Eliapu li Yonja Yesu

Yesu noke yoku papatisiwa, espiritu sandu lio songuila vekalasoko. Eye ka lile lacimue vokuenda kueci ci soka 40 koloneke kuenje wa yeva onjala yalua. Noke Eliapu lieya oco liu yonje kuenje lio sapuila hati: ‘Nda ove Vumõla a Suku, sapuila ovawe a-a oco a pongoloke olombolo.’ Pole, Yesu pocakati Covisonehua wa tambulula hati: “Ca sonehiwa citi: ‘Omunu ka muila lika omuenyo kombolo, te kolondaka viosi vi tunda vomẽla wa Yehova.’”

Noke Eliapu lia sapuila Yesu hati: ‘Nda ove Vumõla a Suku, tẽha kilu liocimbaka ca lepa conembele. Momo ca sonehiwa hati, Suku oka tuma ovangelo vaye oco va ku yakele.’ Pole, Yesu wa tukula vali Ovisonehua hati: ‘Ca sonehiwa okuti, ku ka seteke Yehova.’

Noke Satana wa lekisa ku Yesu ovosoma osi oluali, lovokuasi alio kuenda ulamba walio kuenje wa popia hati: ‘Ndu ku ĩha ovosoma aco osi kuenda ulamba walio, nda wa ndi fendela ño onjanja yimosi.’ Pole, Yesu wa tambulula hati: ‘A Satana, nunde! Momo ca sonehiwa okuti, fendela lika Yehova.’

Omo liaco, Eliapu lio siapo kuenje ovangelo veya, va eca ku Yesu okulia oco a lie. Tunde vepuluvi liaco, Yesu wa kunda olondaka viwa Viusoma. Upange waco owo a tumiwile oku linga palo posi. Omanu va solaile ovina Yesu a enda oku va longisa kuenje ovo va enda oku u kuama kuosi a siatele oku enda.