E pae ravea e itea ˈi te hoê haapiiraa Bibilia
1. Ia fifi tatou i te ite i te hoê taata o te haapii i te Bibilia, e nafea tatou e no te aha?
1 Ua fifi anei oe i te ite i te hoê taata o te haapii i te Bibilia e oe? Eiaha e tuu. E haamaitai Iehova i te feia e rave tamau i to ˈna hinaaro. (Gal. 6:9) No te tauturu ia oe, e hiˈo anaˈe e pae manaˈo tauturu.
2. E nafea tatou ia ani roa ˈtu i te taata ia haapii i te Bibilia?
2 A ani roa ˈtu: Ua ite te rahiraa o te taata e te opere nei tatou i Te Pare Tiairaa e te Réveillez-vous! Aita râ paha ratou i ite e te pûpû atoa nei tatou i te haapiiraa Bibilia. No te aha e ore ai e ani roa ˈtu i te taata a poro ai tatou i tera e tera fare? Ia farerei oe i te hoê taata i anaanatae, a ani atu e hinaaro anei o ˈna e haapii i te Bibilia. Ia ore oia e farii, e nehenehe oe e tamau i te afai i te mau vea e i te atuatu i to ˈna anaanatae. I afai tamau na te hoê taeae i te mau vea i te tahi na hoa faaipoipo a tau matahiti i teie nei. Ua vaiiho atu oia i te mau vea apî, te hoˈi ra o ˈna a haamanaˈo ai oia i te ani atu ia raua: “E hinaaro anei orua e haapii i te Bibilia?” Ua maere oia i to raua fariiraa mai. I teie mahana, ua bapetizohia raua.
3. No te aha eiaha ˈi e manaˈo e e haapiiraa Bibilia ta te feia atoa e haere maira i te mau putuputuraa?
3 Feia e haere maira i te mau putuputuraa: Eiaha e manaˈo e e haapiiraa Bibilia ta te feia atoa e haere maira i te mau putuputuraa. Te faatia ra te tahi taeae: “Ua haamata vau i te rahiraa o ta ˈu mau haapiiraa Bibilia a paraparau ai au i te feia i haere mai i te mau putuputuraa.” Mea mamahu te hoê mama e tamahine bapetizohia ta ˈna i roto i te amuiraa. A 15 matahiti to ˈna haere-noa-raa mai i te Piha a te Basileia. E tomo mai oia hou te putuputuraa a haamata ˈi e e hoˈi oioi oia a faaoti ai te reira. Ua haafatata ˈtu te tahi tuahine e ua pûpû atu i te hoê haapiiraa Bibilia. Ua farii teie vahine e ua haere mai oia i te parau mau. Ua papai te tuahine: “Ta ˈu noa e tatarahapa nei, ua tiai au 15 matahiti no te ani i teie mama e farii anei o ˈna i te haapiiraa Bibilia!”
4. E nafea ia itea te haapiiraa Bibilia maoti te hoê taata matau?
4 Maoti te hoê taata matau: Ua hinaaro te hoê tuahine e apiti i te haapiiraa Bibilia a te tahi atu taata poro. Ma te parau faatia a te taata haapii, ua ani teie tuahine i te piahi ua matau anei o ˈna i te tahi taata o te anaanatae i te haapii i te Bibilia. Ia pûpû oe i te buka Bibilia haapii i te hoê taata ta oe i farerei, e nehenehe oe e ui: “Ua matau anei oe i te tahi taata o te hinaaro atoa i teie buka?” I te tahi taime, eita te feia poro e te mau pionie e nehenehe e faatere i te haapiiraa a te hoê taata no te tahi mau tupuraa. A faaite atu ïa e te vata ra oe.
5. No te aha e ani ai i te hoa faaipoipo e ere i te Ite e hinaaro anei o ˈna e haapii?
5 Hoa faaipoipo e ere i te Ite: E hoa faaipoipo e ere i te Ite anei to te tahi taata poro o ta oe amuiraa? Eita paha vetahi e hinaaro e tauaparau i nia i te Bibilia e to ratou hoa faaipoipo Kerisetiano. E farii râ paha oia i te haapii e te tahi atu taata poro e ere i te fetii. E mea maitai aˈe i te tahi taime ia farerei na mua i te hoa faaipoipo Ite no te taa e nafea ia haafatata ˈtu i to ˈna hoa.
6. No te aha mea faufaa ˈi ia pure ia noaa te haapiiraa Bibilia?
6 Te pure: Eiaha e haafaufaa ore i te mana o te pure. (Iak. 5:16) Ua fafau Iehova e faaroo i ta tatou mau aniraa ua tu anaˈe te reira i to ˈna hinaaro. (Ioa. 1, 5:14) Ua pure te tahi taeae mea ohipa roa o ˈna no te ani i te hoê haapiiraa Bibilia. Ua uiui noa ta ˈna vahine e taime anei to ˈna no te haapao i te hoê piahi, mai te peu iho â râ e e fifi rahi to ˈna. A pure ai oia ia noaa mai te hoê haapiiraa Bibilia i ta ˈna tane, ua faaite atura oia i teie mau haapeapearaa ia Iehova. E piti hebedoma i muri aˈe, ua pahonohia mai ta raua pure. Ua farerei te hoê pionie i te tahi taata tei hinaaro e haapii e te taeae. Ua papai te vahine: “Te parau nei au i te feia atoa e manaˈo nei eita e maraa ia ratou ia faatere i te hoê haapiiraa Bibilia: A faahiti papu i te reira ia pure outou, e eiaha e faaea i te ani. Ua rahi mau to mâua oaoa.” A faaoromai! E itea iho â te hoê haapiiraa Bibilia e e oaoa oe i te tauturu i tera taata ia haere na nia i “te eˈa e tae atu ai i te ora.”—Mat. 7:13, 14.