Kuata Ombembua Ndaño Luyaki Kuenda Ungangala
Gary okuti wa kala esualali wa popia hati: “Osimbu sia fetikile oku lilongisa Embimbiliya, ame sia kũlĩhĩle esunga lieci mulo voluali mua kalela ungangala walua, ekambo liesunga kuenda ovitangi vikuavo. Pole cilo, nda sanga ombembua. Nda kũlĩha okuti Yehova Suku, o ka pongolola oluali oco lu kale ocitumãlo cimue ca kolapo.”
Gary hayeko lika wa kuatisiwa. Tu kũlĩhĩsi omanu vakuavo va kuatisiwa Lembimbiliya.
CECI EMBIMBILIYA LI POPIA: “Ove uwa A Yehova, kuenda olonjanja viosi wa likapelako oku ecela.” —Osamo 86:5.
NDOMO CO KUATISA: “Ocinimbu eci, ca ñuatisa oku limbuka okuti, Yehova ukuahenda. Nda kũlĩha okuti eye wa ngecela ndaño okuti kosimbu nda panga onepa kuyaki.” — Wilmar, wo ko Kolombia.
CECI EMBIMBILIYA LI POPIA: “Ndi lulika ovailu okaliye longongo yokaliye; kuenda ovina viosimbu ka vi ka ivalukiwa vali, ndaño oku iya vali kutima.”—Isaya 65:17.
NDOMO CO KUATISA: “Ame nda siata oku liyaka locitangi cesumuo omo liovina nda mola kuyaki. Pole ocinimbu eci ci ndi ivaluisa okuti, ndopo Yehova o ka malako ovisimĩlo viosi vĩvi ndi kuete. Ovitangi viaco ka vi ka kala vali vutima ale vovisimĩlo viange. Eci ocina cimue ci komõhisa!”—Zafirah, wo ko Estadus Unidus.
CECI EMBIMBILIYA LI POPIA: “Koloneke viaye ukuesunga o ka telẽha, kuenda ombembua yi ka kala kuosi toke eci ka ku kala vali osãi.” —Osamo 72:7.
NDOMO CO KUATISA: “Olonjanja vialua ndi sokolola kolondaka evi. Ndopo uyaki lovitangi vi kokiwa luyaki vi ka pua kuenda ka tu ka lisakalaisa vali loku kolapo kuomanu vana tu sole.”—Oleksandra, wo ko Ukrania.
CECI EMBIMBILIYA LI POPIA: “Ovivimbi viove vi ka kala lomuenyo. . . . Pasuki kuenda kaluki lesanju, ene wa tungi voneketela!”—Isaya 26:19.
NDOMO CO KUATISA: “Valua vakuepata liange, va pondiwa eci omanu vakuacikoti cikuavo va kala oku ponda vosi va kuacikoti cange. Pole ocinimbu eci, ci nyĩha ekolelo liokuti ndi ka va mola vali. Ndi lavoka lesanju oku yeva olondaka viavo, eci ovo va ka pinduiwa!”—Marie, wo ko Ruanda.
CECI EMBIMBILIYA LI POPIA: “Vokatembo kaño, olondingaĩvi ka vi ka kalako vali. . . . Pole, ambombe va ka piñala ilu lieve, kuenda va ka sanjukila ombembua yalua.” —Osamo 37:10, 11.
NDOMO CO KUATISA: “Ndaño okuti uyaki wa pua, handi kuli ekambo liesunga kuenda omanu vãvi. Ovinimbu evi, vi ndi pamisa calua. Yehova o lete kuenda o kuete elomboloko liovitangi viange. Eye wa likuminya okuti, ndopo o ka malako ovitangi viosi kuenda lalimue eteke tu ka vivaluka vali.”—Daler, wo ko Tajikistão.
Omanu va tukuiwa vorevista yilo, va kasi pokati Kolombangi vialua Via Yehova voluali luosi okuti, va kuatisiwa Lembimbiliya oku sanga ombembua. Ovo va lilongisa oku yula olonepepele omo liakova a litepa, olofeka via litepa, ovikoti kuenda olonepele vikuavo via siata pokati komanu. (Va Efeso 4:31, 32) Olombangi Via Yehova ka vi pangi onepa kopulitika kuenda va yuvula oku panga onepa kungangala. —Yoano 18:36.
Olombangi Via Yehova via siatavo oku kuatisiwa locisola va li kuetele pokati la vamanji voluali luosi. (Yoano 13:35) Ndeci, Oleksandra wa sukilile oku tilila kofeka yikuavo la manjaye ukãi omo liuyaki. Eye wa popia hati: “Eci tua pĩtila kongave yofeka, ocina catete tua mola, vamanji vo pocitumãlo va kala oku tu talamẽla oco va tu tambule. Omo liekuatiso liavo, ca lelukile kokuetu oku kala kofeka yaco ndovingendeyi.”
Tu ku laleka oku enda kolohongele vietu, kuna tua siata oku lilongisa catiamẽla kesapulo liombembua Liembimbiliya kuenda ndomo tu ci kapako. Iñila vo jw.org oco o sange onjango yusoma ocipepi lonjo yove ale oku pinga elilongiso limue Liembimbiliya li lingiwa ocali Lombangi yimue ya Yehova, vombrochura Sanjukili Omuenyo Otembo ka yi Pui!