Usoma Umue wa Tepiwa

Osimbu Salomone a kala oku fendela Yehova, vo Isareli mua kala ombembua. Pole, Salomone wa kuelele akãi valua vo kolofeka vikuavo kuenda akãi vaco va enda oku fendela oviteka. Vokuenda kuotembo, Salomone wa pongoloka kuenda wa fetikavo oku fendela oviteka. Eci ca temisa Yehova. Eye wa sapuila Salomone hati: ‘O Isareli yi kopiwa kepata liove kuenje yi ka tepiwa volonepa vivali. Ocili okuti ndupa usoma kokuove, ndu weca ku umue pokati kakuenje vove kuenje epata liove li viala lika onepa yitito.’

Yehova wa tẽlisavo olondaka viaye volonjila vikuavo. Umue pokati kakuenje va Salomone okuti Yerevoama, wa kala oku linga ungende vetapalo eci a sanga Ahiya uprofeto. Ahiya wa tola ocikutu caye muẽle vovitetele 12 kuenje wa sapuila Yerevoama hati: ‘Yehova o laika oku tambula usoma wo Isareli peka liepata lia Salomone kuenda oku u tepa volonepa vivali. Tambula ekũi liovitetele momo o laika oku kala osoma yapata ekũi.’ Soma Salomone wa yeva eci catiamẽla kovina viaco kuenje wa yonguile oku ponda Yerevoama! Omo liaco, Yerevoama wa tilila Kegito. Vokuenda kuotembo Salomone wa fa kuenje omõlaye Rehovama wa linga osoma. Yerevoama wa limbuka okuti nda wa tiukila ko Isareli, ka kala vali kohele.

Akulu vo ko Isareli va sapuila Rehovama vati: ‘Nda wa tata ciwa omanu, ovo va ka pokola kokuove.’ Pole, akamba va Rehovama okuti amalẽhe, vo sapuila vati: ‘Ove o sukila oku kala ongangala lomanu! Eca kokuavo upange umue wa tĩla!’ Rehovama wa kuama elungulo liakamba vaye amalẽhe. Eye wa lekisa ungangala kuenje omanu ka va pokuile vali kokuaye. Ovo va vialeka Yerevoama ndosoma yapata ekũi, yina yeya oku kũlĩhĩwa okuti usoma wa va Isareli. Apata akuavo avali eya oku kũlĩhĩwa okuti usoma wo Yuda kuenje vamamako oku pokola ku Rehovama. Apata 12 a va Isareli kaliye a tepiwa.

Yerevoama ka yonguile okuti omanu vaye va enda ko Yerusalãi oco va ka fendele, momo o Yerusalãi ya kala oku vialiwa la Rehovama. Wa kũlĩha esunga liaco? Yerevoama wa kala lusumba wokuti ovo va ko yanduluka kuenje va ka kuatisa Rehovama. Omo liaco, eye wa tunga olonale vivali viulu kuenje wa sapuila omanu hati: “Ka ca lelukile kokuene oku lamanela ko Yerusalãi. A Isareli, eyi oyo o Suku yove.” Kuenje omanu va fetika oku fendela olonale viulu kuenda va ivalako vali Yehova.