Nye Embimbiliya li Popia Catiamẽla Koku Lipindala Loku Wala Olomota Lovimbilingu?
Etambululo Liembimbiliya
Ndaño okuti ka ku popiwa ovina vialua viatiamẽla kondaka yaco, Embimbiliya ka lipisa oku lipindala, oku wala olomota ale ovimbilingu. Pole, ka ciwako oku tiamisila lika utima kemolẽho lioketimba, momo Embimbiliya li tu vetiya okuti “eposo liene li kale ndomo wa tuwi vutima okuti, ka li pongoloka, hailio liombembua loku omboka.”—1 Petulu 3:3, 4.
Oku wala olomota lovimbilingu ka ci pisiwa
Akãi vakuekolelo va tukuiwa Vembimbiliya va enda oku liposuisa. Rebeka wa kuelele la Isaque omõla Avirahama. Eye vo wĩha ocimbilingu culu co kenyulu lovinunga viulu kuenda ovina vikuavo via tĩla, via eciwa la ndatembo yaye. (Efetikilo 24:22, 30, 53) Cimuamue haico okuti, Ester, wa “posuisiwa ciwa” osimbu ka nõliwile oku kala nasoma yo ko Persia. (Ester 2:7, 9, 12) Citava okuti, voku posuisiwa kuaco mua kongelele oku “lipindala kuenda ovina vikuavo.”
Embimbiliya li sokisa ovina viwa lolomota. Ndeci, omunu umue eca elungulo limue liwa, o sokisiwa “locimbilingu culu . . . ketũi li yeva.” (Olosapo 25:12) Ulandu ukuavo, ceci Suku a lisokisa lulume eca kukãi waye ovinunga kuenda ovimbilingu. Ocindekaise eci ci lekisa okuti Yehova, wa enda oku tata ciwa va Isareli. Embimbiliya li popia okuti, olomota viaco via enda oku “posuisa” ofeka.—Esekiele 16:11-13.
Uhembi watiamẽla koku lipindala loku wala olomota lovimbilingu
Uhembi: Kukanda 1 Petulu 3:3, Embimbiliya li pisa “oku vinda esinga, pamue oku li miangulula lulu.”
Ocili: Ulandu owu u lombolola okuti ocinimbu eci ci kasi oku lekisa okuti, eposo liovutima li kuete vali esilivilo okuti eposo liokilu li sule. (1 Petulu 3:3-6) Oku litepa kuolondaka evi, ku molẽhavo vovinimbu vikuavo Viembimbiliya.—1 Samuele 16:7; Olosapo 11:22; 31:30; 1 Timoteo 2:9, 10.
Uhembi: Ka ciwako oku lipindala momo Embimbiliya li popia okuti, Nasoma Isevele “wa li pindala otinda yi tekãva vovaso.”—2 Olosoma 9:30, etosi.
Ocili: Nasoma Isevele wa talavaya lumbanda kuenda wa kala omondi. Eye wa sombisiwa omo liovilinga viaye okuti emolẽho liaye halioko.—2 Olosoma 9:7, 22, 36, 37.