Anga hẽ Embimbiliya li Pondola Oku ku Kuatisa Oku Yula Ocituwa Cĩvi Coku Sipa Loku Fenya Olodroga?
Unyamo lunyamo, olohuluwa vialua viomanu vi fa omo liovitangi vi tunda koku sipa. Vokuenda kuefengi lio COVID-19, ocitangi caco ca livokiya calua. Ukũlĩhĩso Wembimbiliya, wa siata oku kuatisa omanu valua oku yuvula oku sipa loku fenya olodroga. Nda o kasi oku liyaka locitangi caco, Embimbiliya li pondolavo oku ku kuatisa.a
Vocipama cilo
Momo lie o sukilila oku sandiliya ekuatiso Vembimbiliya oco o yule ocituwa cimue?
Ovina vikuãla vi kuatisa oku yula ocituwa coku sipa loku fenya olodroga
Ovisonehua Viembimbiliya vi ku kuatisa oku yula ocituwa coku sipa loku fenya olodroga
Ovolandu vomanu va tẽla oku yula ocituwa coku sipa loku fenya olodroga lekuatiso Liembimbiliya
Momo lie o sukilila oku sandiliya ekuatiso Vembimbiliya oco o yule ocituwa coku sipa loku fenya olodroga?
Vakuakukonomuisa va limbuka okuti vocituwa coku sipa olonjanja vialua mua kongela ovina vikuavo, ndeci ulika, esumuo kuenda esakalalo. Embimbiliya li pondola oku ku kuatisa oku kuata ekolelo o sukila, oco o tẽle oku liyaka lovitangi vina vi ku kokela oku kuata ocituwa civĩ. Olio li lekisa ndomo o pondola oku kuata ukamba wa pama la Suku. (Olosamo 25:14) Lekuatiso Liembimbiliya, ove o pondola oku yula ovitangi vi kasi ndu okuti ku tẽla oku vi yula lika wove.—Marko 11:22-24.
Ovina vikuãla vi kuatisa oku yula ocituwa coku sipa loku fenya olodroga
1. Lilongisa ovina viatiamẽla ku Yehova.b (Yoano 17:3) Eye Ululiki haeye Ono yunene. Pole, Yehova eye Isiove Wokilu ukuacisola. Eye o yongola oku kala ekamba liove loku talavaya lunene waye oco a ku kuatise. (Isaya 40:29-31; Tiago 4:8) Yehova wa likuminya ovina vi komõhisa kovaso yonoleke kokuove nda wa nõlapo oku soliwa laye.—Yeremiya 29:11; Yoano 3:16.
2. Pinga ekuatiso ku Yehova. Likutilila ku Suku loku pinga oco a ku kuatise oku yula ocituwa cove okuti, o kala “ndocilumba ci kasi lomuenyo, ci kola, haico ci taviwa laye.” (Va Roma 12:1) Suku o talavaya lespiritu Sandu liaye ale ongusu yaye oco a ece kokuove “unene wa piãla u tunda ku Suku.” (2 Va Korindo 4:7; Luka 11:13) Unene waco u ka ku kuatisa oku liwekapo oku sipa loku fenya olodroga loku kala “omunu wokaliye” okuti o likuata locipango ca Suku.—Va Kolosai 3:9, 10.
3. Yukisa utima wove lovisimĩlo via Suku. (Isaya 55:9) Eye o ka ku kuatisa ‘oku amamako oku pongoloka oco o kale wokaliye kovisimĩlo’ okuti o kuatisiwa oku yula ocituwa caco. (Va Efeso 4:23) Ovisimĩlo via Suku vi sangiwa Vembimbiliya, omo liaco ci kuete esilivilo oku vi tanga olonjanja viosi. (Olosamo 1:1-3) Omanu valua va kuatisiwa oku kuata elomboloko lieci Embimbiliya li longisa. (Ovilinga 8:30, 31) Olombangi Via Yehova vi longisa omanu Embimbiliya ocali. Tu ku lalekavo oku enda kolohongele kuna tua siata oku lilongisa eci Embimbiliya li popia, loku limbuka ndomo tu kapako ovina viaco komuenyo wetu.
4. Nõla akamba vawa. Oco o yule ocituwa caco, akamba vove va pondola oku ku vetiya oku linga eci ciwa ale eci cĩvi. (Olosapo 13:20) Ove o ka sanga akamba vawa pokati ka vana va vumba Suku. (Olosamo 119:63; Va Roma 1:12) Ci kuetevo esilivilo oku kuata utate poku nõla ovitalukilo. Momo noke kesulilo liaco, o fetika oku setukula omanu wa mola, wa yeva ale ulandu wavo wa tanga. Yuvula ovina viosi vi ku honguisa konjila wa nõla yoku linga eci ciwa.—Olosamo 101:3; Amosi 5:14.
Ovisonehua Viembimbiliya vi ku kuatisa oku yula ocituwa coku sipa loku fenya olodroga
Olosamo 27:10: “Ndaño isiange ale ina yange va ndi yanduluka, Yehova o ka ndi tambula.”
“Sia kũlĩhĩle isiange wa ndi cita kuenje nda kala ndulika. Eci nda limbuka okuti Yehova Suku ka kaile lika ongusu kokuange pole, wa ndi solelevo calua, omuenyo wange wa fetika oku kuata ocimãho kuenda nda tẽla oku yula ocituwa caco.”—Wilby, wo ko Haiti.
Olosamo 50:15: “Mbilikiye kotembo yohali. Ame ha ku yovola kuenda ove o ka ndi sivaya.”
“Olonjanja viosi ohuminyo yocisonehua eci, ya siata oku nyĩha ongusu oco si ka liwekepo, ndaño ceci nda kuata vali onjongole yoku ci linga. Yehova wa tẽlisa ovina a likuminyile.”—Serhiy, wo ko Ukrania.
Olosapo 3:5, 6: “Kolela Yehova lutima wove wosi kuenda ku ka kolele kelomboloko liove muẽle. U kapako kolonjila viove viosi kuenje eye o ka suñamisa olonjila viove.”
“Ovinimbu evi via ndi kuatisa oku kolela ku Yehova okuti kokuange muẽle hakoko. Lunene waye, ame nda tẽla oku pongolola ekalo liomuenyo wange.”—Michele, wo ko Italia.
Isaya 41:10: “Ku ka kuate usumba momo ndi kasi love. Ku ka sakalale momo ndi Suku yove. Ndi ka ku kolisa, ocili, ndi ka ku kuatisa, ndi ka ku kuata muẽle leka liange liondio liesunga.”
“Olonjanja vimue eci sia kuatele olodroga, nda nda oku sakalala calua. Ocisonehua eci ca ndi kuatisa oku tava okuti Suku o ndi kuatisa oku yula esakalalo kuenje wa ndi kuatisa muẽle.”—Andy, wo ko África do Sul.
1 Va Korindo 15:33: “Ko ka kembiwi. Akamba vãvi va nyõla ovituwa viwa.”
“Ca ndi vetiya oku fetika oku fenya loku sipa olodroga, akamba vãvi nda kuata. Nda tẽla lika oku yula ocitangi caco eci nda siapo akamba vaco, loku kala lomanu vakuavituwa viwa okuti va kuata ekalo liomuenyo umue wa enda oku ndi komõhisa calua.”— Isaac, wo ko Quênia.
2 Va Korindo 7:1: “A vamanji wa soliwi, omo tu kuete olohuminyo evi, tu liyelisi kevĩho liosi lio ketimba kuenda vutima.”
“Ocisonehua eci ca ndi vetiya oku amamako oku liyaka locitangi caco oco ndi kuate utima wa yela, loku yuvula ovituwa viange vĩvi kuenda ovina viosi via kala oku nyõla omuenyo wange.”—Rosa, wo ko Colômbia.
Va Filipoi 4:13: “Momo kovina viosi ñuete ongusu mekonda lia una o nyĩha unene.”
“Nda kũlĩhĩle okuti sia kuatele ongusu yoku yula ocituwa coku sipa loku fenya olodroga lika wange. Omo liaco, nda likutilila ku Suku kuenje eye wa nyĩha ongusu nda sukilile.”— Patrizia, wo ko Itália.
Ovolandu vomanu va tẽla oku yula ocituwa coku sipa loku fenya olodroga lekuatiso Liembimbiliya
Joseph Ehrenbogen eye wa kulila vimbo limue okuti omanu vaco olonganga kuenda wa fetika oku nyua ovina vi koluisa loku sipa. Eye nda wa fa omo liolodroga. Pole Joseph wa tanga ocisonehua cimue Vembimbiliya co kuatisa oku tava okuti wa laikele oku linga apongoloko. Kũlĩhĩsa ulandu waye vocipama losapi hati, “Nda Lilongisa oku Sumbila Akãi Lame Muẽle.”
Dmitry Korshunov olonjanja vialua wa likolisilako oku yula ocituwa caye. Tala ovideo losapi hati, ‘Omuenyo wa Ñumile,’ oco o limbuke eci co kuatisa oku kuata ekalo liwa.
Anga hẽ Embimbiliya li pisa oku sandiliya ekuatiso liolondotolo oco o siepo ocituwa coku sipa loku fenya olodroga?
Sio. Embimbilia li popia okuti, “omanu va kuete uhayele ka va sukila ondotolo, te vana va vela.” (Mateo 9:12) Ocisoko ci tukuiwa hati, Instituto Nacional de Abuso de Drogas, co ko Estados Unidos, ca lekisa okuti: “Olodroga vi koka uvei kuenda oku siapo ocituwa caco, ci sukila alikolisilo alua.” Ocili okuti, ekuatiso lia Suku lia velapo calua okuti, alikolisilo omunu a linga a sule. Ndaño ndoco, pokati komanu valua va yula ocituwa caco poku kuama olonumbi Viembimbiliya, va sukililevo ekuatiso liolondotolo.c Ndeci ulume umue o tukuiwa Allen wa popia hati: “Eci nda liwekapo oku nyua, nda enda oku yeva evalo lialua. Noke nda limbuka okuti, ndaño nda kala oku kuatisiwa konepa yespiritu nda sukililevo ekuatiso liolondotolo.”
Anga hẽ Embimbiliya li pisa oku nyua olodroga ndovihemba?
Sio. Embimbiliya li popia eci catiamẽla kovina vi koluisa poku tata uhayele ale oku tepulula evalo liomunu umue o kasi oku fa. (Olosapo 31:6; 1 Timoteo 5:23) Pole, catiamẽla kovina vi koluisa, olodroga va siata oku talavaya lavio oco vi kuatise kevalo, vi kuete esilivilo. Omo liaco, ci kuete esilivilo lialua oku lavulula ohele yaco kuenda oku kuata utate poku talavaya lovihemba vieciwa lolondotolo.—Olosapo 22:3.
a Ndaño okuti ocipama eci ca tiamisiwila koku yula ocituwa coku sipa loku fenya olodroga, olonumbi Viembimbiliya vi pondola oku kuatisa vana va kasi oku liyaka lovitangi vikuavo, oku kongelamo ovina vi koluisa, akaya, oku lia calua, olomapalo vioku nganyala olombongo, oku tala omanu va kasi epolõla haivo va linga ukahonga, ale oku pesila otembo yalua vo internet.
b Onduko ya Suku Yehova. (Olosamo 83:18) Tala ocipama losapi hati: “Yehova Helie?”
c Ovitumãlo vialua vioku sakula, olosipitali kuenda ovipama via ngalãvaliwa vi pondola oku kuatisa. Omunu lomunu o sukila oku kũlĩhĩsa lutate kuenda oku nõla onjila a kuama yoku sakuiwa.—Olosapo 14:15.