Kosungu Yolombangi Via Yehova Kua Vokiyiwa Vamanji Vavali

KETEKE 5 ya Mbalavipembe wo 2024, kohongele yunyamo kua lingiwa esapulo limue li likasi liokuti: Manji Jody Jedele kuenda Jacob Rumph va nõliwa oco va pange onepa Kosungu Yolombangi Via Yehova. Vamanji vaco va kasi ale oku vumba Yehova vokuenda kuanyamo alua.

Manji Jody Jedele wa citiwila kolupale luo Missouri, ko Estadus Unidus kuenda wa kulila vocili. Epata liaye lia kala ocipepi locikanjo cimue okuti kua kala lika Olombangi vimue Via Yehova. Kuenje eye wa kũlĩha vamanji valua va enda oku tunda kolonepa vikuavo viofeka oco va kundile olondaka viwa vocikanjo caco. Ocisola kuenda omunga ya kala pokati ka vamanji vaco vio vetiya calua. Eye wa papatisiwa eci handi a kala umalẽhe calua, keteke 15 ya Mbalavipembe yunyamo wo 1983. Manji Jedele wa solaile calua oku kunda kuenje noke lioku malusula osikola ya pita pokati, wa linga ukundi wotembo yosi kosãi Yenyenye Linene wo 1989.

Eci manji Jedele a kala umalẽhe, olonjali viaye via enda oku u wambata kumue la manjaye ukãi oco va ka nyule o Betele. Kuenje eci ca va vetiya oku tumbika ocimãho coku ka talavaya ko Betele okuti noke va tẽlisa ocimãho caco. Manji Jedele wa iñila ko Betele yo Wallkill kosãi Yenyenye Linene wo 1990. Eye tete wa talavaya Koseketa Yoku Yelisa noke Koseketa Yuhayele.

Kotembo yaco, oco akongelo kelimi lio Espanyole a fetika oku kula kuenda kua sukilile vamanji alume oco va kuatise akongelo aco. Kuenje manji Jedele wa tumiwa vekongelo limue kuenje wa fetika oku lilongisa elimi lio Espanyole. Noke liotembo yimue, eye wa kũlĩha manji umue ukãi ukundi wotembo yosi o tukuiwa Damaris. Vokuenda kuotembo ovo va likuela kuenda manji Damaris wa taviwa oco a talavayevo ko Betele.

Kunyamo wo 2005 va tunda ko Betele oco va ka tate olonjali viavo. Vokuenda kuotembo yaco ovo va kala oku talavaya kupange wakundi votembo yosi. Manji Jedele wa kala ulongisi Yosikola Yakundi Votembo Yosi. Eye wa tiamẽlelevo Kocimunga Coseketa Yoku Tetulula Ocitangi Coku Yuvula Oku Sakuiwa Losonde kuenda Kocimunga ca Vamanji va Songuila Upange Woku Tunga Olonjango Viusoma.

Kunyamo wo 2013 ohueli yaco ya lalekiwa vali ko Betele oco yi talavaye kupange woku tunga o Warwick. Oku upisa kotembo yaco ovo va talavaya ko Betele yo Patterson kuenda yo Wallkill. Manji Jedele wa talavaya ale Kocimunga Cupange Woku Tunga Olonjango Viusoma kuenda Koseketa Yoku Tetulula Ocitangi Coku Yuvula Oku Sakuiwa Losonde. Kosãi Yelombo 2023 wa nõliwa oco a talavaye Kocimunga Cupange. Poku ivaluka ovikele eye a kuata ale, wa popia hati: “Olonjanja vimue o pondola oku kuata usumba eci o tambula ocikele cokaliye. Pole kapuluvi aco, oco ove o sukila oku kolela vali calua ku Yehova, momo eye o pondola oku ku lingisa omunu eye a yongola.”

Manji Rumph wa citiwila kolupale luo Kalifornia, ko Estadus Unidus. Eci eye a kala omõla, ina yaye wa liwekelepo oku kunda loku enda enda kolohongele, pole, wa enda oku likolisilako oku u longisa ocili Cembimbiliya. Handi vali, anyamo osi manji Rumph wa enda oku nyula inakulu yaye una wa kala Ombangi yimue ya Yehova ukuekolelo. Eye wo kuatisa oku vokiya ombili yaye kocili kuenje eci a kuata 13 kanyamo wa pinga oco vo longise Embimbiliya. Keteke 27 Yosãi Yenyenye Linene wo 1992 eci handi a kala umalẽhe, manji Rumph wa papatisiwa. Noke ina yaye wa linga vali ukundi ukuambili kuenje isiaye, mukãi waye kuenda manjaye ulume va papatisiwa.

Manji Rumph eci handi a kala umalẽhe, wa limbuka esanju akundi votembo yosi va kuatele. Kuenje eci a malusula osikola ya pita pokati, wa litumbika kupange wakundi votembo yosi kosãi Yenyenye Linene wo 1995. Kunyamo 2000 eye wa ilukila ko Ekuador oco a ka kundile kocikanjo kuli esukila liakundi. Kofeka yaco, oko eye a kũlĩha manji Inga ukundi umue wotembo yosi wo ko Kanada kuenje vokuenda kuotembo ovo va likuela. Noke lioku kuela, va ilukila volupale lumue ko Ekuador mua kala lika ocimunga cimue citito cakundi. Cilo, volupale luaco muli ekongolo limue lakundi valua.

Vokuonda kuotembo, manji Rumph kumue lukãi waye va nõliwa oco va kale akundi va likasi, noke va iñila kupange woku nyula akongelo. Kunyamo wo 2011 va lalekiwa oco va pindisiwe kocisoko 132 yosikola yo Gileada. Noke yoku malusula osikola, ovo va tumiwa kolofeka via litepa kuenda va talavaya ko Betele, kupange wumisionaliu kuenda woku nyula akongelo. Manji Rumph wa kuatavo esumũlũho lioku kala ulongisi Kosikola Yakundi Vusoma.

Omo liefengi lio KOVID-19 manji Rumph kumue lukãi waye va tiukila ko Estadus Unidus. Ovo va lalekiwa oco va talavaye ko Betele yo Wallkill, kuna eye a tambula epindiso Koseketa Yupange. Vokuenda kuotembo, ovo va tumiwa vali ko Betele yo Ekuador, kuna eye a talavaya Kocimunga Cakulu vo Filiale. Kunyamo wo 2023 va tumiwa ko Warwick. Kosãi ya Susu Yunyamo wo 2024 manji Rumph wa nõliwa oco a kale oñuatisi Yocimunga Cupange. Manji Rumph poku ivaluka ovitumãlo eye a vumba, wa popia hati: “Eci ci lingisa okuti ocikele cimue ci kala ocina cimue ci likasi, hacitumãloko, pole, omanu vana vu kasi oku vumbila kumosi.”

Tua kapako calua upange walua vamanji vaco va linga kuenda tu ‘amamako oku sumbila alume va soka ndava.’—Va Fil. 2:29.