Yesu o Kuatiwa

Yesu kuenda ovapostolo, va yoka Ondamba Kedrone oku enda Komunda yo Oliveira. Eci ca kala vokati kuteke okuti osãi yi kasi ongalo. Eci va pitĩla vocumbo co Gesemane, Yesu wa va sapuila hati: “Siali palo kuenda amamiko oku lavulula.” Noke vocumbo, Yesu wamela naito kovaso kuenje wa kekama kolongolo. Lesakalalo lialua eye wa likutilila ku Yehova hati: “Ocipango cove ci lingiwe.” Kuenje Yehova wa tuma ungelo umue oco a kolise Yesu. Eci Yesu a tiuka, wa sanga okuti katatu kavo va kala oku pekela. Eye wa popia hati: ‘Pasuki! Yilo hatemboko yoku pekela! Owola yi kasi ocipepi okuti ame ngeciwa peka liovanyãli vange.’

Noke Yuda wa pitĩla, weya lowiñi walua wambata olosipata lolombueti. Eye wa kũlĩhĩle ocitumãlo Yesu a kala momo olonjanja vimue va endaile vocumbo caco. Yuda wa sapuilile asualali okuti, o ka eca ondimbukiso kokuavo oco ovo va limbuke nda helie Yesu. Eye wamela ku Yesu kuenje wa popia hati: ‘Kalunga, Ulongisi,’ kuenda wo sipula. Yesu wa popia hati: ‘A Yuda, o kasi oku makula lesipulo?’

Yesu wa talama kovaso owiñi kuenje wa va pula hati: “Helie vu kasi oku sanda?” Ovo va tambulula vati: “Yesu u Nasara.” Noke Yesu wa va sapuila hati: “Ame,” kuenje alume vaco vamela konyima kuenda va kupukila posi. Noke Yesu wa va pula vali hati: “Helie vu kasi oku sanda?” Ovo va tambulula vali vati: “Yesu u Nasara.” Yesu wa va sapuila hati: ‘Ndo sapuili ale okuti ame. Pole, ovapostolo vange va ende.’

Eci Petulu a mola ovina via kala oku pita, wa pola osipata kuenje wa teta etũi lia Maliko ukuenje wocitunda cinene. Pole, Yesu wa lamba ketũi liulume waco kuenje wo sakula. Noke wa sapuila Petulu hati: ‘Somẽha osipata yove vocilalo cayo. Nda ove o yaka losipata, o fa losipata.’ Asualali va kuata Yesu kuenda va kuta ovoko aye kuenje ovapostolo va tila. Noke owiñi wambata Yesu ku Anasi ocitunda ca velapo. Anasi wa sombisa Yesu kuenje wo tuma konjo ya Kayafa Ocitunda Cinene. Pole, nye ca pita lovapostolo?