembo yaco alongisi vesanda kuenda omanu olondingaĩvi, va kala oku seteka oku va yapuisa oco va siepo efendelo liocili. (2 Pet. 2:​1-3) Petulu wa yonguile oku pamisa vamanji vaco oco va tẽle oku pandikisa koseteko yaco. Omo liaco, eye wa va ivaluisa ovina ovo va lilongisile ale. Alongiso aco a laikele oku va kuatisa oku amamako oku kolela Yehova toke kesulilo.

3. Momo lie Akristão vosi va sukilila oku sokolola catiamẽla kovina viatete va lilongisa Vembimbiliya? Tukula ocindekaise cimue.

³ Ndaño okuti tu kasi ale oku vumba Yehova vokuenda kuanyamo alua, handi tu pondola oku lilongisila kovina viatete tua lilongisa Vembimbiliya. Sokolola kocindekaise ci kuãimo: Omunu umue wa loñoloha koku teleka lomunu umue o kasi oku lilongisa oku teleka, pamue va talavaya lolonenga vimuamue poku pongiya okulia kumue. Pole, otembo kuenda uloño omunu wa loñoloha a kuete koku teleka, vi u kuatisa oku talavaya lolonenga viaco volonjila viokaliye haivio via litepa. Cimuamue haico okuti, ci kaile vana va kasi ale oku vumba Yehova tunde osimbu ale vana va fetika ndopo, va kũlĩha ovina viatete va lilongisa Vembimbiliya. Pole, ovo pamue, va tenda alongiso aco volonjila via litepa. Citava okuti tunde eci tua papatisiwa, tua lipita ale lapongoloko komuenyo wetu kuenda kovikele vietu kupange wa Yehova. Pole, oku sokolola kovina tua lilongisa kosimbu, ci tu kuatisa oku sanga olonjila viokaliye tu pondola oku kapako alongiso aco kekalo tu sangiwa. Omo liaco, tu konomuisa ovina vitatu viatete tua lilongisa Vembimbiliya kuenda ovina Akristão va pama konepa yespiritu va pondola oku lilongisilako.

YEHOVA EYE ULULIKI

4. Oku kũlĩha okuti Yehova eye Ululiki ca tu kuatisa ndati?

⁴ Tua kũlĩha okuti ongongo lovina viosi vi kasimo, via pangiwa Lululiki umue ukualondunge haeye ukuonene. Embimbiliya li popia okuti: “Ululiki wovina viosi Suku.” (Va Hev. 3:4) Pole, tu pondola oku lilongisa ovina vialua vikuavo kocili eci ca leluka. Yehova poku tu lulika, wa situlula ciwa okuti wa kũlĩha ovina viosi viatiamẽla kokuetu, wa tu kapako kuenda wa kũlĩha ovina viwa tu sukila. Omo liaco, oku kũlĩha okuti Yehova eye Ululiki, ca pongolola ekalo liomuenyo wetu kuenda ca tu ĩhavo ocimãho komuenyo.

5. Ocili cipi Cembimbiliya ci tu kuatisa oku kala ambombe? (Isaya 45:​9-12)

⁵ Oku kũlĩha okuti Yehova eye ululiki, ci tu kuatisavo oku kala ambombe. Ndeci, vokuenda kuotembo yimue, Yovi wa tiamisilile calua utima kokuaye muẽle kuenda komanu vakuavo. Pole, Yovi wa ivaluisiwa okuti, Yehova Eye Ululiki ukuonene. (Yovi 38:​1-4) Eci ca kuatisa Yovi oku kuata elomboloko liokuti, Yehova olonjanja viosi o linga eci ca sunguluka. Uprofeto Isaya poku lombolola okuti omanu ka va pondola oku lisokisa la Suku, wa soneha hati: “Anga hẽ otuma yi pondola oku popia Kukuakutalavaya Lotuma hati: ‘Nye ove o kasi oku linga?’”—Tanga Isaya 45:​9-12.

6. Vepuluvi lipi ci kuete esilivilo oku sokolola kolondunge kuenda kunene Wululiki wetu? (Talavo oviluvialuvia.)

⁶ Ukristão umue o kasi ale oku vumba Yehova vokuenda kuanyamo alua, pamue o fetika oku kolela calua konjila yaye yoku sokolola, okuti ka sandi vali olonumbi via Yehova vi sangiwa Vembimbiliya. (Yovi 37:​23, 24) Nda eci oco ca lipita, ciwa Ukristão waco oku sokolola lutate kolondunge kuenda kunene Wululiki, okuti ka u sokisiwa. (Isa. 40:22; 55:​8, 9) Oku kũlĩha ocili caco, ci ko kuatisa oku amamako oku lekisa umbombe kuenda oku kuata elomboloko liokuti ovisimĩlo via Yehova via velapo okuti viaye muẽle vi sule.

7. Nye ca kuatisa manji Rahela oku tava konumbi yimue yokaliye?

⁷ Oku ivaluka okuti Yehova eye ululiki, ca kuatisa manji Rahela wo ko Eslovenia oku tava konumbi yimue yokaliye yocisoko. Eye wa lombolola ndoco: “Olonjanja vimue ka ca lelukile kokuange oku tava kolonjila vimue vi nõliwapo la vana va kuete ocikele coku songola. Ndeci, nda tala Ulandu #8 Wosungu Yolombangi Via Yehova wo 2023. Pole, eci nda mola manji umue lolonjele onjanja yatete oku linga ohundo, sia liyevele ciwa. Omo liaco, nda likutilila ku Yehova loku u pinga oco a ñuatise oku tava kapongoloko aco.” Manji Rahela wa kuata elomboloko liokuti, Yehova omo eye Ululiki wovailu kuenda Wongongo, o pondola oku songuila lonjila ya lipua ocisoko caye. Anga hẽ olonjanja vimue ca tĩlavo kokuove oku tava kelomboloko limue ale konumbi yimue yokaliye? Nda oco, ocina ca velapo o sukila oku linga, oku lekisa umbombe kuenda oku sokiya otembo yimue yoku sokolola kolondunge kuenda kunene wa Yehova.—Va Rom. 11:​33-36.

SUKU HAYEKO WA SIATA OKU KOKA OHALI

8. Oku lilongisa okuti Suku hayeko wa siata oku koka ohali ca ku kuatisa ndati?

⁸ Momo lie Suku a kasilili oku ecelela ohali? Omo okuti omanu valua ka va kũlĩhĩle etambululo liaco, va kuatela onyeño Suku ale va sima okuti ka kuli Suku! (Olosap. 19:3) Pole, ove wa lilongisa okuti, ekandu tua piñala kuenda ekambo lioku lipua, ovio via siata oku kokela ohali omanu, Yehova hayeko. Handi vali, ove wa lilongisavo okuti epandi Yehova a tu kuetele, lia siata oku ecelela okuti olohuluwa vialua viomanu vi u kũlĩha kuenda oku limbuka ndomo eye a ka malako ohali otembo ka yi pui. (2 Pet. 3:​9, 15) Kuenje oku kũlĩha ocili caco ca ku lembeleka calua kuenda ca pamisa ukamba wove la Yehova.

9. Kapuluvi api ci kuetele esilivilo oku ivaluka esunga lieci Yehova a kasilili oku ecelela ohali?

⁹ Tua kũlĩha okuti tu sukila oku kala vakuepandi osimbu tu talamẽla otembo Yehova a ka malako ohali yosi. Pole, eci etu ale omunu umue tu sole a liyaka lovitangi, ekambo liesunga ale oku fisa, tu pondola oku sima okuti Yehova o kasi oku cilua calua oco a maleko ohali. (Hav. 1:​2, 3) Kovitangi ndevi, ci kuete esilivilo oku ivaluka esunga lieci Yehova a kasilili oku ecelela okuti, omanu vawa va liyaka lovitangi.a (Osa. 34:19) Handi vali, tu pondolavo oku sokolola kocipango ca Yehova coku ka malako ohali yosi otembo ka yi pui.

10. Nye ca siata oku kuatisa manji Anne oku liyaka lesumuo lioku fisa ina yaye?

¹⁰ Oku kũlĩha esunga lieci Yehova a kasilili oku ecelela ohali, ci tu kuatisa oku pandikisa kovitangi. Manji Anne wo kocifuka co Mayotte kokalunga ko Indiku, wa lombolola ndoco: “Kanyamo a pita, nda fisa ina yange kuenje ocitangi caco ca ndi sumuisa calua. Pole, olonjanja viosi ndi likolisilako oku ivaluka okuti Yehova hayeko wa siata oku koka ohali. Handi vali, Eye o yongola calua oku ka malako ovina viosi vi tu kokela ohali kuenda oku pindula vangandietu va fa. Oku sokolola kovina viaco, ci ndi kuatisa oku kuata ombembua yo vutima, ndaño lesumuo lioku fisa ina yange.”

11. Oku kũlĩha esunga lieci Yehova a kasilili oku ecelela ohali, ci tu kuatisa ndati oku amamako oku kunda?

¹¹ Oku kũlĩha esunga lieci Yehova a kasilili oku lekisa epandi kuenda oku ecelela ohali, ci pondola oku tu vetiya oku amamako oku kunda. Upostolo Petulu noke lioku lombolola okuti epandi lia Yehova li lomboloka epopelo komanu vana va likekembela, wa soneha ndoco: “Kũlĩhĩsi ovituwa vu sukila oku lekisa kuenda eci vu sukila oku linga. Vu sukila oku kola loku lekisa ovilinga vioku sumbila Suku.” (2 Pet. 3:11) Vimue pokati ‘kovilinga vietu vioku sumbila Suku,’ oku kunda olondaka viwa. Ndeci Yehova, etu tu sole omanu kuenda tu yongola okuti va kala otembo ka yi pui voluali luokaliye. Yehova o kasi oku amamako oku eca komanu vo vocikanjo cove, epuluvi lioku u fendela. Omo liaco, ove o kuete esumũlũho lioku talavaya kumue la Suku kuenda oku kuatisa etendelo lialua liomanu oku lilongisa catiamẽla kokuaye, osimbu esulilo ka lieyile!—1 Va Kor. 3:9.

TU KASI “KOLONEKE VIA SULAKO”

12. Oku kuata elomboloko liokuti tu kasi “koloneke via sulako” ci tu kuatisa ndati?

¹² Embimbiliya li lombolola ciwa ndomo omanu va laikele oku kala “koloneke via sulako.” (2 Tim. 3:​1-5) Poku mola ndomo ovituwa vĩvi via siata oku livokiya pokati komanu va tu ñuala, tu limbuka okuti ovina Embimbiliya li popia viocili. Oku kuata elomboloko liocili caco, ci vokiya ekolelo lietu Kondaka ya Suku.—2 Tim. 3:​13-15.

13. Poku sokolola kolusapo lua Yesu lu sangiwa kelivulu lia Luka 12:​15-21, apulilo api tu sukila oku linga?

¹³ Oku kũlĩha okuti tu kasi koloneke via sulako, ci vokiya kokuetu ocituwa coku lekisa onjanga. Limbuka eci tu pondola oku lilongisila kocituwa coku lekisa onjanga, kolusapo Yesu a ta lu sangiwa kelivulu lia Luka 12:​15-21. (Tanga.) Momo lie ulume ohuasi a tukuiwila okuti ‘eveke?’ Hamomoko eye a kuatele ovokuasi alua, pole, momo lioku pitisa kovaso ovina ka via sungulukile komuenyo. Ulume waco, wa li ‘solekelele ovokuasi alua, pole, ka kaile ohuasi kovaso a Suku.’ Poku talavaya lotembo yaye lonjila yimue ka ya sungulukile ca kala uveke, momo eye ka kuatele otembo yalua komuenyo. Kuenje Suku wo sapuila hati: “Uteke ulo va ku upa omuenyo wove.” Olusapo olu lu tu longisa nye? Otembo ya tu supilako oco oluali lulo lu sulile, yitito calua. Omo liaco, tu sukila oku lipula ndoco: ‘Anga hẽ ovimãho viange vi situlula okuti ñuete ocituwa coku lekisa onjanga? Nda siata oku vetiya omãla vange oku kuata ovimãho vipi? Anga hẽ ndi talavaya lotembo yange, ongusu, ovina ndi kuete oco ndi li solekele ame muẽle ovokuasi, ale nda siata oku li solekela ovokuasi kilu?’

14. Ndomo ca lekisiwa kulandu wa manji Miki, momo lie ci kuetele esilivilo oku sokolola kovovangi okuti tu kasi koloneke via sulako?

¹⁴ Eci tu sokolola kovovangi a lekisa okuti tu kasi koloneke via sulako, ci tu kuatisa oku pongolola ekalo liomuenyo wetu. Eci oco ca lipita la manji umue ukãi o tukuiwa Miki. Eye wa popia ndoco: “Eci nda malusula osikola, nda yonguile calua oku kala ukuakukonomuisa omuenyo wovinyama, loku ci linga vokuenda kuomuenyo wange wosi. Handi vali, nda yonguilevo oku kala ukundi wotembo yosi kuenda oku ka talavaya kocikanjo kuli esukila. Pole, vamanji vamue vo vekongelo liange va ndi vetiya oku sokolola lutate nda nda ponduile muẽle oku ka tẽlisa ovimãho viaco vivali. Ovo va ndi ivaluisavo okuti, esulilo lioluali lulo li kasi ocipepi kuenda voluali luokaliye nda laikele oku lilongisa catiamẽla kovinyama viosi otembo ka yi pui. Omo liaco, nda nõlapo oku lilongisa ovoloño ana okuti ka a ponduile oku nyana otembo yange. Lonjila eyi nda tẽla oku amamako kupange wakundi votembo yosi kuenda noke nda ilukila kocikanjo kuli esukila ko Equador.” Cilo manji Miki kumue lulume waye, va kasi kupange woku nyula akongelo kofeka yaco.

15. Ulandu wa Tiago u lekisa ndati okuti ka tu sukila oku liwekapo oku kuatisa omanu? (Talavo oviluvialuvia.)

¹⁵ Ka tu sukila oku sumua nda okuti kefetikilo omanu ka va tava kolondaka viwa. Omanu va pondola oku pongoloka. Kũlĩhĩsa ulandu wa Tiago manji a Yesu. Eye wa mola Yesu oku kula, oku kala Mesiya loku kala ulongisi umue ka sokisiwa. Pole, Tiago vokuenda kuanyamo alua, ka lingile ondonge ya Yesu. Eye wa linga lika ondonge eci Yesu a pinduiwa kuenda weya oku kuata ombili yalua!b (Yoa. 7:5; Va Gal. 2:9) Omo liaco, ku ka liwekepo oku kuatisa vakuepata liove kuenda omanu vana vocikanjo okuti, handi ka va tavele kocili. Ivaluka okuti tu kasi koloneke via sulako kuenda upange wetu woku kunda wonjanga. Citava okuti va ka tava lika kovina o va kundila eci ohali yapiãla yi ka fetika.c

AMAMAKO OKU KAPAKO ALONGISO A YEHOVA

16. O kuatisiwa ndati lalongiso a Yehova a sangiwa Vembimbiliya? (Talavo okakasia losapi hati, “Talavaya Lalongiso Embimbiliya Oco o Kuatise Omanu Vakuavo.”)

¹⁶ Alongiso amue Embimbiliya a siata oku sandekiwa vocisoko cetu, a tiamisiwila komanu vana okuti ka va kũlĩhĩle ovina vialua viatiamẽla Kembimbiliya. Ndeci, ohundo yowiñi ya siata oku lingiwa osemana losemana, ovipama vimue, lolovideo vi sangiwa vo jw.org kuenda Utala Wondavululi wowiñi, via pongiyiwila vali enene omanu vana okuti Halombangiko Via Yehova. Pole, alongiso aco a pondolavo oku tu kuatisa oku vokiya ocisola tu kuetele Yehova, oku pamisa ekolelo lietu Kembimbiliya kuenda oku tu kuatisa oku kala alongisi vawa.—Osa. 19:7.

17. Kolonepa vipi ci kuetele esilivilo oku sokolola kalongiso Embimbiliya?

¹⁷ Etu Tulombangi Via Yehova, tu yeva esanju lialua eci tu kuata elomboloko liokaliye liatiamẽla kocili cimue Cembimbiliya. Pole, tu pandulavo omo liovina viatete tua lilongisa Vembimbiliya okuti, via tu kuatisa oku kala akamba va Yehova. Nda tu kuete ocituwa coku kakatela kovisimĩlo vietu muẽle okuti ka tu kuama olonumbi vi eciwa vocisoko ca Yehova, tu sukila oku kala ambombe loku ivaluka okuti ululiki wetu ukualondunge haeye ukuonene wosi, eye o kasi oku songuila ocisoko caye. Nda etu ale omunu umue tu sole o kasi oku liyaka locitangi cimue, tu sukila oku kala vakuepandi kuenda oku sokolola kesunga lieci Yehova a kasilili oku ecelela ohali. Poku nõla ndomo tu talavaya lovina tu kuete kuenda otembo yetu, tu sukila oku ivaluka okuti tu kasi koloneke via sulako kuenda ka tu kuete otembo yalua komuenyo. Omo liaco, tu amamiko oku ecelela okuti alongiso, a Yehova a tu pamisa loku tu vetiya oku kala omanu vakualondunge.