O Bavulono Yinene yi Lomboloka Nye?

Etambululo Liembimbiliya

Elivulu Liesituluilo li lombolola “ukãi umue” okuti “ocipuepue cinene” kuenda o kuete “onduko yimue yelumbu yokuti: ‘Bavulono Yinene.’” (Esituluilo 17:1, 3, 5) Ukãi waco o lomboloka ocindekaise catavo osi esanda voluali, ana a siata oku “pongolola ocili ca Suku luhembi.”a (Va Roma 1:25) Ndaño okuti a litepa kovina vialua, pole, atavo aco osi esanda a tindula omanu kefendelo liocili lia Suku yocili Yehova.—Esinumuĩlo 4:35.

Ndomo ku Limbukiwa o Bavulono Yinene

1. O Bavulono Yinene ondimbukiso yimue. Elivulu Liesituluilo lia sonehiwa “lovindekaise.” Omo liaco, tu pondola oku popia okuti o Bavulono Yinene “ocindekaise” cimue kuenda ka yi lomboloka ukãi umue o kuete etimba liositu. (Esituluilo 1:1) Handi vali, eye wa “tumãla kovava alua” a lomboloka “omanu lowiñi, lolofeka kuenda alimi.” (Esituluilo 17:1, 15) Ukãi umue okuti hawocindekaiseko, nda ka tẽlele oku ci linga.

2. O Bavulono Yinene yi lomboloka ocisoko cimue coluali luosi. Oyo, yi tukuiwa okuti, “olupale lunene lu kuete usoma umue u viala olosoma vio kilu lieve.” (Esituluilo 17:18) Omo liaco, ocisoko cimue ci tumĩla oluali luosi.

3. O Bavulono Yinene ocisoko cimue catavo okuti, hacisokoko co pulitika ale colomĩlu. O Bavulono kosimbu ya kala olupale lumue okuti, omanu vaco va litumbikile calua ketavo, halio lia kũlĩhĩwile omo lioku “lova” kuenda “umbanda.” (Isaya 47:1, 12, 13; Yeremiya 50:1, 2, 38) Volupale luaco, omanu va enda oku fendela etavo liesanda okuti, Suku yocili Yehova, hayeko. (Efetikilo 10:8, 9; 11:2-4, 8) Olombiali vo ko Bavulono via kala vakuepela kuenda via livelisilepo okuti, Yehova kuenda etavo liocili ci sule. (Isaya 14:4, 13,14; Daniele 5:2-4, 23) Cimuamue haico okuti, o Bavulono Yinene ya kũlĩhĩwa omo “liumbanda wayo.” Eci ci lekisa okuti, ocisoko cimue cetavo.—Esituluilo 18:23.

   O Bavulono Yinene, ka citava okuti ocisoko cimue copulitika omo okuti, “olosoma vio kilu lieve” vi lila omo lioku kunduiwa kuayo. (Esituluilo 17:1, 2; 18:9) Oyo hacisokoko colomĩlu omo okuti, Embimbiliya yu tepisa ku “vakualomĩlu vo kilu lieve.”—Esituluilo 18:11, 15.

4. 

   Photograph taken by courtesy of the British Museum

   O Bavulono Yinene ondimbukiso yetavo liesanda. Etavo liesanda ka li longisa omanu ndomo va kuata ukamba la Suku yocili, Yehova, pole, li va vetiya oku fendela olosuku vikuavo. Embimbiliya li ci tukula okuti, “upuepue konepa yespiritu.” (Ovisila 20:6; Etundilo 34:15, 16) Atavo alua esanda, a kasi oku amamako oku longisa ovina vi situlula ovituwa via kala ko Bavulono yosimbu, ndeci elongiso lia suku umosi muvatatu, elongiso liokuti vetimba liomunu muli cimue ci amamako lomuenyo noke yoku fa kuenda efendelo lioviteka. Atavo aco poku fendela, va lekisavo ocisola koluali. Embimbiliya li ci tukula okuti, ukahokolo konepa yespiritu.—Tiago 4:4.

   Ovokuasi kuenda ovina vikuavo viatavo esanda, a likuata ciwa leci Embimbiliya li popia catiamẽla ko Bavulono Yinene, yina ya “wala uwalo wohusu lowu u kusuka” kuenda ya “liposuisa lulu, lovawe a tĩla, lomota yondongo.” (Esituluilo 17:4) O Bavulono Yinene, oyo ono ‘yovina vi lingisa onyanya vio kilu lieve’ ale yalongiso kuenda ovituwa vi sumuisa Suku. (Esituluilo 17:5) Vana va kasi vatavo esanda ‘owiñi, olofeka kuenda alimi,’ va kuatisa o Bavulono Yinene.—Esituluilo 17:15.

O Bavulono Yinene, yi kuete eko omo liolofa liomanu “vosi va pondiwa kilu lieve.” (Esituluilo 18:24) Vokuenda kuanyamo, etavo liesanda lia vetiya ovoyaki kuenda ungangala. Handi vali, ka yi longisa omanu ocili catiamẽla ku Yehova Suku ukuacisola. (1 Yoano 4:8) Kuenje ovina viaco via siata oku kuatisa koku pesiwa kuosonde.

Suku o tenda ndati o Bavulono Yinene?

Suku o tenda o Bavulono Yinene okuti “akandu ayo a li lundaika toke kilu.” (Esituluilo 18:4, 5) Suku ka sanjukila etavo liesanda omo lioku sepula kuenda oku tata lãvi afendeli vaye.

Nye ci ka pita lo Bavulono Yinene?

Embimbiliya li popia okuti ‘Suku o ka sombisa’ o Bavuluno Yinene. (Esituluilo 18:20) Embimbiliya li popia okuti Suku o ka kundula atavo osi esanda. (Esituluilo 18:8) Eye o ka vetiya ocinyama ca tema ca wala uwalo wohusu lowu u kusuka— ci lomboloka olosoma viosi vio kilu lieve vina vi ka ñualilapo etavo liesanda loku likundula elisi. (Esituluilo 17:16, 17) “Haico o Bavulono Yinene yi ka imbiwa posi longusu yalua kuenje lalimue eteke yi ka sangiwa vali.” (Esituluilo 18:21) Eli olio esunga lieci vana va yongola oku sanjuisa Suku, va sukilila oku tunda “pokati kavo” ale oku siapo etavo liesanda.—2 Va Korindo 6:14-17.