Oseteko Yimue ya Pita Komunda Karimele

Usoma wapata ekũi a va Isareli, wa kuatele olosoma vialua vĩvi, pole, Ahava wa piãlele koku linga ũvi. Eye wa kuelele ukãi umue wa kuatele ovituwa vĩvi haye wa enda oku fendela Baale. Onduko yukãi waco, Isevele. Ahava la Isevele va yukisile ofeka lefendelo lia Baale kuenda va ponda ovaprofeto va Yehova. Nye Yehova a linga? Eye wa tuma Uprofeto Eliya oco a ece esapulo limue ku Ahava.

Eliya wa lungula Soma Ahava okuti omo liocituwa caye cĩvi ka ku loki ombela ko Isareli. Vokuenda kueci ci pitahãla anyamo atatu, ovikũla ka via kulile kuenda omanu va kala onjala. Noke Yehova wa tuma vali Eliya ku Ahava. Soma Ahava wa popia hati: “Anga hẽ, ove una o kasi oku nena esakalalo lialua ko Isareli?” Eliya wa tambulula hati: ‘Hameko nda nena esakalalo lialua ko Isareli, pole, ove o kuete eko kumue lonjo ya isiove poku siapo ovihandeleko via Yehova loku kuama va Baale. Tu linga oseteko yimue. Kaliye kovonga va Isareli vosi oco veye kokuange Komunda Karimele.’

Omanu va liongoluila pamosi komunda. Kuenje Eliya wa popia hati: ‘Yeveleli. Nda Yehova eye Suku yocili u kuami; nda Baale u kuami! Ame ndi linga oseteko eyi. Ovaprofeto va Baale va soka 450 va sukila oku pongiya ocilumba cimue kuenda oku vilikiya osuku yavo kuenje ame ndi pongiyavo ocilumba cimue loku vilikiya Yehova. Osuku yi tambulula londalu yi ka lekisa okuti, Osuku yocili.’ Omanu va tava kondaka yaco.

Ovaprofeto va Baale va pongiya ocilumba cimue. Vokuenda kueteke liosi va vilikiya osuku yavo vati: ‘A Baale, tu tambulule!’ Pole, Eliya wa yola epembe Baale eci a limbuka okuti ka tambulula. Eye wa popia hati: ‘Kaluki lolukandi! Eye osuku yimue! Pamue wa pekela kuenda o sukila umue oco o pasule!’ Ekumbi lia iñila kuenda ovaprofeto va Baale vamamako oku vilikiya. Pole, ka kua kaile laumue wa va tambulula.

Eliya wa kapa ocilumba caye kilu liutala kuenda wa pesela ovava kolonepa viosi viutala. Kuenje wa likutilila hati: “A Yehova nambulule! Nambulule oco omanu ava va limbuke okuti, Yehova eye Suku yocili.” Vepuluvi liaco, Yehova wa tuma ondalu tunde kilu oco yi lie ocilumba. Omanu va kaluka vati: “Yehova eye Suku yocili!” Eliya wa popia hati: “Kuati ovaprofeto va Baale! Lomue pokati kavo ka ka puluke!” Keteke liaco, ci soka 450 kovaprofeto va Baale va pondiwa.

Eci elende limue litito lia molẽha kokalunga, Eliya wa sapuila Ahava hati: ‘Ehunguhungu liombela li kasi oku iya. Angiliya ekãlu liove kuende konjo.’ Ilu lia tekãva lalende, ofela ya sika kuenje ombela ya lua ya loka. Noke ocitenya ca pitĩla kesulilo. Ahava wa endisa ekãlu liaye lonjanga yalua. Lekuatiso lia Yehova Eliya wa lupuka lonjanga yalua okuti ekãlu ci sule! Anga hẽ ovitangi viosi via Eliya via pita? Tu ci konomuisa.