Olombangi Via Yehova vi Tata Ndati Omanu Vana ka va Pangi Onepa Ketavo Liavo?

Etu tua siata oku likolisilako oku tata vosi locisola, lohenda kuenda lesumbilo. Nda Ombangi yimue ya Yehova ya tepulula ombili yaye ale ya liwekapo oku enda enda kolohongele, etu tu u kuatisaa locisola loku u vetiya oku tumbulula ukamba waye la Suku.—Luka 15:4-7.

Pamue omunu o linga ocina cimue ci kisika oku tundisiwa vekongelo. (1 Va Korindo 5:13) Omo okuti tu kuetele ocisola cocili vamanjetu, lonjanga yalua tu va kuatisa oco ka va ka tundisiwa vekongelo. Ndaño okuti eye wa tundisiwa, pole, tu lekisa ocisola kuenda esumbilo ndomo Embimbiliya li tu vetiya oku ci linga.—Marko 12:31; 1 Petulu 2:17.

Nye ci vetiya omunu oku tundisiwa vekongelo?

Embimbiliya li popia okuti nda Ukristão umue wa linga ekandu kuenda ka yongola oku linga apongoloko, eye o sukila oku tundisiwa vekongelo.b (1 Va Korindo 5:11-13) Embimbiliya li tukula akandu anene a pondola oku koka okuti, omunu o tundisiwa vekongelo. Olio li lekisa ulala wovituwa vimue ndeci, ukahokolo, uholua, oku ponda, ungangala kuenda oku nyala.—1 Va Korindo 6:9, 10; Va Galatia 5:19-21; 1 Timoteo 1:9, 10.

Etu ka tu tundisa lonjanga vekongelo omunu umue wa linga ekandu. Akulu vekongeloc tete va kuatisa omunu waco oku linga apongoloko. (Va Roma 2:4) Ovo va likolisilako oku vetiya utima womunu waco lohenda, ocikembe kuenda ocisola. (Va Galatia 6:1) Ovituwa viaco, vi vetiya omunu wa linga ekandu oku limbuka akulueya aye kuenje o likekembela. (2 Timoteo 2:24-26) Nda noke ya likolisilo aco oku u kuatisa eye amamako oku lueya olonumbi viesunga Viembimbiliya kuenda ka likekembela, eye o sukila oku tundisiwa vekongelo. Akulu vekonge va linga esapulo limue vekongelo liokuti, omunu waco Hambangiko vali ya Yehova.

Onima yipi yi tunda koku tundisa omunu umue amamako oku linga ekandu? Onima yaco yeyi yokuti, ekongelo li teyuiwa kolonumbi via Iipua via Suku kuenda kovilinga vĩvi viomunu waco. (1 Va Korindo 5:6; 15:33; 1 Petulu 1:16) Handi vali, omunu wa linga ekandu o vetiyiwa oku yuvula ovituwa viaye ka via sungulukile, loku likolisilako oku linga apongoloko.—Va Heveru 12:11.

Olombangi Via Yehova vi tata ndati omanu vana va tundisiwa vekongelo?

Embimbiliya li popia okuti Akristão va sukila oku “liwekapo oku kuata ukamba” lomunu wosi wa tundisiwa vekongelo, “ndaño oku lia lulume waco.” (1 Va Korindo 5:11) Omo liaco, ka tu ka lingi ukamba lomunu umue wa tundisiwa vekongelo. Pole, ka tu yuvula omunu waco kolonepa viosi. Etu tu u tata lesumbilo. Tu u yolela eci eya kolohongele vietu, kuna a pondola oku lamiwa Lolombangi Via Yehova.d Eye o pondolavo oku pinga ekuatiso kakulu vekongelo konepa yespiritu.

Nye ci pita lomunu una wa tundisiwa vekongelo, pole, ohueli yaye kuenda omãla vatito handi Olombangi Via Yehova? Citava okuti, ukamba waye la Yehova u pongoloka, pole, ukamba waye lepata wamamako. Omo okuti ovo va kasi vonjo yimuamue, ukamba lohueli yaye kuenda lepata liaye, wamamako.

Omunu wa tundisiwa vekongelo, o pondola oku pinga oco akulu vekongelo vo nyule loku u wĩha alungulo ocisola a sangiwa Vembimbiliya loku u vetiya oco a likekembele loku tiuka ku Suku. (Sakariya 1:3) Nda eye wa liwekapo oku linga ekandu loku lekisa onjongole yocili yoku kapako olonumbi viesunga Viembimbiliya, o pondola vali oku tambuiwa vekongelo. Ekongelo li u wecela “locisola loku u lembeleka,” ndeci Akristão vo ko Korindo va linga, eci umue ukuekandu a linga apongoloko loku kuama onjila ya sunguluka.—2 Va Korindo 2:6-8.

Vana va tundisiwa vekongelo osimbu va liyevite ndati?

Kũlĩhĩsa eci Olombangi vimue Via Yehova via popia vina via tundisiwile vekongelo okuti, noke via tiuka ku Yehova.

“Eci nda nõlapo oku tiuka vekongelo, nda simile okuti akulu vekongelo va ka ndi pula ovina viosi nda linga tunde eci nda tundisiwile vekongelo. Pole, ovo va ndi sapuila lika okuti: ‘Tu yongola okuti ove o tiamisila utima kovina viokovaso.’ Noke nda liyeva ciwa kuenda nda tulumuha.”—Maria, ko Estados Unidos.

“Ekongelo lia sanjuka omo nda tiuka. Nda liyeva okuti ndi kuete esilivilo. Vamanji alume lakãi, va ndi kuatisa oku limbuka okuti nda eceliwa kuenda va ñuatisavo oku tiamisila utima kovaso. Akulu vekongelo olonjanja viosi, va ndi kuatisa oku tumbulula ukamba wange la Yehova. Ovo va ndi lembeleka kuenda va ndi kuatisa oku limbuka okuti Yehova wa ndi kapako kuenda o ndi sole.”—Malcom, Serra Leoa.

“Ndi kuete esanju omo Yehova o sole calua afendeli vaye oco okuti ocisoko caye ci amamako oku yelisiwa. Ndaño okuti omanu ka va kuata elomboloko liesunga lieci omunu umue a tundisiwila, pole, ocina cimue ci lomboloka ocisola. Ngeca olopandu ku Isietu wokilu, omo lioku kala Suku umue ukuacisola haeye ukuahenda.”—Sandi, ko Estados Unidos.