Lilongisa Oku Lekisa Esumbilo Liocili ku Suku Ndeci Ovadia

Ovadia wa kala kalei konjo ya Soma yimue ondingãivi o tukuiwa Ahava. Soma Ahava, wa ecelela okuti evĩho lia kokiwa omo liefendelo lia Baale, li lisanduila kolonepa viosi vio Isareli. Pole, Ovadia wa lekisa esumbilo liocili ku Suku, “tunde vutila waye.” (1 Olos. 18:​1-13) Omo liaco, eci nasoma Isevele a tuma oku ponda ovaprofeto vosi va Yehova, Ovadia wa kũlĩhĩle okuti wa sukilile oku lekisa utõi loku linga cimue oco a va kuatise. Oku salamisa uprofeto umosi ca kokele ale ohele, pole, Ovadia wa salamisa eci ci soka 100 kovaprofeto va Yehova kuenda wa va ĩha okulia ndaño okuti kua kala onjala yalua kofeka yaco! Sokolola ndomo ka ca lelukile ku Ovadia oku ci linga lonjila yimue okuti, ka limbukiwa lovaprofeto vesanda vana va enda oku kuatisa soma Ahava kuenda nasoma Isevele.—1 Olos. 18:19.

Nye tu lilongisila kulandu wulume waco wa sumbilile Suku? Ndaño okuti Ovadia wa kuatelele usumba soma Ahava, pole, eye wa sumbilile calua Suku. Kuenje, eci co kuatisa oku kuata utõi woku kapa kohele omuenyo waye oco a teyuile vamanjaye. Cimuamue haico okuti, tu sukilavo oku lilongisa oku lekisa esumbilo liocili ku Yehova ca piãla enene nda kocitumãlo tu sangiwa upange wetu wa tatekiwa. Ocituwa caco ci ka tu ĩha ongusu tu sukila, oco tu kuatise vamanjetu va kasi oku liyaka lovitangi.