Usoma Umue u Kasi Nduti Unene

Vuteke umue Nevukandesa wa lota onjoi yimue yi saluisa. Eye wa kovonga alume vaye olonoño oco vo sapuile elomboloko lionjoi yaco. Pole, lomue pokati kavo wa tẽla oku lombolola onjoi yaye. Noke, soma wa ci sapuila Daniele.

Nevukandesa wa sapuila Daniele hati: ‘Vonjoi yange nda mola uti umue. Uti waco wa kula calua, okuti wa pitĩla toke kilu. Owo wa ponduile oku molẽha kolonepa viosi vio kilu lieve kuenda wa kuatele amẽla a posoka lapako alua. Ovinyama via puyuka vulembo wayo kuenda olonjila via tunga ovianju vovianja viawo. Kuenje kilu kua tunda ungelo umue. Eye wa popia hati: “Timbuli uti, teti ovianja viaco. . . . Pole, sipo ocisingi lolombombo viaco posi kuenda ci kuti lovinunga viutale kuenda viosipi. . . . Utima waco womunu u pongoluiwe kuenje ci tambule utima wocinyama kuenda olotembo epanduvali vi ci lomboke. . . . Omanu va kasi lomuenyo va kũlĩha okuti, Fũ eye Ombiali vusoma womanu kuenda eca usoma waco komunu a yongola.”’

Yehova wa situluila Daniele eci onjoi yaco yi lomboloka. Eci Daniele a kuata elomboloko lionjoi, eye wa fetika oku kuata usumba. Eye wa popia hati: ‘A soma ndi yongola okuti onjoi yi tiamisiwila kovanyãli vove, pole, oyo yi tiamisiwila muẽle kokuove. Uti unene una wa tetiwa u lomboloka ove. Kusoma wove o tundako kuenda o ka lialia owangu ndovinyama viovusenge. Pole, omo okuti ungelo wa popia hati, sipo ocisingi lolombombo viaco, ove o laika vali oku linga osoma.’

Noke yoku pita unyamo umosi, Nevukandesa wa kala loku ñuala ñuala kilu lielombe liaye oku komõha o Bavulono. Eye wa popia hati: ‘Tali imbo eli linene ame nda tunga. Tali ndomo ndi kuete unene!’ Osimbu eye a kala oku vangula, kilu kua tunda ondaka yimue, ya popia yiti: “A Soma Nevukandesa! Cilo usoma wa ku upiwa.”

Vepuluvi liaco, Nevukandesa ka kuatele vali olondunge kuenje wa kala ndocinyama cimue co vusenge. Eye wa kisikiwa oku siapo elombe liaye kuenda oku ka kala lovinyama vio vusenge. Esinga lia Nevukandesa lia kula calua ndovonya ongonga kuenda olonjala viaye ndevi violonjila.

Noke yoku pita anyamo epanduvali, Nevukandesa wa kuata vali olondunge kuenda Yehova wo lingisa osoma yo ko Bavulono. Kuenje Nevukandesa wa popia hati: ‘Ame ndi sivaya Yehova, Soma yo kilu. Cilo nda limbuka okuti Yehova eye Ombiali. Eye o kapa kutito omanu vakuepela kuenda eca usoma komunu wosi a yongola.’