Uloño wo Komputadore—Esumũlũho Ale Esiñalo? Nye Embimbiliya li Popia?

Koloneke vilo, olombiali violuali kuenda olonoño va vangula eci catiamẽla kunene wuloño wo komputadore. Ndaño va limbuka okuti uloño waco u kuete esilivilo, pole, ovo va siatavo oku lekisa esakalalo liohele yi tunda koku talavaya lãvi luloño waco.

• Kamala Harris oñuatisi yombiali yo Estadus Unidus wa soneha ndoco: “Koloneke vilo, uloño waco u kuete unene woku nyõla oku kolapo kuomanu leteyuilo liavo, loku upa elianjo lia sokamo liomanu kuenda oku koka okuti ka va kolela vali kolombiali.—4 ya Kupemba wo 2023.

• Ndotolo Frederik Federspiel wa soneha ndoco: “Ndaño okuti uloño waco u kuatisa koku tetulula ovitangi vimue viuhayele, pole, u pondola oku kapa kohele uhayele wo ketimba kuenda wovisimĩlo volonjila vikuavo.” Ocipama ca sandekiwa keteke 9 ya Kupemba wo 2023, vo BMJ Global Health.a

• “Uloño waco wa siata oku vetiya omanu oku sandeka asapulo esanda. Eci ci koka ovitangi kovopange. Omanu vamue va talavaya luloño, va sakalala calua leci ci ka pita kovaso yoloneke.”—Ukanda Wasapulo, 1 ya Kupemba wo 2023.

Osimbu otembo yi pita, ci limbukiwa nda omanu va ka talavaya luloño lonjila yimue yi kuatisa ale yi kapa kohele ekalo liomanu. Nye Embimbiliya li popia?

Esunga lieci alikolisilo omanu ka a koleliwile

Embimbiliya li lekisa esunga lieci omanu ka va tẽlela oku nena ekalo liwa ndaño okuti va likolisilako oku talavaya ciwa luloño waco.

1. 1. Ndaño omanu va kuete ovisimĩlo viwa, ovo ka va tẽla oku malako ovina vĩvi vi tunga kovilinga viavo.

   • “Omunu ukuesino vutima, o ka kuata ovitangi omo liolonjila viaye, pole, omunu uwa o ka kuata onima yiwa omo liovilinga viaye.”—Olosapo 14:12.

2. 2. Omunu umue ka tẽla oku lavulula nda vakuavo va ka talavaya ciwa ale lãvi lupange waye.

   • “Nda fetika oku suvuka cosi cina ame nda talavayela calua vemẽhi liekumbi, momo ame nda sukilile oku ci sila komunu una o ndi piñala. Kuenje helie wa kũlĩha nda eye o ka kala ukualondunge ale eveke? Ndaño ndoco, eye o ka lava ovina viosi nda lisandela lalikolisilo alua kuenda lolondunge vemẽhi liekumbi.”—Ukundi 2:18, 19.

Alikolisilo aco a tu kuatisa oku limbuka esunga lieci tu sukilila oku songuiwa Lululiki wetu.

Koku tu pondola oku kolela

Ululiki wetu wa likuminya okuti eye lalimue eteke a ka ecelela omanu ale uloño omunu a panga, oku nyõla ongongo ale epata liomanu.

• “Ongongo yamamako otembo ka yi pui.”—Ukundi 1:4.

• “Vakuesunga va ka piñala ilu lieve, kuenda va ka kalamo otembo ka yi pui.”—Osamo 37:29.

Pocakati Cembimbiliya, Ululiki wetu o tu ĩha olonumbi vi ka tu songuila kombembua kuenda kekalo lia kolapo. Oco o lilongise eci Embimbiliya li popia, tanga ovipama losapi “Kuli hẽ Usongui Umue wa Koleliwa Oco a tu Kuatise Oku Kuata Ekalo Lia Kolapo Kovaso Yoloneke?” kuenda “O Pondola Oku Kolela Kekalo Liwa Lio Kovaso Yoloneke.”