Usumba u Tunda Kuyaki

“Ove o mola ovina ka via lelukile vi koka usumba, omanu oku fa ale oku lemẽhiwa calua. Ca leluka oku liyeva okuti kua kolelepo.”—Gary, wo ko Grã-Bretanya.

“Nda loyiwa vonyima kuenda kocipala, nda molavo omanu valua oku pondiwa oku kongelamo omãla kuenda vana va kuka. Ovitangi viaco viuyaki, vi pondola oku koka okuti ku kuata vali ohenda kuenda usumba woku fa.”—Wilmar, wo ko Kolombia.

“Eci omunu umue a loyiwa kovaso ove, ovina viaco ka vi tundi vutue wove. Onjivaluko yomunu waco oku lila loku tala oyali ka vi tundi vutue wove. Ove lalimue eteke o ka ivalako omunu waco.”—Zafirah, wo ko Estadus Unidus.

“Nda simile okuti lalimue eteke ndi pondola oku kuata esanju. Nda kuatele usumba woku fa, pole usumba waco wa livokiwa poku sokolola okuti epata kuenda akamba vange va laikelevo oku fa.”—Oleksandra, wo ko Ukrania.

“Oku kala kulala umue oco o tambule okulia oku upisa kelivala 2:00 komẽle toke 11:00 liuteke, ci koka usumba momo tua kũlĩhĩle okuti tua ponduile oku loyiwa lasualali va kasi oku linga uyaki ocipepi.”—Daler, wo ko Tajikistão.

“Olonjali viange via fa vokuenda kuyaki. Nda linga osiwe, sia kuatele laumue oco a ndi tate.”—Marie, wo ko Ruanda.