Apulilo a Lingiwa la Vakuakutanga
“Ocisimĩlo” cipi Yehova a ka kapa vovitima violombiali, kovaso yoloneke?
Elivulu Liesituluilo 17:16, 17, poku vangula catiamẽla kefetikilo liohali ya piãla li popia ndoco: “Olombinga ekũi wa mola kuenda ocinyama ca tema ci kusuka nge, vi ka suvuka ocipuepue loku ci kokela ekundu kuenda oku ci sia epõlõla kuenje ovio vi ka lia ositu yaco loku ci yoka elisi vondalu. Momo Suku wa kapa vovitima viavo oku tẽlisa ocisimĩlo caye, ocili, oku tẽlisa ocisimĩlo cavo cimuamue poku eca usoma wavo kocinyama ca tema ci kusuka nge.” Kosimbu, alivulu etu a enda oku lombolola okuti, “ocisimĩlo” caco Yehova a ka kapa vovitima violombiali, ocisimĩlo coku kundula atavo osi esanda.
Pole, tua sukilile oku linga epongoloko limue kelomboloko tua kuatele. “Ocisimĩlo” Yehova a ka kapa vutima wolombiali, ocisimĩlo coku eca “usoma wavo kocinyama ca tema ci kusuka nge.” Oco tu kuate elomboloko konjila ndomo ocitumasuku caco ci ka tẽlisiwa, tu tambululi apulilo amue.
Velie va tukuiwa vocitumasuku caco? “Ocipuepue” okuti ci tukuiwa o “Bavulono Yinene,” ci lomboloka atavo osi esanda. “Ocinyama ca tema ci kusuka nge,” ci lomboloka Olonações Unidas. Oco ca sovuiwa kunyamo wo 1919, locimãho coku nena ombembua voluali luosi kuenda kosimbu ca tukuiwile okuti, o Liga das Nações. (Esit. 17:3-5) “Olombinga ekũi,” vi lomboloka olombiali viosi vi kuatisa ocinyama ca tema.
Elitokeko lipi li kasi pokati kocipuepue kuenda kuocinyama ca tema ci kusuka nge? Ocipuepue ca “tumãla” kilu liocinyama ca tema. Eci ci lomboloka okuti oco ci kuatisa ocinyama ca tema kuenda ci seteka oku ci songuila.
Nye ci ka li pita locipuepue? Ocinyama ca tema kuenda olombinga ekũi vi ka “suvuka ocipuepue” loku punda ovokuasi aye kuenda oku situlula evĩho liayo. Ovio vi ka kundula elisi ocipuepue caco ndomo Yehova a ci popele. (Esit. 17:1; 18:8) Kuenje ci ka kala esulilo liatavo osi esanda. Pole, osimbu ovina viaco ka via li pitile, Yehova o ka vetiya olombiali oku linga ocina cimue okuti ka ca la li pita tunde kefetikilo lioluali.
Yehova o ka vetiya olombiali oku linga nye? Yehova o ka koka okuti olombiali vi tẽlisa ‘ocisimĩlo caye,’ volondaka vikuavo, eye o ka koka okuti olombiali “vi eca unene kuenda omoko yavo kocinyama ca tema [ci kusuka nge]” okuti, Olonações Unidas. (Esit. 17:13) Sokolola kueci olondaka viaco vi lomboloka. Anga hẽ olombiali viomanu vi ka nõlapo ovo muẽle oku eca unene wavo kocinyama ca tema? Sio! Ocitumasuku ci lekisa okuti Yehova eye o ka va vetiya oku ci linga. (Olosap. 21:1; ci sokisa lelivulu lia Isaya 44:28) Anga hẽ epongoloko liaco li ka li pita kamue kamue? Sio! Olio li ka li pita vocipikipiki. Noke ocinyama ca tema ci ka talavaya lunene ca tambula, oco ci kundule elisi atavo osi esanda ndomo ci likuata locisimĩlo ca Yehova.
Oco hẽ nye tu pondola oku lavoka? Ka tu ka lavoki oku yeva asapulo a lekisa okuti, olombiali kamue kamue vi kasi oku eca ekuatiso Kolonações Unidas. Ovina tu pondola oku lavoka vievi viokuti, lonjila yimue yi komõhisa haiyo iya ocipikipiki, Yehova o ka koka okuti olombiali vi eca unene wavo kocinyama ca tema. Eci ovina viaco vi ka li pita, tu ka kũlĩha okuti ohali ya piãla yi laika oku fekika. Osimbu otembo yaco ka ya pitĩlile, “tu amamiko oku lavulula loku kuata uloño woku sokolola,” momo ndopo, tu ka mola apongoloko a keya ocipikipiki!—1 Va Tes. 5:6.