Okopia Yimue ya Leluka yi Kuatisa “Omanu Vosi Oku Popeliwa”

Yehova Suku o yongola okuti “omanu vosi va popeliwa” kuenda “va kuata ukũlĩhĩso wa suapo wocili.” (1 Timoteo 2:3, 4) Pole, vamanjetu kuenda omanu vana tu kundila, va vangula alimi a litepa. Unyamo lunyamo, tua siata oku panga ci panda olohuluwa vivali kalivulu kalimi omanu va vangula. Tua siata oku talavaya ndati lolombanjaile via siata oku eciwa poku pongiya okulia kuespiritu kalimi alua?

Olomakina Vioku Upa Olokopia ka Via Luile, Pole, Via Velapo

Vokuenda kuanyamo 1980, tua siata oku panga olorevista vialua kueci ci pitahãla 40 kolofeka. Oku upisa kunyamo waco, tua tepulula upange waco kuenje cilo kolofeka ecea oko lika kua siata oku pangiwila alivulu. Vokuenda kuotembo yaco, etendelo tua siata oku pongolola, lia livokiya eci ci soka 500 kolopulusendu. Tua siata oku upa ndati olokopia vialivulu alua ndaño lolomakina vitito? Ocina cimue ci kuete esilivilo kokuetu, oku kuata olomakina via velapo.

Olomakina viokaliye vi tu kuatisa oku panga alivulu alua votembo yitito. Lolomakina viosimbu, tua enda oku pita otembo yalua oku vi pongiya oco tu linge lavio upange ukuavo. Cilo, lolomakina viokaliye tu linga lonjanga apongoloko okuti ci lingiwa lika olonjanja vikuãla. Tu pondola oku malusula lonjanga ovopange oku upa olokopia vialivulu kalimi ana okuti a vanguiwa letendelo liomanu vatito. Ocili okuti, upange lupange woku upa olokopia, u sukila ovimalẽho viokaliye. Vokuenda kuolosãi 12, tua pesela eci ci panda olohuluwa vivali violondolale oco ku landiwe ovimalẽho viokaliye vioku kapa volomakina vioku upa olokopia.a Omo liaco, poku linga ovopange atito tua siata oku talavaya lolomakina ka vi sukila ovimalẽho. Volomakina viaco, mua kongela vina okuti oku talavaya lavio ka ku pesiwa olombongo vialua.

Vanyamo atatu a sulako, tua pesela eci ci pitahãla ekũi kolohuluwa violondolale oco ku semũlũiwe olomakina vioku upa olokopia koluali luosi. Limbuka ndomo tua siata oku talavaya lovikuata viaco oco kupangiwe Ambimbiliya. Kosimbu vamanji va sukilile oku kuama eci ci pitahãla 40 kolonepa oco kupangiwe Embimbiliya limue noke yoku upa okopia oku kongelamo, oku tonga, oku teta, oku miuhĩsa, oku puenya kuenda oku posuisa. Handi vali, olonjanja vialua tua sukilile oku upa Ambimbiliya loku a longeka olondunda. Koloneke vilo, ku lingiwa lika olonepa ekũi, momo olonepa vialua via kongeliwa vomakina yokaliye kuenda olomakina vioku tuta vi ambata Ambimbiliya oco ku lingiwe ovopange a litepa. Eci ca tu kuatisa oku tepulula upange woku panga Embimbiliya kueci ci pitahãla 55 kolopulusendu. Ko Betele yo ko Japãu, onjo yoku panga alivulu vokuenda kuolowola ecelãla ya enda oku panga ci soka 2.000 Kambimbiliya. Koloneke vilo, votembo yimuamue ku pangiwa eci ci soka 35.000 Kambimbiliya!

Oku Seleka Olopapelo Vitito Kuenda Alivulu Atito ci Kuatisa Oku Yuvula Oku Pesela Olombongo Vialua

Oku semũlũiwa kuolomakina ndomo ca tukuiwa, kua tu kuatisa oku tetelẽla olombanjaile. Ndeci, omo okuti cilo ka tu upi olokopia vialua kuenda ka tu pongolola olonjanja viosi ovimalẽho viaco, tua tepulula etendelo lialivulu a selekiwa. Manji Gary o kasi ko Betele yo ko Estados Unidos wa popia okuti: “Oku panga etendelo litito lialivulu kefetikilo ka ca lelukile. Ci molẽha okuti ca leluka vali oku upa olokopia vialua votembo yitito.” Eye wamisako ndoco: “Kunyamo watete, noke lioku fetika oku upa olokopia vitito olonjanja vialua, olombongo tua pesela vioku landa ovimalẽho violomakina vioku upa olokopia kuenda olopapelo, via livokiya eci ci soka 60.000 kolondolale. Omo liaco, kunyamo waco tua tẽla oku tetelẽla ci pitahãla 1.5 kolohuluwa violondolale oco ku landiwe olopapelo vioku panga alivulu!” Poku ci linga tua tẽla oku talavaya lolombongo viaco oco tu linge ovina vikuavo vi kuete esilivilo. Ndeci: Oku tungiwa Kuolonjango Viusoma kuenda oku kuatisa oku kua pita ovilunga.

Oku seleka ovina vitito ci kuatisa oku sia evelo lioku seleka ovina vikuavo ko Betele. Olombetele viaco vi pondola oku kapa povitumãlo viaco ovina vikuavo vi sukiliwa. Handi vali, oku pangela alivulu kovitumãlo vitito, olonjanja vialua ci tu kuatisa oku tepulula ovopange akuavo oku tunga. Ndeci, upange woku linga olokopia ko Betele yo ko Grã-Bretanya, wa fetika oku lingiwila ko Betele yo Europa Central kuenda kolonjo vikuavo vioku upa olokopia kunyamo wo 2018. Eci ca kuatisa oku tetelẽla olohuluwa violondolale oco ku tungiwe o Betele yo Chelmsford ko Inglaterra.

“Ove wa Ndi Ivaluka!”

Ocina ca velapo ceci okuti, onjila ndomo tua leluisa ovina poku upa olokopia, ya siata oku kuatisa omanu valua oku kuata ukamba la Yehova. Kaliye tu pondola oku upa olokopia kalimi alua, ndaño ku sukiliwa lika olokopia vitito vielivulu limue. Ndeci, kofeka yo Nova Caledonia, ko Wallis kuenda ko Futuna, kuli lika ci soka 35.000 komanu va vangula elimi lio Wallisiano. Pole, kosãi Yenyenye yunyamo wo 2024, Embimbiliya Li Kola lia sandekiwa liosi kelimi lio Wallisiano. Ukundi umue o tukuiwa Selafina o vangula elimi lio Wallisiano wa popia hati: “Ame nda enda oku tanga olondaka vimue kelimi lio Fransesi okuti sia kuataile elomboloko liaco. Pole, eci tua tambula Embimbiliya kelimi lio Wallisiano nda lila. Nda likutilila ndoco: ‘A Yehova, ove wa ndi ivaluka! Ove wu Suku yimue okuti ku kuete ocame.’”

Ndaño okuti kofeka yo Republika Demokratika yo Kongo vana va vangula elimi lio Sanga ka va tẽla ci soka 500.000 komanu, pole, elivulu Sanjukili Omuenyo Otembo ka yi Pui! lia sandekiwa kelimi liavo. Josué watiamẽla kekongelo lielimi lio Sanga wa popia hati: “Kosimbu, omunu wa sukilile oku likolisilako calua oco a lombolole ale oku pongolola olondaka vimue kolondonge Viembimbiliya. Ndaño ndoco, olondonge Viembimbiliya ka via kuataile elomboloko liovina vi sangiwa velivulu liaco. Esanju limue linene oku tambula elivulu liaco kelimi lio Sanga! Kaliye olondonge viange, vi pondola oku kuata elomboloko liovina ndi vi longisa kuenda si sukila oku vi lomboluila calua.”

Tu kasi oku panga loku eca alivulu komanu kuenda kalimi alua okuti kosimbu ci sule. Olombanjaile viove, oku kongelamo vina vi eciwa lekuatiso lio donate.jw.org, via siata oku tu kuatisa oku ci linga. Tua pandula omo liocituwa cove coku eca.