1925​—Pa Pita Ale Ocita Canyamo

ELAVOKO KA LIA TẼLISIWILE

Vakuakulilongisa Embimbiliya, va lavokaile okuti ongongo ya laikele oku pongoluiwa Ocumbo Celau kunyamo wo 1925. Momo lie? Manji Albert Schroeder okuti noke weya oku panga onepa Kosungu Yolombangi Via Yehova, wa lombolola ndoco: “Tua simile okuti kunyamo waco, Akristão olombuavekua va laikele oku enda kilu kuenda alume vakuekolelo vo kosimbu ndeci, Avirahama kuenda Daviti, va laikele oku pinduiwa loku panga onepa kuviali wa Suku palo posi.” Omo liaco, eci Akristão vaco va limbuka okuti ovina va lavokaile ka via tẽlisiwile, vamue pokati kavo veya oku sumua calua.—Olosap. 13:12.

Ndaño okuti ovina va lavokaile ka via tẽlisiwile, valua pokati ka Vakuakulilongisa Embimbiliya vamamako oku kunda. Ovo va limbuka okuti, oku eca uvangi watiamẽla ku Yehova, oco ocina ca velapo. Tu konomuisi ndomo ovo va talavaya lovingungu viasapulo oco va kundile omanu valua.

OLOMBANGI VIA YEHOVA VIA TUNGA OVINGUNGU VIALUA VIASAPULO

Kunyamo wo 1924, omanu valua va enda oku yevelela ovingungu viasapulo WBBR. Omo liaco, kotembo yaco Vakuakulilongisa Embimbiliya va tunga ovingungu vikuavo viasapulo, ocipepi lolupale luo Chikago, ko Illinois. Oco omanu va yevelele ovipama viovingungu viaco, va sukilile oku sandiliya ondimbukiso yokuti, WORD. Ulume umue o tukuiwa Ralph Leffler okuti, wa kuatisa koku tunga ovingungu viaco viasapulo wa popia okuti, “kotembo yombambi kovoteke, omanu vo kolonepa vialua viocipãla va enda oku yevelela ovingungu viaco viasapulo.” Ndeci, epata limue lia kala ocinãla ci soka 5.000 kolokilometulu lovingungu viasapulo ko Alasca, va yevelela ovipama viatete via yevalisiwa. Noke, epata liaco lia soneha ukanda umue woku eca olopandu ku vana va talavaya kovingungu viaco, omo lioku va kuatisa oku kũlĩha ovina vialua viatiamẽla ku Suku kuenda Kembimbiliya.

Poku vangula catiamẽla konjila ndomo ovingungu viaco via lisandula, Utala Wondavululi 1 ya Cembanima wo 1925 hati: “Ovingungu viaco, vimue pokati kovingungu via velapo ko Estadus Unidus. Omanu va pondola oku yevelela ovingungu viaco kolonepa viosi vio Estadus Unidus. Omanu valua okuti kosimbu ka va la yeva ocili Cembimbiliya, va siata oku lekisa onjongole omo lioku yevelela ovingungu viaco viasapulo.”

Vokuenda kuotembo yaco, Vakuakulilongisa Embimbiliya va talavayavo lovingungu viaco viasapulo oco va kundile olondaka viwa kofeka yo Kanada. Kunyamo wo 1924 kua tungiwavo ovingungu viasapulo kolupale luo Saskatoon, ko Saskatchewan. Ovingungu viaco viasapulo, ovio viatete via vangula ovina viatiamẽla ketavo kofeka yo Kanada. Kunyamo wo 1925, ovo va sukilile oku sandiliya ocitumãlo cikuavo cinene oco va tungilemo ovingungu viasapulo. Omo liaco, ocisoko ca landa ocitumãlo cimue ko Saskatoon kuenje oko kua tungiwila ovingungu viasapulo.

Omo liekuatiso liovingungu viaco viasapulo, omanu vana va kala kalupale atito kuenda kovaimbo, va yeva esapulo Liusoma onjanja yatete. Ndeci, kocitumãlo cimue ocipãla, ukãi umue o tukuiwa Graham, wa soneha oku pinga alivulu noke yoku yevelela ocipama cimue covingungu vietu viasapulo. Manji George Naish wa popia hati: “Epingilo liukãi waco lia molehẽle okuti lionjanga calua kuenje tuo tumisa alivulu atatu a tukuiwa hati, Estudos das Escrituras (Alilongiso Ovisonehua).” Ka pa pitile otembo yalua kuenje ukãi waco wa kala oku sandeka esapulo Liusoma kovitumãlo viocipãla.

ELOMBOLOKO LIMUE LIOKALIYE

Ocipama catete Cutala Wondavululi Yelombo wo 1925, ca kuatele ocipama cimue ci komõhisa losapi hati: “Nascimento da Nação (Oku Citiwa Kuofeka).” Momo lie ocipama caco ca kuatela esilivilo lialua? Momo vokuenda kuotembo yimue, Vakuakulilongisa Embimbiliya va kũlĩhĩle okuti Satana o kuete ocisoko cimue muna mua kongela olondele, atavo esanda, ovisoko violomĩlu kuenda viopulitika palo posi. Pocakati cocipama caco, “Ukuenje wa Kolelua Haeye wa Lunguka,” wa kuatisa vamanji oku kuata elomboloko liokuti afendeli va Yehova kilu kuenda palo posi va likuete omunga. Ovo ka va pangi onepa koluali lua Satana kuenda va talavayela kumosi oco va kuatise Yehova loku tamalãla la Satana kuenda vana vo kuama. (Mat. 24:45) Handi vali, ukuenje wa kolelua haeye wa lunguka wa lombolola okuti, Usoma wa Suku wa tumbikiwa kunyamo wo 1914 kuenje omo ‘liuyaki wa lipita kilu’ kunyamo waco, Satana kumue lolondele viaye va imbiwa palo posi.—Esit. 12:​7-9.

Vamue Vakuakulilongisa Embimbiliya, ka ca lelukile kokuavo oku tava kelomboloko liaco liokaliye. Omo liaco, ocipama caco ca eca elungulo liokuti: “Tu pinga okuti nda umue ka tava kelomboloko eli liokaliye, a kuate epandi loku kolela ku Yehova osimbu amamako oku u vumba lekolelo.”

Poku lombolola ndomo vakuakulilongisa Embimbiliya va liyeva eci va tanga ocipama caco, manji umue o tukuiwa Tom Eyre, ukundi wotembo yosi wa popia hati: “Vamanji va sola calua elomboluilo lia eciwa liatiamẽla kelivulu Liesituluilo ocipama 12. Eci tua limbuka okuti Usoma wa tumbikiwa kilu, tua vetiyiwa oku kunda olondaka viaco viwa komanu vakuavo. Handi vali, ca tu vetiyavo oku vokiya otembo tu pesela kupange waco kuenda oku limbuka okuti Yehova wa laikele oku linga ovina vi komõhisa kovaso yoloneke.”

OKU ECA UVANGI WATIAMẼLA KU YEHOVA

Koloneke vilo, Olombangi Via Yehova via kũlĩha ciwa olondaka vi sangiwa kelivulu lia Isaya 43:10 viokuti: “‘Ene vulombangi viange,” oco Yehova a popia, “Ocili, wukuenje wange una nda nõla.’” Pole, osimbu unyamo wo 1925 ka wa pitilĩle, ocisonehua caco ka ca endaile oku tukuiwa calua valivulu etu. Noke, kua lingiwa epongoloko. Kunyamo wo 1925, olondaka vi sangiwa kelivulu lia Isaya 43:​10-12, via tukuiwa kueci ci soka 11 kolorevista Viutala Wondavululi!

Kesulilo liosãi Yenyenye yunyamo wo 1925, Vakuakulilongisa Embimbiliya va linga ohongele yimue yofeka volupale luo Indianapolis, ko Indiana. Manji Joseph F. Rutherford, kesapulo limue lia sonehiwa kulandu wohongele locimãho coku yolela omanu veya kohongele yofeka, wa popia hati: “Tueya kohongele yilo yofeka oco . . . tu pamisiwe la Ñala okuti eci tu tiuka, tu kuata ombili kupange woku kunda.” Vokuenda kuohongele yaco yofeka ya tumala oloneke ecelãla, omanu va kalako va vetiyiwa oku eca uvangi watiamẽla ku Yehova kapuluvi osi.

Vocasapalo keteke 29 Yenyenye, manji Rutherford wa linga ohundo yimue losapi hati: “Uma chamada à ação” (Oku vetiyiwa oku kunda). Vohundo yaco, eye wa lombolola okuti upange woku kunda u kuete esilivilo lialua. Kuenje wa popia hati: “Yehova o sapuila kafendeli vaye hati . . . : “Ene vulombangi viange” . . . “kuenda ame Suku.” Omo liaco, londaka yimue yolukandi haiyo yi yevala ciwa, wa eca kokuavo ocihandeleko cokuti: ‘Kapimo ondimbukiso yimue yelungulo komanu.’ Kilu lieve afendeli vaye ovo lika va siata oku eca ondimbukiso komanu haivo va kuete espiritu lia Ñala kuenje eli olio esunga lieci ovo va tukuiwila okuti, Olombangi Viaye.”—Isa. 43:12; 62:10.

Noke yohundo yaco, manji Rutherford wa tanga ulandu umue losapi hati: “Mensagem de Esperança” (Esapulo Lielavoko). Olonjeveleli viosi via tava kesapulo liaco lina lia lekisa okuti, Usoma wa Suku owo lika u ka nena “asumũlũho ndeci, ombembua, ekalo liwa, uhayele, omuenyo, elianjo kuenda esanju ka li pui.” Noke, esapulo liaco lia sonehiwa vokokanda kamue loku pongoluiwa kalimi alua. Kua sandekiwa eci soka 40 kolohuluwa violokopia viokokanda kaco.

Pa pita otembo yalua oco Vakuakulilongisa Embimbiliya va tukuiwe okuti, Olombangi Via Yehova. Pole, ovo va fetika oku kuata elomboloko liokuti ci kuete esilivilo oku eca uvangi watiamẽla ku Yehova.

EVETIYO LIOKU NYULA VANA VA LEKISA ONJONGOLE

Osimbu etendelo lia Vakuakulilongisa Embimbiliya voluali luosi lia kala oku livokiya, ovo va vetiyiwavo oku linga apasu komanu vana va lekisa onjongole kolondaka viwa. Noke yupange woku eca okokanda losapi hati: Mensagem de Esperança (Esapulo Lielavoko), Ulandua wa eca onumbi yokuti: “Tiukili loku nyula omanu vana va tambula okokanda Mensagem de Esperança” (Esapulo Lielavoko).

Ulandu wosãi ya Susu wo 1925, wa lombolola eci catiamẽla ku umue ukuakulilongisa Embimbiliya kolupale luo Plano, ko Texas hati: “Tua komõha calua poku limbuka okuti, eci tua linga apasu kovitumãlo vina tua kundilile ale, tua kuata onima yiwa okuti kovikanjo viokaliye tua kundila ci sule. Olupale lumue lutito lu panga onepa vocikanjo cetu, va kundilako ale olonjanja vitãlo vokuenda kuanyamo ekũi a sulako. . . . Noke, manji umue ukãi o tukuiwa Hendrix kumue la ina yange, va tiukila volupale luaco kuenje va eca alivulu alua okuti ana a eciwa kosimbu ci sule.”

Ukundi umue wotembo yosi kofeka yo Panama, wa soneha ndoco: “Omanu valua okuti konjanja yatete ka va tavele oku yevelela, va pongolola ovisimĩlo viavo eci va nyuliwa onjanja yavali ale yatatu. Vokuenda kunyamo ulo, nda litumbika koku linga apasu komanu vana nda vanguile lavo kosimbu kuenda ndi kuete ovolandu awa.”

OVINA TUA LAVOKAILE OKU LINGA KOVASO YOLONEKE

Kesulilo liunyamo wo 1925, Manji Rutherford wa sonehela akundi votembo yosi loku lombolola ovina via lingiwa kupange woku kunda vokuenda kunyamo waco kuenda ovina va sukilile oku linga noke. Eye wa popia hati: “Kunyamo wa pita, vamanji va kuata esumũlũho lioku lembeleka omanu valua va sumuile. Oku panga onepa kupange waco ca siata oku va nenela esanju lialua . . . . Kunyamo wiya, vamanji va ka kuata apuluvi alua oku eca uvangi watiamẽla ku Suku, Kusoma waye kuenda oku lekisa komanu okuti afendeli vocili va Yehova . . . . Vosi, tu kamamako oku talavaya lolondaka vietu loku imbila ovisungo Suku yetu, haeye Osoma.”

Kesulilo liunyamo wo 1925, vamanji va kala oku linga esokiyo lioku vokiya o Betele yo Brooklyn. Kunyamo wo 1926, ovo va laikele oku fetika upange umue unene woku tunga okuti, lalimue eteke wa lingiwile vocisoko.