Tuhaa 7: E faatere anaˈe i te mau haapiiraa bibilia o te paturu i te mau haereraa i mua
Te pure i roto i te haapiiraa
1. (a) No te aha e mea tano ai ia haamata e ia faaoti i te hoê haapiiraa bibilia na roto i te pure? (b) E nafea tatou e nehenehe ai e haamata ma te pure i roto i te hoê haapiiraa bibilia?
1 Ia nehenehe te mau piahi Bibilia e haere i mua i te pae varua, e mea faufaa roa ta Iehova haamaitairaa. (Kor. 1, 3:6) No reira, mea tano ia haamata e ia faaoti i te hoê haapiiraa papu na roto i te pure. E nehenehe tatou e rave pinepine i te reira ia faatere tatou i te haapiiraa matamua roa a te hoê taata faaroo. No te tahi atu, e titauhia paha ia tatou ia haroaroa i te taime tano no te haamata ma te pure. E nehenehe outou e faaohipa i te Salamo 25:4, 5 e te Ioane 1, 5:14 no te tauturu i te piahi ia taa no te aha e mea tia ˈi ia pure e e faaohipa atoa i te Ioane 15:16 no te faataa i te faufaaraa ia pure ia Iehova na roto ia Iesu Mesia.
2. Ia apiti te hoê taeae bapetizohia aore ra te hoê tane poro bapetizo-ore-hia i te hoê tuahine no te hoê haapiiraa bibilia, na vai e pure?
2 Na vai e pure i roto i te hoê haapiiraa bibilia? Mai te peu e e apiti te hoê taeae bapetizohia i te hoê tuahine no te hoê haapiiraa, na te taeae ïa e pure, noa ˈtu e na te tuahine e faatere i te haapiiraa ma te tapoˈi i to ˈna upoo. (Kor. 1, 11:5, 10) I te tahi aˈe pae, mai te peu e e apiti te hoê tane poro i te Basileia bapetizo-ore-hia i te hoê tuahine no te hoê haapiiraa, na te tuahine ïa e pure. I roto i teie huru tupuraa, e mea tia ia tapoˈi oia i to ˈna upoo ia pure e ia faatere atoa i te haapiiraa.
3. Eaha te mau manaˈo e tano ia faahiti i roto i te mau pure i roto i te hoê haapiiraa bibilia?
3 Eaha te faahiti i roto i te pure: Eita e titauhia ia roa te mau pure i roto i te haapiiraa bibilia, ia papu râ. Hau atu i te aniraa i te haamaitairaa a te Atua no te haapiiraa e te haamauruururaa no te pue parau mau i haapiihia, mea tano ia haamauruuru ia Iehova no te mea o ˈna te Tumu o te haapiiraa. (Isa. 54:13) E nehenehe atoa tatou e faahiti i te mau parau e faaite ra i to tatou anaanatae haavare ore i te piahi e to tatou mauruuru no te faanahonahoraa ta Iehova e faaohipa ra. (Tes. 1, 1:2, 3; 2:7, 8) E nehenehe te aniraa ia Iehova ia haamaitai mai i te mau tutavaraa a te piahi no te faaohipa i ta ˈna e haapii ra e tauturu ia ˈna ia ite i te faufaaraa ia riro ei ‘taata rave i te parau.’—Iak. 1:22.
4. Eaha te mau maitai ta te mau pure i te omuaraa e i te hopearaa o te hoê haapiiraa bibilia e hopoi mai?
4 E rave rahi mau maitai ta tera mau pure e hopoi mai. E horoa mai te reira i te haamaitairaa a te Atua. (Luka 11:13) E haafaufaa te reira i te tura o te haapiiraa i te Parau a te Atua. A faaroo ai te piahi i ta tatou mau pure, te haapii ra o ˈna e nafea ia pure. (Luka 6:40) Hau atu â, e nehenehe te mau pure no roto mai i te hoê aau î i te here no te Atua e te mauruuru no to ˈna mau huru maitatai faito ore e tauturu i te piahi ia faatupu i te hoê taairaa piri e o Iehova.