Kala Ukuotõi Kuenda Ukuacili Ndeci Benaya

Benaya wa kala esualali limue ukuotõi wa pangele onepa kolohoka via Soma Daviti kuenda kolohoka via soma Salomone. Eye wa kala omõla wocitunda. Ovitunda kuenda va lewi ka va endaile kuyaki ndaño oku kuata kovimãleho viuyaki. Pole, Benaya lombili yalua wa enda oku panga onepa kovoyaki a Yehova kuenda wa lekisa utõi walua. Ndeci, eye wa ponda ohosi yimue pocisimo cimue covava kuenda wa liyaka lesualali limue ocindululu. Daviti wa kolelele calua ku Benaya okuti wo nõla oco a linge usongui wolondavululi viaye.—2 Sam. 23:​20-23.

Eci Avisalome kuenda Adoniya va linga usuanji, Benaya wa amamako oku kala ukuacili ku Daviti. (2 Sam. 8:18; 15:18; 1 Olos. 1:8) Handi vali, eci Daviti a kuka, Benaya wa amamako oku kala ukuacili kokuaye poku kuatisa Salomone oku linga osoma. (1 Olos. 1:​32-40) Benaya wa kala ukuacili ku Yehova kuenda kolonumiwa Viaye, ndaño ceci omanu vamue ka va endaile oku kala vakuacili.

Etu tu sukilavo oku kala vakuotõi oco tu tẽle oku liyaka lunyãli wetu Satana la vana vo setukula kuenda oku amamako oku ambata omuenyo umue u likuata lolonumbi via Yehova. (Va Efe. 6:11; 1 Pet. 5:​8, 9) Omo liaco, ndaño okuti omanu vamue va liwekapo oku vumba Yehova, etu tu sukila oku amamako oku kakatela ku Yehova loku kolela okuti, eye o ka tu sumũlũisa.—2 Sam. 22:26.