Te ajwalil David la snaʼbey sba te Jehová sok ya smukʼulin yoʼtan. La skʼanbey koltayel kʼalal yak ta nutsel yuʼun te ajwalil Saúl. Kʼalal la yil te jakʼbot skʼop yuʼun te Jehová sok te koltayote, te David jich la yal: «Cuxul te Jehová» (Sal. 18:46). Te kʼalal jich la yale, ma jaʼuknax yak ta yalel te ay te Diose. Jun libro la yal te jaʼ yak ta yalbeyel skʼoplal te ya yakʼ smukʼul yoʼtan ta stojol te Jehová sok «te jaʼ kuxul Dios te ya skoltay te lum yuʼune». Te David la yil te bin-utʼil koltayot yuʼun te Jehová ta skuxlejal sok jich la schʼuunxan yoʼtan te kuxul te Jehová sok akʼbot yip yoʼtan yuʼun yakuk x-abatinxan ta stojol sok te yakuk yichʼxan ta mukʼ (Sal. 18:28, 29, 49). Teme ma xchʼay ta koʼtantik te jaʼ kuxul Dios te Jehová, ya skoltayotik yuʼun ya x-abatinotik ta stojol sok sbujtsʼ koʼtantik. Ya yakʼbotik yip koʼtantik yuʼun ya xkujch kuʼuntik te wokolil sok ya stijbotik koʼtantik yuʼun ya x-abatinotikxan ta stojol. Jaʼnix jich ya yakʼ te ya xnoptsajotikxan ta stojol. w24.06 20, 21 párr. 3, 4

¿Bin ya yakʼ jnoptik te carta te la stsʼibay te jpuk-kʼop Pablo ta stojol te tesalonicenseetik? Teme ay bin ya kaʼiytik te ma pajaluk sok te bin-utʼil jnopojtik ta Biblia ya skʼan ya stsajtay jbatik. Ta antigua Unión Soviética, te jkontrataktik la spukik jun carta —te la yalik te talemlaj ta stojol te Betel— te banti la yal te akʼa stukeltay sbaik te hermanoetik ta stojol te organización. Manchukme melel yilel te bin la yal te cartae, te hermanoetik te jun yoʼtan yakʼoj sbaik ta stojol te Jehová maba la schʼuunik. Melel la staik ta ilel te bin ya yal te carta maba pajaluk sok te bintik jnopojtike. Ta jkʼajkʼaleltik, te jkontrataktik jaʼnix jich ay ya stuuntesik te tecnología yuʼun ya schʼaytesbotik koʼtantik sok yuʼun ya skʼan ya xatotik. Ya skʼan ya jkanantay jbatik yuʼun «manchuk orauknax ya xjelon te lek snopojibal» kuʼuntik, jaʼ yuʼun ya skʼan ya kiltik ta lek te bin ya kaʼiytik sok te bin ya jkʼopontik te jaʼuk pajal sok te bin ya yal te organizacione (2 Tes. 2:2; 1 Juan 4:1). w24.07 12, 13 párr. 14, 15

Te bin mukʼ skʼoplal ya sta ta nopel spasel jtul ants winik jaʼ te ya yakʼ sba ta stojol te Jehová sok te ya x-och ta familia yuʼune. Ta melel, te Jehová jaʼ ya smulan te jichuk ya staik ta nopel spisil te ants winiketik. ¿Bin yuʼun? Jaʼ ya skʼan te yakuk yamigoinik sok te ya xkuxinik ta sbajtelkʼinal (Deut. 30:19, 20; Gál. 6:7, 8). Te Jehová maʼyuk machʼa ya suj yuʼun ya x-ichʼot ta mukʼ yuʼun, ta jujuntul te ants winiketik ya sta ta nopel te bin ya spasik. Pero, ¿bin ya xkʼot ta pasel kʼalal jtul j-abat yuʼun Dios te yichʼojix jaʼ ya spas tulan mulil? Teme maba ya sujtes yoʼtan, ya skʼan ya yichʼ lokʼesel ta congregación (1 Cor. 5:13). Manchukme jich-abi, te Jehová ya skʼan te yakuk sujtes yoʼtan sok spisil yoʼtan yuʼun ya sujt talel ta stojol. Jaʼ yuʼun, te Jehová la yakʼ ta lajel te sNichʼan yuʼun ya xjuʼ ya spasbey perdón te machʼatik ya sujtes yoʼtanik yuʼun te smulike. Te Jehová kʼax kʼuxotik ta yoʼtan, jaʼ yuʼun ya skʼan ya skoltay te jmulawiletik sok ya stijbey yoʼtan yuʼun ya sujtes yoʼtanik (Zac. 1:3; Rom. 2:4; Sant. 4:8). w24.08 14 párr. 1, 2