Spisil te j-abatetik yuʼun te Diose ya xjuʼ te jich ya xkʼot ta pasel ta stojolike. Yaniwan skʼotes ta pasel jun tulan mulil te patil ya yal te oranax kʼot ta pasel. Jichniwan ya xjuʼ ya yal: Ma jnaʼ te bin-utʼil kʼot ta pasele. Manchukme jich-abi, teme ya yil ta nail te bintik la spase, yaniwan sta ta ilel te ay bintik la spas te ikʼot bael ta spasel te mulile. Laniwan sjokin te machʼa ma lek stalele o maniwan lek te bintik ya skʼases kʼajkʼal-ae sok yaniwan x-och ta jun página yuʼun Internet te maba leke. Sok laniwan yijkitay ta skʼoponel te Jehová, skʼoponel te Biblia, te tsoblejetik sok te maba ya xlokʼix ta scholel te skʼop Dios. Jich te bitʼil kʼot ta pasel ta stojol te kerem te ya yalbey skʼoplal te Proverbios, ay bintik la spas te ikʼot bael ta spasel mulil. Jaʼ yuʼun, ma jaʼuknax ya skʼan ya kijkitaytik te mulil, jaʼnix jich ya skʼan ya kijkitaytik te bintik ya xjuʼ ya yikʼotik bael ta spasel te mulil. Jaʼ te bin la scholbey skʼoplal te Salomón (Mat. 5:29, 30). w24.07 16 párr. 10, 11

¿Bin-a te kʼulejalil ini? Jaʼ te yalbeyel skʼoplal te Wentainel yuʼun Dios, te jaʼ jun aʼtelil te ya sta skuxlejal yuʼun te ants winiketik (2 Cor. 4:1). Pero ¿bin-a te vasijaetik te pasbil ta ajchʼal? Joʼotik te j-abatotik yuʼun te Dios te ya jpuktik ta alel te lek yachʼil kʼop. Ta skʼajkʼalel te Pablo, te jchonbajeletik ya yichʼik bael te bintik mukʼ skʼoplal ta vasijaetik te pasbilik ta ajchʼal jich bitʼil te weʼelil, te vino o te takʼin. Jaʼnix jich ta ora ini te Jehová yakʼoj jpastik jun mukʼul aʼtelil: jaʼ te spukel ta alel te lek yachʼil kʼop. Ta swentanax te koltayel yuʼune ya yakʼbotik yip koʼtantik yuʼun ya xjuʼ ya jkʼotestik ta pasel te bin aʼtelil yakʼojbotike. Ayniwan ya jxiʼtik te ya spʼajotik te ants winiketik. ¿Bin ya xjuʼ ya skoltayotik? Jnoptik ta swenta te oración te la spas te jpuk-kʼopetik kʼalal albotik ta mantal te yakuk yijkitayik te scholel te skʼop Dios. Ma la yakʼik te jaʼ ya stsalotik yuʼun te xiwel, la skʼanbeyik koltayel te Jehová yuʼun manchuk ya xiwik ta yalbeyel te skʼope. Jakʼbotik ta ora te bin la skʼanike (Hech. 4:18, 29, 31). Kʼalal ay baeltik ya stsalotik te xiwel ta swenta te ants winiketik, jkʼanbeytik koltayel te Jehová yuʼun ya jtsaltik te xiwel ta stojol te ants winiketik ta swenta te skʼuxul koʼtantik ta stojolik. w24.04 16 párr. 8, 9

Te bitʼil kʼux ta koʼtantik te Jehová, ya jkʼan ya jchʼultesbeytik te sbiile. Ta swenta te lotiletik yaloj te Satanás ya skʼan ya jchʼultesbeytik te sbiil te Jehová (Gén. 3:1-5; Job 2:4; Juan 8:44). Jaʼ yuʼun, te kʼalal ya jcholtik te skʼop Dios sok spisil koʼtantik, ya jkoltaybeytik skʼoplal te Jehová sok ya kaltik te bin smelelil ta stojole. Ya jkʼantik te spisiluk te ants winiketik ya snaʼik te jaʼ jkʼuxultaywanej, te jaʼ tojil ajwalil sok te nopolix te Wentainel yuʼun ya xbajt slajin te wokolil sok ya xbajt yichʼ talel lamalkʼinal sok tseʼel oʼtanil ta stojol te ants winiketik (Sal. 37:10, 11, 29; 1 Juan 4:8). Te kʼalal ya jpastik spisil ini, ya jchʼultesbeytik te sbiil te Jehová. Jaʼ yuʼun, tseʼel koʼtantik te ya jkʼotestik ta pasel te kaʼteltik kichʼojtik jich bitʼil Testigootik yuʼun. w24.05 18 párr. 12