Setukula Umbombe wa Yehova

1. Nye ci ku komõhisa konjila ndomo Yehova a lekisa ocituwa cumbombe?

ANGA hẽ eci o sokolola kolombiali violuali lulo, o popia okuti ovo va kuete ocituwa cumbombe? Citava okuti sio. Pole, Yehova ukuonene wosi, o lekisa ocituwa cumbombe. (Osa. 113:​5-8) Yehova eye omunu wa velapo koku lekisa umbombe. Eye lalimue eteke a lekisa epela. Vocipama cilo, tu konomuisa ovina vikuãla vi panga onepa kocituwa caco ca Yehova kuenda ndomo ovina viaco vi lekisa okuti eye omunu umue embombe. Tu konomuisavo ndomo Yesu a setukula ocituwa cumbombe ca Isiaye. Poku konomuisa ovina viaco, ci ka tu kuatisa oku kuata ukamba uwa la Yehova kuenda oku setukula ocituwa caye cumbombe.

YEHOVA WA LIKAPELAKO OKU TU YEVELELA

2. Nye Osamo 62:8 yi situlula catiamẽla ku Yehova? (Talavo ociluvialuvia .)

² Ocili okuti ka ca lelukile oku sapela lomunu umue ukuepela. Omanu vaco, ka va siatele oku tata ciwa vakuavo, momo va sima okuti va velapo kuenje omanu va siata oku va yuvula. Ocili okuti Yehova wa litepa calua lomanu vaco! Omo okuti Isietu wo kilu omunu umue embombe, eye o yongola okuti tu likutilila kokuaye loku u sapuila ovina viosi vi tu sakalaisa. (Tanga Osamo 62:8.) Ndeci isia umue wa kapako omãla vaye olonjanja viosi a yongola oku kũlĩha ekalo liavo, cimuamue haico okuti, Yehova wa likapelakovo oku yevelela olohutililo viafendeli vaye. Eli olio esunga lieci eye a tumila oku soneha Vembimbiliya, vialua pokati kolohutililo viaco. Eci ci lekisa okuti Yehova o yongola oku yevelela olohutililo vietu. (Yeh. 10:​12-14; 1 Sam. 1:​10-18) Pole, nye ci popiwa nda pamue tu liyeva okuti ka tu pondola oku likutilila ku Yehova omo liakandu tua linga?

3. Momo lie tu kolelela okuti Yehova o yongola okuti tu likutilila kokuaye olonjanja viosi?

³ Tu pondola oku likutilila ku Yehova ndaño ceci tu liyeva okuti ka tu sesamẽla ocisola caye. Momo lie tu popela ndoco? Momo, Yesu volusapo ata luatiamẽla komõla ocisandui, eye wa sokisa Yehova nda Isia umue ukuacikembe okuti, omõlaye una wa lingile akandu alua, wa liyeva okuti ka sesamẽla ongecelo ya isiaye. Pole, nye isia yaco a linga eci omõlaye a tiuka konjo? Yesu wa popia okuti, eci isia a mola omõlaye ocipãla, “wa lupukila kokuaye, wo pupola kapepe loku u sipula locisola.” (Luka 15:​17-20) Yehova o sokisiwa la isia yaco. Eci eye a yevelela olohutililo viomanu vana va sumua omo liekandu limue va linga ale omo liasakalalo, umbombe waye u vetiya oku va yevelela lutate. (Asiõ. 3:​19, 20) Eye o kuete ohenda yalua kuenje ndeci isia una wa tukuiwa volusapo a lupukila komõlaye, Yehova o lekisa ocisola kokuavo kuenda o va lembeleka. (Isa. 57:15) Yehova wa siata oku ci linga ndati? Olonjanja vialua eye o ci linga pocakati cakulu vekongelo, epata lietu okuti Olombangi Via Yehova kuenda pocakati cavamanji vakuavo. (Tia. 5:​14, 15) Yehova o tu ĩha ekuatiso liaco momo o yongola okuti, tu kuata ukamba uwa laye.

4. Momo lie omanu va lianjele poku kala la Yesu?

⁴ Yesu o setukula Isiaye. Ndeci Isiaye, Yesu wa siatavo oku lekisa ocituwa cumbombe. Omo liaco, eci eye a kala palo posi, omanu va lianjele poku kala laye. Ovo ka va kuatele usumba woku linga apulilo kokuaye. (Mar. 4:​10, 11) Eci Yesu a enda oku linga apulilo atiamẽla kocina cimue, omanu va enda oku situlula ovisimĩlo viavo. (Mat. 16:​13-16) Handi vali, eci va enda oku lueya, ka va kuataile usumba wokuti Yesu o va pisa, momo ovo va kũlĩhĩle okuti Yesu wa kala ukuahenda, ukuacikembe kuenda ukuepandi. (Mat. 17:​24-27) Omo okuti Yesu wa setukula ciwa Isiaye, ca kuatisa olondonge viaye oku kũlĩha ciwa Yehova. (Yoa. 14:9) Ovo va lilongisa okuti, ca litepa lasongui vetavo vo kotembo yaco okuti va kala vakuepela kuenda ka va kapeleko omanu, Yehova omunu umue o lekisa umbombe kuenda o yongola okuti ovo va kala akamba vaye.

5. Momo lie ocituwa cumbombe ci koka okuti omanu vakuavo va lianja letu?

⁵ Tu setukula ndati Yehova? Eci tu lekisa ocituwa cumbombe, ci ka leluka komanu oku linga ukamba letu kuenda oku vangula letu. Nda ka tua lekisile ocituwa cumbombe, tu ka kuatela onya omanu vakuavo, tu ka sima okuti etu tua velapo vakuavo kuenda tu ka yuvula oku va ecela eci va tu sumuisa. Momo ovituwa viaco, vi koka okuti omanu va yuvula oku kala letu. Pole, ocituwa cumbombe ci tu kuatisa oku lekisa ocikembe, epandi kuenda ci tu kuatisavo oku ecela vakuavo lutima wosi. Ovituwa viaco vi koka okuti omanu vakuavo va lianja poku kala letu. (Va Kol. 3:​12-14) Handi vali, akulu vekongelo va sukila oku likolisilako oco okuti vamanji vosi vekongelo va lianja kuenda ka va kuata usumba woku sapela lavo. Pole oco va ci linge, va sukila oku kuata ocituwa coku kala lavamanji. Eci ci lekisa okuti, akulu vekongelo va sukila oku likolisilako oku enda enda kolohongele viekongelo Vonjango Yusoma, okuti ka va ci lingi pocakati covideokoferencia nda okuti ka kuli esukila liaco. Olonjanja viosi eci ekalo liavo liecelela, ovo va talavaya kupange woku kundila konjo lanjo kumue lavamanji. Poku ci linga, ci ka koka okuti vamanji va kũlĩha ciwa akulu vekongelo kuenda va ka lianja oco va sapele lavo olonjanja viosi va sukila ekuatiso.

YEHOVA UKUESUNGULUKO

6-7. Lombolola ovolandu amue a lekisa ndomo Yehova a tava apingilo afendeli vaye.

⁶ Omanu valua vakuepela, ka va tẽla oku linalisa lomanu vakuavo. Pole, Yehova omo okuti omunu umue embombe, eye o lekisa esunguluko kuenda o pondola oku pongolola onjila a nõla ndaño okuti wa velapo omanu kolonepa viosi. Kũlĩhisa ndomo eye a tata Miriama mukãi wa Mose. Miriama kumue la Arone, va sokola Mose una wa kala onumiwa ya Yehova. Ocituwa caco, ca lekisa okuti Miriama ka kaile oku lekisa esumbilo ku Yehova. Omo liaco, onyeño ya Yehova ya wengukila Miriama kuenje eye wa kuatiwa lovilundu. Pole, eci Arone a pinga ku Mose oco a kuatise Miriama, Mose wa livondela ku Yehova oco a sakule Miriama. Nye Yehova a linga? Omunu umue ukuepela nda ka pongoluile ocisimĩlo caye. Pole Yehova wa tetulula ocitangi caco lonjila yimue ya litepa. Omo okuti eye omunu umue embombe, wa yevelela Mose kuenda wa sakula Miriama.—Ate. 12:​1-15.

⁷ Yehova wa lekisavo umbombe konjila ndomo a tata Soma Esekiya. Yehova wa tumile uprofeto Isaya oco a sapuile soma Esekiya okuti wa laikele oku fa. Esekiya loku lila, wa livondela ku Yehova oco o sakule kuenje Yehova lohenda yalua, wa tava epingilo liaye poku vokiya komuenyo waye eci ci soka 15 kanyamo. (2 Olos. 20:​1, 5, 6) Eci ci lekisa okuti, Yehova o lekisa ohenda komanu kuenda omo liocituwa cumbombe, wa likapelako oku va yevelela.

8. Ovolandu api a lekisa okuti Yesu ukuesunguluko? (Mar. 3:​1-6)

⁸ Yesu o setukula Isiaye. Yesu eci a kala palo posi, olonjanja viosi wa enda oku lingila ovina viwa omanu vakuavo. Ndeci, eye wa enda oku lekisa esunguluko poku sakula omanu vocasapalo, okuti ocina cimue ca enda oku pisiwa lasongui vetavo vo kotembo yaco. (Tanga Marko 3:​1-6) Toke koloneke vilo, Yesu wa siata oku lekisa esunguluko kuenda ohenda poku songuila akongelo. Ndeci, eci umue vekongelo a linga ekandu limue linene, Yesu o lekisa epandi komunu waco poku eca epuluvi kokuaye, oco a linga apongoloko kovituwa viaye.—Esit. 2:​2-5.

9. Tu pondola ndati oku lekisa esunguluko kovisimĩlo kuenda kovilinga vietu? (Talavo oviluvialuvia.)

⁹ Tu setukula ndati Yehova? Tu sukila oku setukula Yehova poku lekisa esunguluko kovisimĩlo kuenda kovituwa vietu. (Tia. 3:17) Ndeci, olonjali vina vi setukula Yehova koku lekisa esunguluko, ka va kisika okuti omãla vavo va linga ovina ka va tẽla oku linga. Yakoba wa lekisa ongangu yimue yiwa konjila ndomo a tata omãla vaye, ndomo ca lekisiwa kelivulu Liefetikilo 33:​12-14. Olonjali vina ambombe haevo vakuesunguluko, va sukilavo oku yuvula oku sokisa omõla umue lomõla ukuavo. Akulu vekongelo va sukilavo oku kala vakuesunguluko. Ndeci, ukulu umue wekongelo o yuvula oku kakatela kovisimĩlo viaye muẽle, pole, eye o ka tava kuenda o ka kuatisa konjila yimue ya taviwa lakulu vakuavo vekongelo. (1 Tim. 3:​2, 3) Kuenda vosi yetu, tu sukila oku seteka oku kuata elomboloko lieci vakuetu va sima catiamẽla kocina cimue, ndaño okuti tu kuete ocisimĩlo cimue ca litepa. (Va Rom. 14:1) Omo liaco, vosi vekongelo, va sukila oku likolisilako oco “esunguluko liavo li kũlĩhĩwe lomanu vosi.”—Va Fil. 4:5.

YEHOVA UKUEPANDI

10. Yehova wa siata oku lekisa ndati epandi?

¹⁰ Pamue wa limbuka okuti omanu vakuepela ka va sole oku kevelela. Ovo ka va kuete epandi. Pole, ca litepa lomanu vaco, Yehova ukuepandi kuenda wa velapo koku lekisa ocituwa caco! Ndeci, koloneke via Noha, Yehova wa eca esapulo liokuti wa laikele oku talamẽla eci ci soka 120 kanyamo osimbu ka kunduile olondingãivi. (Efet. 6:3) Omo liaco, Noha wa kuatele otembo yoku pindisa ciwa omãla vaye kuenda oku tunga ocimbaluku lekuatiso liepata liaye. Vepuluvi likuavo, ungelo umue wa Yehova wa yevelela lepandi osimbu Avirahama a kala oku linga apulilo atiamẽla kenyõleho lio Sodoma kuenda o Gomora. Omunu umue ukuepela, pamue nda wa popia ndoco: ‘O sima hẽ okuti sia kũlĩhĩle eci ndi kasi oku linga?’ Pole, ungelo waco wa setukula Yehova kuenda wa lekisa epandi ku Avirahama.—Efet. 18:​20-33.

11. Ndomo ca tangiwa kukanda 2 Petulu 3:​9, momo lie Yehova a siatela oku lekisa epandi koloneke vilo?

¹¹ Yehova lumbombe, wa siatavo oku lekisa epandi koloneke vilo. Eye o kasi oku talamẽla otembo a sokiya oco a nene esulilo. Momo lie a kasilili oku lekisa epandi? “Momo ka yongola okuti umue o nyõliwa, puãi, o yongola okuti vosi va likekembela.” (Tanga 2 Petulu 3:9.) Anga hẽ epandi Yehova a siata oku lekisa lielivova? Sio! Momo omanu valua vakuavitima via sunguluka, va kasi oku kuata ukamba laye. Kuenda vosi yetu tu lavoka okuti omanu valua handi va ka ci linga. Pole, Yehova ka ka lekisa epandi liaco otembo ka yi pui. Ndaño okuti eye o sole omanu, pole, ka ka ecelela okuti ovo vamamako oku linga ovina va yongola. Eye o ka malako evĩho liosi otembo ka yi pui.—Hav. 2:3.

12. Yesu wa siata oku setukula ndati epandi lia Yehova?

¹² Yesu o setukula Isiaye. Yesu vokuenda kuanyamo alua, wa siata oku setukula epandi lia Yehova. Eye wa mola Satana oku sandeka ovohembi atiamẽla ku Yehova kuenda kafendeli vaye vakuekolelo. (Efet. 3:​4, 5; Yovi 1:11; Esit. 12:10) Yesu wa siatavo oku mola omanu valua oku tala ohali. Sokolola onjongole eye a kuete ‘yoku nyõla ovilinga Vieliapu!’ (1 Yoa. 3:8) Nye ca siata oku kuatisa Yesu oku kevelela lepandi toke eci Yehova a ka eca kokuaye omoko yoku kundula ovilinga viosi Vieliapu? Esunga limue lieli liokuti, Yesu omunu umue embombe. Eye wa kũlĩha okuti Yehova eye o kuete omoko yoku nõla otembo a ka malako evĩho.—Ovil. 1:7.

13. Yesu wa lekisa ndati epandi kovapostolo vaye kuenda momo lie?

¹³ Yesu eci a kala palo posi, wa lekisavo epandi kovapostolo vaye. Ndeci, eci ovapostolo vaye va lihoya olonjanja vialua catiamẽla komunu wa velelepo pokati kavo, Yesu ka va temẽlele. Pole, wamamako oku lekisa epandi. (Luka 9:46; 22:​24-27) Eye wa kolelele okuti vokuenda kuotembo, va laikele oku linga apongoloko. Anga hẽ ove wa lingile ale ekandu limue olonjanja vialua? Nda oco, ku pandula hẽ omo lioku kuata Osoma yimue embombe haeye ukuepandi?

14. Nye ci ka tu kuatisa oku lekisa epandi?

¹⁴ Tu setukula ndati Yehova? Oco tu sokolole kuenda oku kuata ovituwa ndevi via Yehova, tu sukila oku lilongisa oku kuata “ovisimĩlo ndevi via Kristu.” (1 Va Kor. 2:16) Nye ci ka tu kuatisa oku kuata ovisimĩlo ndevi via Kristu? Onjila yimue ya velapo, oku tanga olonjanja viosi ovolandu atiamẽla komuenyo wa Yesu a sangiwa Vavanjeliu. Noke, tu sukila oku sanda otembo yoku sokolola lutate kovina Yesu a linga kuenda esunga lieci a ci lingila. Handi vali, tu sukilavo oku pinga ku Yehova oco a tu kuatise oku kala ambombe kuenda vakuepandi ndeci Yesu. Osimbu tu kuata ovisimĩlo ndevi via Kristu, tu ka tẽla oku setukula ciwa Yehova poku kala vakuepandi lavakuetu kuenda letu muẽle.—Mat. 18:​26-30, 35.

YEHOVA WA KAPAKO CALUA AMBOMBE

15. Tukula ovolandu amue a lekisa okuti Yehova o sole omanu ambombe. (Osamo 138:6)

¹⁵ Tanga Osamo 138:6. Yehova okuti eye Fũ kilu lieve liosi, wa kapako calua omanu va lekisa ocituwa cumbombe! Tu kũlĩhĩsi ovolandu omanu vamue ambombe vo kosimbu okuti, Yehova wa va kapeleko calua. Citava okuti vamue pokati kavo ka tua va kũlĩhĩle ciwa, pole, ulandu wavo u sangiwa Vembimbiliya. Ndeci, Yehova wa vetiya Mose oku soneha onduko yupika umue o tukuiwa Devora. Eye wa kala upika umue wa koleliwile wa talavaya konjo ya Isake kuenda konjo ya Yakoba vokuenda kueci ci soka 125 kanyamo! Ndaño okuti ka tua kũlĩhĩle ovina vialua viatiamẽla kukãi waco ukuekolelo, pole, Yehova wa vetiya Mose oku soneha Vembimbiliya etosi limue li lekisa okuti eye wa soliwile calua. (Efet. 24:59; 35:8 etosi) Handi vali, noke lianyamo alua, Yehova wa nõla Daviti ukuenje umue wa kala ungombo, oco a linge osoma ya va Isareli. (2 Sam. 22:​1, 36) Eci Yesu a citiwa, Suku wa tuma ovangelo kocimunga cimue cangombo kuenda wa eca kangombo vaco esumũlũho lioku kala omanu vatete oku kũlĩha okuti Mesiya wa citiwila ko Beteleme. (Luka 2:​8-11) Kuenda eci Yosefe la Maria va ambata Yesu vonembele, Yehova wa eca esumũlũho komanu vavali va kuka okuti Simeone la Hana, oco va mole omõlaye. (Luka 2:​25-30, 36-38) Ovolandu aco, a lekisa okuti “ndaño Yehova wa tungila kilu, eye o lete omunu embombe!”

16. Yesu wa setukula ndati onjila ndomo Yehova a tata omanu?

¹⁶ Yesu o setukula Isiaye. Ndeci Isiaye, Yesu wa kapeleko calua omanu ambombe. Eye wa longisa ocili catiamẽla Kusoma wa Suku komanu “vaño haivo ka va longisiwile.” (Ovil. 4:13; Mat. 11:25) Yesu wa sakulavo omanu vana va kala oku vela kuenda wa ci linga lonjila yimue yi lekisa okuti ovo va soliwile kuenda va sumbiwile. (Luka 5:13) Handi vali, Yesu kuteke wa sulako osimbu ka file, wa sukula olomãhi viovapostolo vaye okuti, upange umue wa enda oku lingiwa lika lapika. (Yoa. 13:5) Kuenda osimbu eye ka endele kilu, wa eca kolondonge viaye viosi oku kongelamo etu, esumũlũho lioku linga upange umue wa velapo wokuti, oku kuatisa omanu vakuavo oku kuata omuenyo ko pui.—Mat. 28:​19, 20.

17. Tu lekisa ndati okuti tua kapako omanu vosi? (Talavo ociluvialuvia.)

¹⁷ Tu setukula ndati Yehova? Tu lekisa okuti tua kapako omanu vosi poku va kundila olondaka viwa, ndaño va tunda kovitumãlo via litepa ale vakuekova a litepa. Handi vali, tu lekisa okuti tua kapako calua vamanjetu poku va tenda okuti va velapo etu tu sule, ndaño okuti tu kuete ovoloño ale ovikele vialua. (Va Fil. 2:3) Omo liaco, Yehova o sanjuka calua eci lumbombe ‘tu eca enanga liatete’ koku lekisa esumbilo komanu vakuavo, ci kaile kolonepa evi ale kolonepa vikuavo.—Va Rom. 12:10; Sof. 3:12.

18. Momo lie o yonguila oku setukula ocituwa cumbombe ca Yehova?

¹⁸ Eci o likolisilako oku setukula umbombe wa Isietu wo kilu ukuacisola, ci ka leluka kokuove oku kapako omanu vakuavo, oku kala ukuesunguluko kuenda ukuepandi. Handi vali, ci ka ku kuatisavo oku lekisa ocisola kuenda esumbilo komanu vakuavo. Omo liaco, ivaluka okuti eci o likolisilako oku setukula ciwa Suku yetu okuti omunu umue embombe, o ka soliwa calua laye!—Isa. 43:4.