Ua ite anei oe?
No te aha i faahiti-pinepine-hia ˈi te tahi mau parau i roto i te Bibilia?
I TE tahi taime, e faahiti faahou na te mau taata papai Bibilia i te hoê â parau. E hiˈo anaˈe e toru tumu i na reira ˈi ratou:
Te area tau i papaihia ˈi te reira. I Iseraela tahito ra, aita ta te rahiraa e otaro o te Ture. I te rahiraa o te taime, e faaroo ratou i te taioraa o te buka o te Ture ia putuputu te nunaa i te sekene. (Deut. 31:10-12) I tera mau taime, aita paha ratou i nehenehe e faaroo maite no te maniania. E tia atoa na hoi ratou e rave rahi hora i rotopu i te nahoa. (Neh. 8:2, 3, 7) I taua atoa mau taime, e taio-pinepine-hia te mau parau faufaa ia haamanaˈo e ia faaohipa te nunaa i te reira. E faahiti-pinepine-hia atoa te tahi mau taˈo ia haamanaˈo ratou i te mau tuhaa rii o te mau ture ta Iehova i horoa.—Lev. 18:4-22; Deut. 5:1.
Te huru papairaa. I roto i te Bibilia, e itehia te tahi mau himene. Te vai ra te mau Salamo, te Sire a Solomona e te Oto o Ieremia. I te tahi taime, e faahiti-pinepine-hia te tahi mau parau i roto i te faahoˈiraa o te himene. Maoti te reira, e mau aau ai te mau parau o te himene i te feia e faaroo ra. A tapao na i te mau parau o te Salamo 115:9-11: “E Iseraela e, a tiaturi ia Iehova, o ˈna to ratou tauturu e ta ratou paruru. E te utuafare o Aarona, a tiaturi ia Iehova, o ˈna to ratou tauturu e ta ratou paruru. Outou o te mǎtaˈu ra ia Iehova, a tiaturi ia Iehova, o ˈna to ratou tauturu e ta ratou paruru.” Ma te faahiti pinepine i teie mau parau faufaa, ua mau aau roa te reira i te feia himene.
Te faaiteraa i te manaˈo faufaa. I te tahi taime, ua faahiti pinepine te feia papai Bibilia i te mau pereota faufaa roa. Ei hiˈoraa, i to Iehova faaueraa i te mau Iseraela eiaha e amu i te toto, ua ani oia ia Mose ia faataa pinepine i te tumu. Ua hinaaro Iehova ia taa-maitai-hia e to roto te ora i te toto. (Lev. 17:11, 14) I muri aˈe, i to te mau aposetolo e te mau matahiapo papairaa i te mau ohipa te titauhia i te mau Kerisetiano ia haapae, ua faahiti-faahou-hia te toto.—Ohi. 15:20, 29.
Noa ˈtu i roto i te Bibilia e faahiti-pinepine-hia te tahi mau manaˈo, e ere te auraa e te hinaaro ra Iehova ia faahiti noa tatou i te reira. Ua parau hoi Iesu: “Ia pure oe, eiaha e tahana i te parau.” (Mat. 6:7) Ua faaite atoa mai oia i te tahi mau ohipa e tano ia faahiti i roto i ta tatou mau pure, ia tuati noa râ te reira i te hinaaro o te Atua. (Mat. 6:9-13) No reira eita tatou e tahana noa i ta tatou mau parau a pure ai, e nehenehe râ tatou e tamau noa i te pure no te tahi ohipa.—Mat. 7:7-11.
E tumu faufaa ïa i faahiti-pinepine-hia ˈi te tahi mau taˈo e pereota i roto i te Bibilia. Hoê hoi teie o te mau ravea ta to tatou Orometua Rahi roa ˈ ˈe e faaohipa nei no te haapii mai i te faufaaraa o te reira.—Isa. 48:17, 18.