Yesu o Yelisa Onembele

Kotembo yonjovo yunyamo 30 K.K., Yesu wa enda ko Yerusalãi. Omanu valua va endele volupale kocipito co Paskoa. Omo okuti oku eca ovinyama kua pangele onepa kocipito, ovo va lumba ovinyama vonembele. Omanu vamue va enda oku nena ovinyama, pole, vakuavo va enda oku vi landa vo Yerusalãi.

Eci Yesu a endele vonembele, wa sanga okuti omanu va kala oku landisilamo ovinyama. Ovo va kala oku lingila omĩlu vonjo yoku fendelela Yehova! Nye Yesu a linga? Eye wa linga osikote yimue yukolo, wa tundisa olomeme, lolongombe kosamua yonembele. Wa kupula olomesa via vakuakutolokala olombongo kuenda wa pesela ovingangu viavo posi. Yesu wa sapuila vana va kala oku landisa olopomba hati: ‘Upi ovina evi palo! Ko ka lingi onjo ya Isiange ocitumãlo cimue colomĩlu!’

Omanu vonembele va komõha omo liovina Yesu a linga. Olondonge viaye via ivaluka ocitumasuku catiamẽla ku Mesiya cokuti: ‘Ndi ka yukisua lombili yonjo ya Yehova.’

Noke, kunyamo 33 K.K., Yesu wa yelisa onembele onjanja yavali. Eye ka ponduile oku ecelela okuti omunu umue o lekisa ekambo liesumbilo konjo ya Isiaye.