Yesu “wa Lilongisa Epokolo”

Yesu olonjanja viosi wa lekisa epokolo ku Yehova. (Yoa. 8:29) Oco hẽ, momo lie Embimbiliya li popela hati: Eye “wa lilongisa epokolo omo liohali a talisiwa?”—Va Hev. 5:8.

Yesu eci a kala palo posi, wa liyaka lovitangi vina okuti, lalimue eteke a lipitile lavio. Ndeci, eye wa tekuiwa lolonjali vina via solele calua Yehova, ndaño okuti ovio ka via lipuile. (Luka 2:51) Eye wa talisiwa ohali lasongui vetavo olondingãivi kuenda lolombiali. (Mat. 26:59; Mar. 15:15) Ndaño lovina viaco, Yesu “wa liketisa kuenda wa pokola toke koku fa” okuti, olofa vimue vi sumuisa calua.—Va Fil. 2:8.

Ovolandu aco a longisa Yesu oku lekisa epokolo lonjila yimue yokaliye eci a kala palo posi. Omo liaco, eye wa ponduile oku kala Osoma haiye Ocitunda cimue ca Lipua, una wa laikele oku tu kuatela ocikembe. (Va Hev. 4:15; 5:9) Yesu wa soliwa calua la Yehova loku kuata esilivilo kokuaye, noke lioku lilongisa epokolo omo liohali a talisiwa. Etu tu pondolavo oku kala omanu va kuete esilivilo kovaso a Yehova kovikele viosi eye a tu ĩha, eci tu amamako lepokolo poku liyaka lovitangi ka via lelukile.—Tia. 1:4.