Ondalelo ya Sulako ya Yesu

Va Yudea va enda oku linga ocipito co Paskoa unyamo lunyamo keteke 14 yosãi ya Nisana. Ocipito caco ca enda oku va ivaluisa ndomo Yehova a va yovola kupika Kegito loku va tuala Vofeka Yohuminyo. Kunyamo 33 K.K., Yesu kumue lovapostolo vaye va linga ocipito co Paskoa vohondo yimue yinene kosapalalo yimue ko Yerusalãi. Kesulilo liondalelo, Yesu wa popia hati: ‘Umue pokati kene o laika oku makula.’ Olondaka viaco via kokela usumba ovapostolo, kuenje va pula Yesu vati: ‘Omunu waco helie?’ Yesu wa tambulula hati: ‘Omunu una ndĩha okambolo aka.’ Noke Yesu wa eca okambolo kamue ku Yuda Isikariote. Vepuluvi liaco, Yuda wa votoka kuenje wa tunda vohondo.

Noke, Yesu wa likutilila, wa tikula ombolo kuenje wa yi timbola loku yeca kovapostolo va supapo. Eye wa popia hati: ‘Li ombolo eyi. Oyo yi lomboloka etimba liange ndi laika oku eca kokuene.’ Noke Yesu wa linga ohutililo yatiamẽla kovinyu, yu wa yeca kovapostolo vaye. Eye wa popia hati: ‘Nyui ovinyu eyi. Oyo yi lomboloka osonde yange ndi laika oku eca oco akandu a eceliwe. Ame ndu likuminyi okuti vu ka kala olosoma kumue lame kilu. Ci lingaingi anyamo osi oco vu njivaluki.’ Olondonge via Yesu, handi via siata oku liongolola anyamo osi vuteke waco. Ohongele yaco cilo yi tukuiwa hati, Ocipito Condalelo ya Ñala.

Noke yondalelo, ovapostolo va fetika oku lihoyisa nda helie wa velelepo pokati kavo. Pole, Yesu wa va sapuila hati: ‘Una wa velapo pokati kene a linge umalẽhe, ndomunu o sule.’

‘Ene wakamba vange. Ame ndu sapuili ovina viosi Isiange a yongola okuti ndu vi lomboluili. Ndopo ngenda ku Isiange kilu. Ene vu siala kuenda omanu va ka limbuka okuti vulondonge viange omo liocisola vu likuetele pokati. Ene vu sukila oku lisola pokati ndeci ame ndo soli.’

Kuenje Yesu wa likutilila oku pinga ku Yehova oco a teyuile olondonge viaye viosi. Eye wa pinga ku Yehova oco a va kuatise okuti va talavaya kumosi kuenda va kuata lombembua. Wa likutililavo oco onduko ya Yehova yi sumbiwe. Noke Yesu kumue lovapostolo vaye va imba ovisungo viesivayo ku Yehova kuenje va tunda. Otembo ya kala oku pitĩla oco Yesu a kuatiwe.