Yehova o Pondola Oku tu Kuatisa Oku Kuata ‘Esanju Liocili’

1-2. (a) Omanu valua koloneke vilo va siata oku liyeva ndati? (b) Nye tu konomuisa vocipama cilo?

KOLONEKE vilo, omanu valua va siata oku seteka oku kuama olonjila vialua via litepa oco va kuate esanju. Pole, ndaño lalikolisilo aco, ovo ka va kuete esanju liocili. Valua va siata oku yeva esumuo kuenda va sima okuti kokuavo, ovina lalimue eteke vi ka pongoloka. Afendeli vamue va Yehova va siatavo oku liyeva ndoco. Omo okuti tu kasi “koloneke via sulako,” pamue tu liyaka lovitangi “ka via lelukile” okuti, vi tu kokela asakalalo kuenda esumuo.—2 Tim. 3:1.

² Vocipama cilo, tu konomuisa ovina vi pondola oku tu kokela esumuo kuenda eci tu sukila oku linga oco tu tumbulule esanju lietu. Pole, tete tu limbuka Ono yesanju liocili.

ONO YESANJU LIOCILI

3. Ovina via lulikiwa vi tu longisa nye catiamẽla ku Yehova? (Talavo oviluvialuvia.)

³ Yehova o Suku yimue yesanju. Omo liaco, eye o yongola okuti tu kuatavo esanju. Eli olio esunga lieci eye a lulikila ovina vialua vi tu nenela esanju. Ndeci, tu pondola oku yeva esanju lialua eci tu mola eposo liongongo, avala a litepa, ovinyama oku papala kuenda tu sanjukavo eci tu lia okulia kumue tu sole calua. Ocili okuti, Suku o tu sole calua kuenda o yongola okuti tu kuata esanju komuenyo!

Omõla wonjamba: Oviluvialuvia © Romi Gamit/Shutterstock; Omãla volopiguin: Vladimir Seliverstov/500px via Getty Oviluvialuvia; Omãla volohombo: Rita Kochmarjova/stock.adobe.com; ovihondoloka vivali: georgeclerk/E+ via Getty Oviluvialuvia

4. (a) Ndaño okuti Yehova o lete ohali omanu va siata oku liyaka layo, momo lie eye a kasilili oku amamako lesanju? (b) Ombanjaile yipi Yehova a tu ĩha? (Osamo 16:11)

⁴ Ndaño okuti Yehova “Suku ukuesanju,” eye wa kũlĩha ciwa esumuo lietu kuenda ohali tua siata oku liyaka layo. (1 Tim. 1:11) Pole, eye ka ecelelele okuti ekalo liaco li tepulula esanju liaye. Yehova wa kũlĩha okuti, ohali ka yi kala otembo yalua kuenje eye wa sokiya ale otembo a ka malako ohali yosi. Yehova o kasi oku kevelela lepandi toke eci a ka malako esumuo kuenda ohali yosi otembo ka yi pui. Pole, osimbu otembo yaco ka ya pitĩlile, Yehova wa kapako ovitangi tua siata oku liyaka lavio kuenda o yongola oku tu kuatisa. Eye o ci linga ndati? Onjila yimue, poku tu ĩha ombanjaile yesanju. (Tanga Osamo 16:11.) Tu kũlĩhĩsi ndomo ombanjaile yaco ya kuatisa Yesu.

5-6. Momo lie Yesu a kuetele esanju?

⁵ Pokati komanu Yehova a lulika, Yesu eye wa velapo kesanju. Momo lie? Tu konomuisi asunga avali. (1) Yesu “esetahãlo lia Suku” kuenda o setukula ciwa ovituwa via Isiaye kolonepa viosi. (Kol 1:15; 1Ti 6:15) (2) Yesu o kasi otembo yalua la Isiaye, Ono yesanju.

⁶ Yesu olonjanja viosi o sanjukila oku linga ovina Isiaye o tuma oku linga. (Olosap. 8:​30, 31; Yoa. 8:29) Eli olio esunga lieci Yehova o sanjukilila.—Mat. 3:17

7. Tu pondola oku kuata ndati esanju liocili?

⁷ Etu tu pondolavo oku kuata esanju liocili nda tuamamako oku kala akamba va Yehova, Ono yesanju. Eci tu pita otembo yalua oku lilongisa catiamẽla ku Yehova kuenda oku u setukula, tu kuata esanju liocili. Tu ka kuatavo esanju eci tu linga ocipango ca Suku kuenda oku kũlĩha okuti tua taviwa laye.a (Osa. 33:12) Pole, nye ci popiwa nda okuti olonjanja vimue tu kuata esumuo ale esumuo liaco li amamako? Anga hẽ ci lomboloka okuti ka tu kasi oku taviwa la Suku? Sio, hacoko! Yehova wa kũlĩha okuti omo ka tua lipuile, olonjanja vimue tu tala ohali omo lievalo kuenda esumuo. (Osa. 103:14) Kaliye tu konomuisi ovina vi pondola oku tu kokela esumuo kuenda eci tu sukila oku linga oco tu tumbulule esanju lietu.

OVINA VI TU KOKELA ESUMUO KUENDA NDOMO TU TUMBULULA ESANJU

8. Nye ci pondola oku lipita letu eci tu liyaka lovitangi?

⁸ Catete: Ovitangi. Anga hẽ, o kasi oku liyaka lelambalalo, ocilunga cimue, ekambo liolombongo, uvei ale ovitangi vi tunda koku kuka? Ovitangi viaco vi pondola oku tu kokela esumuo, ca piãla enene nda ka tu kuete ndomo tu vi tetulula. Embimbiliya li popia okuti, “eci omunu a sumua, esumuo liaco liu honguisa.” (Olosap. 15:13) Ukulu umue wekongelo o tukuiwa Babis okuti, wa fisa manjaye kumue lolonjali viaye vokuenda kuanyamo akuãla, wa popia hati: “Nda liyeva ulika kuenda ca kala ndu okuti lomue wa ponduile oku ndi kuatisa. Olonjanja vimue nda enda oku livetela evelo momo, ndaño okuti nda yonguile oku kala otembo yalua lolonjali viange kuenda la manjange osimbu ka va file, sia ci tẽlele.” Eci ci lekisa okuti ovitangi viomuenyo vi pondola oku tu honguisa ci kaile ketimba kuenda kovisimĩlo.

9. Nye ci pondola oku tu kuatisa oku tumbulula esanju lietu? (Yeremiya 29:​4-7, 10)

⁹ Nye ci pondola oku tu kuatisa oku tumbulula esanju lietu? Tu pondola oku kuata esanju nda okuti tua liwekapo oku sakalala calua lovitangi vina ka tu tẽla oku vi tetulula. Oluali lua siata oku vetiya omanu oku kuata ocisimĩlo cokuti, tu kuata lika esanju nda tu kuete omuenyo umue uwa. Pole, eci haciliko. Ndeci, Yehova wa handelekele va Yudea vambatiwile kumandekua ko Bavulono, oco va sanjukile ekalo liomuenyo wavo kofeka yaco, ndaño okuti va kala ovingendeleyi. (Tanga Yeremiya 29:​4-7, 10.) Ulandu waco u tu longisa nye? Tu sukila oku sanjukila ovina viwa tu kuete kuenda oku eca olopandu omo liovina viaco. Tu ivaluki okuti Yehova lalimue eteke a ka tu yanduluka. Eye o kamamako oku tu kuatisa. (Osa. 63:7; 146:5) Manji umue ukãi o tukuiwa Effie okuti wa lipitile locilunga cimue co kokela ulema, wa popia hati: “Nda tambula ekuatiso lialua ku Yehova, kepata liange kuenda ku vamanji vekongelo. Ndi yongola oku lekisa kokuavo okuti nda sanjukila ovina va ndi lingila kuenda evi va siata oku ndi lingila toke cilo. Omo liaco, nda siata oku likolisilako oco ndi kuate esanju.”

10. Momo lie tu ponduila oku kuata esanju ndaño muẽle ceci tu liyaka lovitangi?

¹⁰ Etu tu pondola oku kuata esanju ndaño muẽle ceci tu liyaka lovitangi ale ceci ovina vĩvi vi lipita lepata lietu.b (Osa. 126:5) Momo lie? Momo esanju liocili ka lia tambele kekalo liomuenyo wetu. Manji umue ukãi ukundi wotembo yosi o tukuiwa Maria, wa popia hati: “Oku kuata esanju poku liyaka lovitangi, ka ci lomboloka okuti kua kapeleko ovisimĩlo viove. Pole, ci lomboloka okuti kua ivaleleko olohuminyo via Yehova. Isietu wo kilu, o ka tu kuatisa oku amamako oku kuata esanju ndaño lovitangi tu kasi oku liyaka lavio.” Ivaluka okuti ndaño ekalo liomuenyo wove cilo ka wa lelukile, ovitangi viaco ka vi kamamako otembo yosi. Ndopo, Yehova o ka malako ovina viosi vi tu kokela ohali kuenda esumuo.

11. Ongangu yupostolo Paulu yi pondola oku ku pamisa ndati?

¹¹ Olonjanja vimue, tu pondola oku sima okuti tu kasi oku liyaka lovitangi omo Yehova ka kasi oku tu sumũlũisa. Nda okuti tu kuete ovisimĩlo viaco, tu sukila oku sokolola kafendeli va Yehova vakuekolelo vana va liyakavo lovitangi ka via lelukile. Tu konomuisi ulandu wupostolo Paulu. Eye wa nõliwile la Yesu oco a sandeke ocili ‘ku vakualofeka, kolosoma kuenda komãla va va Isareli.’ (Ovil. 9:15) Ocili okuti Yesu wa ecele ku Paulu upange umue u kuete esilivilo! Pole, Paulu wa liyaka lovitangi vialua. (2 Va Kor. 11:​23-27) Anga hẽ ovitangi Paulu a liyaka lavio, via lekisile okuti eye ka taviwile vali la Yehova? Ocili okuti sio! Momo, Paulu wa tẽla lika oku pandikisa omo liekuatiso lia Yehova. (Va Rom. 5:​3-5) Kaliye sokolola kekalo liove. Ocili okuti ove o kasivo oku amamako oku vumba Yehova lekolelo, ndaño lovitangi wa siata oku liyaka lavio. Omo liaco, kolela okuti Yehova wa ku sanjukilavo.

12. Nye ci pondola oku lipita letu nda ovimãho tua litumbikila ka via tẽlisiwile?

¹² Cavali: Elavoko ka lia tẽlisiwile. (Olosap. 13:12) Ocisola tu kuetele Yehova kuenda onjongole yoku eca olopandu kokuaye, vi tu vetiya oku tumbika ovimãho kupange waye. Pole, nda ovimãho tua litumbikila ka via tẽlisiwile omo liekalo lietu, tu pondola oku yeva esumuo. (Olosap. 17:22) Ukundi umue wotembo yosi o tukuiwa Holly, wa popia hati: “Nda yonguile oku pindisiwa Kosikola Yakundi Vusoma, oku ka kundila kofeka yikuavo ale oku talavaya kupange woku tunga ko Ramapo. Pole, ekalo liange lia pongoloka kuenda sia tẽlele vali oku tẽlisa ovimãho viaco. Omo liaco, nda yeva esumuo lialua. Ocili okuti ci sumuisa calua nda o yongola oku tẽlisa ocimãho cimue pole, ekalo liove ka li ku ecelela.” Afendeli valua va Yehova, va siatavo oku liyeva ndoco.

13. Ovina vipi tu sukila oku linga nda okuti ekalo lietu ka li tu ecelela oku tẽlisa ovimãho tua litumbikila?

¹³ Nye ci pondola oku tu kuatisa oku tumbulula esanju lietu? Ivaluka okuti Yehova ka tu kisika oku linga ovina ka tu tẽla. Eye wa tu kapako ndaño okuti ka tu pondola oku linga ovina omanu vakuavo va linga. Yehova o yongola okuti tu kala vakuesunguluko kuenda vakuekolelo. (Mika 6:8; 1 Va Kor. 4:2) Eye wa kapako calua ovisimĩlo vietu, olonjongole kuenda ovituwa vietu okuti ovina tu linga kupange waye ci sule. Omo liaco, ka tu ka lavoki oku linga ovina ka vi kasi vepondolo lietu.c Ndaño okuti ekalo liove ka li ku ecelela oku linga ovina wa yonguile kupange wa Yehova, likolisilako oku tiamisila utima kovina o pondola oku linga. Ndeci, ove o pondola oku kuatisa koku pindisa amalẽhe ale oku pamisa vamanji akulu. O pondolavo oku litumbikila ocimãho coku pamisa omunu umue ci kaile votelefone ale poku u tumisa esapulo limue. Yehova o sanjuka calua eci ove o linga ovina vi kasi vepondolo liove kuenda eye o ka ku sumũlũisa poku ku kuatisa oku kuata esanju! Ivaluka okuti voluali luokaliye, tu ka kuata apuluvi alua oku vumba Yehova lonjila yimue yi komõhisa! Manji Holly wa tukuiwa ale wa popia hati: “Eci ndi fetika oku yeva esumuo, ndi ivaluka okuti kovaso yoloneke lekuatiso lia Yehova, ndi ka tẽlisa vimue pokati kovimãho viange voluali luokaliye.”

14. Ocina cipi cikuavo ci pondola oku nyõla esanju lietu?

¹⁴ Catatu: Oku pitisa kovaso olomapalo. Omanu vamue va siata oku sandeka vo internet ovina vi lekisa okuti, esanju liocili li tunda koku li sanjuisa etu muẽle. Handi vali, va siatavo oku vetiyiwa oku sima okuti nda tua linga ovina tu sole ndeci, oku landa ovina tu yongola kuenda oku linga ovongende kovitumãlo via litepa, tu kuata esanju. Ocili okuti hacĩviko oku linga ovina viaco. Momo Yehova o yongola okuti tu sanjukila ovina viwa eye a lulika. Pole, omanu valua okuti va seteka oku li sanjuisa ovo muẽle, noke va limbuka okuti ovina viaco ka via va nenelele esanju liocili. Manji umue ukãi ukundi wotembo yosi o tukuiwa Eva wa popia hati: “Eci o tiamisila lika utima kovitalukilo, onjongole yaco yi kamamako oku livokiya.” Ocili okuti, nda olonjanja viosi tu tiamisila lika utima koku li sanjuisa etu muẽle, tu ka yeva esumuo.

15. Nye tu lilongisila kulandu wa Soma Salomone?

¹⁵ Catiamẽla konima yi tunda koku tiamisila utima kovitalukilo, tu pondola oku lilongisila kulandu wa lipita la Soma Salomone. Eye wa seteka oku sanga esanju poku tẽlisa olonjongole viaye muẽle ndeci, oku lia, oku yevelela ovisikilo viwa kuenda oku kuata ovina viosi viwa a ponduile oku landa kotembo yaye. Pole, ovina viaco ka vio nenelele esanju. Omo liaco, eye wa popia hati: “Iso ka li kuta oku vanja; ndaño muẽle etũi, ka li kuta loku yevelela.” (Uku. 1:8; 2:​1-11) Ovisimĩlo omanu va kuete viatiamẽla kueci ci nena esanju liocili, vi sokisiwa lolombongo viesanda. Olombongo viaco vi molẽha ndu okuti vi kuete esilivilo, pole, ka vi pondola oku landa cimue.

16. Oku lingila ovina viwa vakuetu ci tu kuatisa ndati oku tumbulula esanju lietu? (Talavo oviluvialuvia.)

¹⁶ Nye ci pondola oku tu kuatisa oku tumbulula esanju lietu? Yesu wa tu longisa okuti, “Esanju li tunda koku eca olio lia velapo, li tunda koku tambula li sule.” (Ovil. 20:35) Ukulu umue wekongelo o tukuiwa Alekos, wa popia hati: “Nda siata oku seteka oku linga ovina vimue oco ndi kuatise vakuetu. Poku ci linga, si tiamisila utima kolonjongole viange muẽle kuenje ndi kuata esanju.” Ovina vipi ove o pondola oku linga oco o kuatise omanu vakuavo? Nda wa limbuka okuti omunu umue wa sumua, o pondola oku u lembeleka. Citava okuti pamue ku tẽla oku tetulula ovitangi viaye, pole, ove o pondola oku u yevelela lohenda, oku lekisa ocikembe kuenda oku wivaluisa oco a imbe ocilemo caye ku Yehova. (Osa. 55:22; 68:19) O pondolavo oku u kuatisa oku limbuka okuti Yehova ko yandulukile. (Osa. 37:28; Isa. 59:1) Handi vali, o pondola oku lieca olumue poku u lingila ovina vimue ndeci, oku u telekelako ale oku ka ñuala ñuala laye. Citavavo oku u laleka oco vu ka kundili kumosi kuenje eci ci ko nenela esanju lialua. Ecelela okuti Yehova o talavaya love oco o pamise vakuene. Eci tu tiamisila utima koku kuatisa vakuetu, tu ka kuata esanju liocili!—Olosap. 11:25.

17. Nye tu sukila oku linga oco tu kuate esanju liocili? (Osamo 43:4)

¹⁷ Tu pondola oku kuata esanju liocili eci tu amamako oku kuata ukamba uwa la Isietu wokilu. Embimbiliya li likuminya okuti Yehova o ka tu ĩha “esanju liocili.” (Tanga Osamo 43:4.) Ndaño okuti tu liyaka lovitangi komuenyo, ka tu sukila oku sakalala ale oku kuata usumba. Omo liaco, tuamamiko oku tiamisila utima ku Yehova, una o tu kuatisa oku kuata esanju liocili!—Osa. 144:15.