Te taviniraa pionie

E faaohipa maitai tatou i to tatou puai a haamau ai tatou i te mau fa no te tavini atu â ia Iehova. (Ko1 9:26) E tauturu ta tatou mau fa pae varua ia faaohipa maitai i to tatou taime hou te hopea o teie ao ino. (Eph 5:15, 16) I ta outou haamoriraa utuafare e nehenehe outou e haamau i te mau fa no te matahiti taviniraa apî. I roto i teie Faaineineraa no te putuputuraa, ua faanahohia te tahi mau tumu parau o te nehenehe e tauturu ia outou ia haamau i te mau fa pae varua e ia feruri na roto i te pure.—Iak 1:5.

Ei hiˈoraa, a tauaparau e to outou utuafare no te ite o vai te nehenehe e riro ei pionie tamau. Mai te peu te haapeapea ra outou e aita ta outou hora e naeahia, a tauaparau atu i te tahi mau pionie hoê â tupuraa to ratou e to outou. (Mas 15:22) E nehenehe atoa outou e titau manihini i te hoê pionie i ta outou haamoriraa utuafare e e uiui ia ˈna. I muri iho, a haamau i te hoê porotarama. Mai te peu ua tavini aˈena outou ei pionie, e nehenehe outou e feruri no te rave faahou i tera taviniraa.

E nehenehe anei hoê mero utuafare e riro ei pionie tauturu? Mai te peu mea paruparu rii outou i te pae tino, e nehenehe outou e tavini ei pionie tauturu ma te poro maa taime i te mahana taitahi. Mai te peu e ohipa taime taatoa ta outou e aita ta outou e nehenehe e apiti i te pororaa i roto i te hebedoma, aore ra te haere noa ra outou i te haapiiraa, e nehenehe outou e rave i teie taviniraa i te hoê avaˈe e tau faafaaearaa anei ta outou aore ra e pae hebedoma to roto. A rave i te taime e to outou utuafare no te haamau i te mau fa pae varua no te matahiti taviniraa apî. I nia i te hoê tarena, a tapao atu i te avaˈe ta outou e hinaaro e rave i te taviniraa pionie tauturu.—Mas 21:5.

A MATAITAI I TE VIDEO A FAAITE I TE ITOITO . . . EI PIONIE E A PAHONO I TEIE UIRAA:

• Eaha ta te hiˈoraa o tuahine Aamand e haapii mai ra no nia i to Iehova here e aupuru i ta ˈna mau tavini o te rave ra i te mau haapaeraa no te riro ei pionie?