Usoma Umue u ka Kala Otembo ka yi Pui

Vuteke umue Soma Nevukandesa wa lota onjoi yimue ka ya kũlĩhĩwile. Onjoi yaco yo sakalaisa calua okuti ka tẽlele oku pekela. Omo liaco, wa kovonga alume vaye vakualumbu kuenje wa va sapuila hati: ‘Ndi lomboluili onjoi yange.’ Ovo va popia vati: “Lombolola onjoi kakuenje vove kuenje tu ku sapuila elomboloko liaco.” Noke Nevukandesa wa popia lavo hati: ‘Eci nda lota ca ndimba! Nda ka wa ndi sapuilili onjoi kumue lelomboloko liaco, ene vu ka tetiwa vovinimbu kuenda olonjo viene vi linga olokalete viowiñi.’ Ovo va sapuila vali soma vati: “Soma a lombolole onjoi kakuenje vaye kuenje tu ku sapuila elomboloko liaco.” Eye wa popia hati: ‘Ene wa litavi pokati oco vu ndi sapuili ovina viuhembi. Ndi sapuili onjoi!’ Ovo va sapuila soma vati: “Eci soma a kasi oku pinga ca tĩla kuenda ka kuli omunu o tẽla oku ci sapuila soma.”

Nevukandesa wa temẽle calua kuenje wa handeleka okuti olonoño viosi vio vofeka vi pondiwa. Volonoño viaco, mua kongelele Daniele, Sadrake, Mesake kuenda Aved-Nego. Daniele wa pinga oco soma o wĩhe evelo lioku u lomboluila onjoi. Kuenje Daniele kumue lakamba vaye va likutilila ku Yehova loku pinga kokuaye oco a va kuatise. Nye Yehova a linga?

Vocinjonde cimue, Yehova wa lekisa ku Daniele onjoi ya Nevukandesa kuenda wo situluila elomboloko liaco. Keteke lia kuamamo Daniele wa enda kukuenje wa soma kuenje wo sapuila hati: ‘Ku ka ponde laumue pokati kolonoño. Ame ndi pondola oku lombolola onjoi ya soma.’ Ukuenje wa soma wa tuala Daniele ku Nevukandesa. Daniele wa sapuila soma hati: ‘Suku wa situluila Soma Nevukandesa ovina vi ka pita konepa ya sulako yoloneke. Onjoi yove yeyi: Utue wociñumañuma caco ca kala culu wa fina, onete yaco lovoko a kala opalata, imo lovikalo viaco via kala viosipi, ovolu aco a kala wutale kuenda olomãhi via kuatele olonepa vimue viutale, olonepa vikuavo viotuma. Osimbu wa kala oku vanja, ewe limue lia tetiwa komunda kuenda lia veta kolomãi viociñumañuma. Kuenje ociñumañuma ca nyanyõha ndoneketela kuenda cambatiwa lofela. Pole, ewe lina lia veta ociñumañuma lia linga omunda yimue yinene kuenje lia yukisa ilu lieve liosi.’

Omo liaco, Daniele wa popia hati: ‘Onjoi yove yi lomboloka ndoco: Usoma wove owo utue wulu. Opalata, usoma umue u keya noke yusoma wove. Noke ku keya usoma umue u ka kala ndosipi kuenje u ka viala oluali luosi. Usoma u ka kuamamo u ka pama ndutale. Oku sulako ku kala usoma umue u tepiwa, okuti olonepa vimue vi kõla ndutale kuenda olonepa vikuavo vi leñela ndotuma. Ewe lia linga omunda, li lomboloka Usoma wa Suku. Owo u ka nyõla ovosoma aco osi kuenda u kala muẽle hũ oloneke ka vi pui.’

Nevukandesa wa kekamẽla Daniele loku petamisa ocipala caye. Nevukandesa wa popia hati: ‘Suku yove wa situlula onjoi eyi kokuove. Ka kuli Osuku ya lisoka laye.’ Nevukandesa ka pondele Daniele, pole, wo lingisa usongui wolonoño viosi kuenda wa viala olofeka viosi vio ko Bavulono. O pondola hẽ oku limbuka ndomo Yehova a tambulula ohutililo ya Daniele?