Суббота, апрель 18
«Кайы-бирээңер бачытка борашкан-даа болза... Болчукчувус... бар болгай» (1 Ин. 2:1).
Кижиниң хүлээп болур эң-не чугула шиитпири — Иеговага чуртталгазын бараалгадып, ооң өг-бүлезиниң кезии апаары. Иегова ол орукту кижи бүрүзү шилип алзын деп күзээр. Чүге дээрге кижилер ооң өңнүктери апаргаш, мөңгеде чурттазын деп, Бурган күзеп турар (Ы. х. к. 30:19, 20; Гал. 6:7, 8). Ынчалза-даа Иегова кымны-даа аңаа бараалгаарын албадавайн турар. Ол кижи бүрүзүнге канчаар алдынарын боду шиитпирлээр эргени берген. Сугга суктурган бараалгакчы Бурганның хоойлузун үреп, аар бачыт кылыптар болза канчаар? Бачыдын миннивес болза, ол араңарга турбас ужурлуг (1 Кор. 5:13). Ындыг байдалда безин ол кижиниң дедир эглип кээринге, Иегова дыка идегеп чоруур. Буруузун миннип турар улусту өршээр үндезин турзун дээш, төлевир дээш сагыш човаан чылдагааннарының бирээзи ол-дур. Ынакшылдыг Бурганывыс бачыттыг улуска чылыг-чымчак хамаарылга көргүзүп, буруузун минниринче кыйгырып турар (Зах. 1:3; Рим. 2:4; Иак. 4:8). w24.08 ар. 14, абз. 1, 2
Улуг-хүн, апрель 19
«Чүрээңде мерген угаан бар болза, чүрээмни өөрүшкү ээлээр» (У. ч. 23:15).
Иоанн элчин үшкү чагаазын бижээн үеде, меге өөредиглер тарадыр, чыышка аңгылажыг үндүрер улус тыптып эгелээн. Ынчалза-даа шынчызы-биле «алыс шынның изин истээн» улус база турган. Олар Иегованы дыңнап, «Адавыстың чагыгларын ёзугаар» амыдырап чораан (2 Ин. 4, 6). Ол шынчы христианнар чүгле Иоанны эвес, а Иегованы база өөрткен (У. ч. 27:11). Биске кандыг кичээл бар? Шынчы чорук өөрүшкү эккээр (1 Ин. 5:3). Чижээ, Иегованы өөрткеш, аас-кежикти миннир бис. Ооң хоойлулары-биле чурттап, бо делегейниң күткүлгелеринден ойталаар болзувусса, Бурган биле дээрде ангелдер өөрүүр (Лк. 15:10). Акы-угбаларывыс Бурганга шынчы артып турары база өөрүнчүг (2 Фес. 1:4). А кажан Эрликтиң делегейи ис чок чиде бээрге, Иеговага бердинген артканывыс дээш, өөрүп хөглээр бис. w24.11 ар. 12, абз. 17, 18
Понедельник, апрель 20
«Кым-даа бодунуң ажык-дүжүүн сүрбезин, а өске улустуң ажык-дүжүү дээш сагыш човазын» (1 Кор. 10:24).
Кижини хайгааравышаан, минниишкиннерин чугаалаарда кайы хире үе манаар херек? Далаштыг болба, оон башка шыдамык эвес кылдыр көстүр сен (У. ч. 29:20). А шөйерге, ылаңгыя сонуургаарыңны өске тала эскерип каанда, шиитпир чогуң илерээр (Эккл. 11:4). Өгленирин ынчан үзе шиитпирлевес деп утпа. Ынчалза-даа өглениринге белениңге база шилип алганың кижи чуртталгаңга эки эш боор деп бүзүрелдиг болур ужурлуг сен. А сени бир кижи сонуургаанын эскерип каан дижик сен. Сээң талаңдан сонуургал чок болза, ону тода көргүс. Хоозун идегел берип, өске кижиниң сеткили-биле ойнаары доң баарлыг чорук (Эф. 4:25). w24.05 ар. 22—23, абз. 9, 10