TUMU PARAU MATAMUA | NO TE AHA IESU I MAUIUI E I POHE AI?
Ua tupu mau anei?
I te omuaraa o te avaˈe Eperera 33 i muri aˈe i te Mesia, ua haapohehia Iesu no Nazareta. Ua parihia e taata orure hau, ua taparahihia e ua patǐtǐhia i nia i te pou. E pohe mauiui mau to ˈna. Ua faatia mai râ te Atua ia ˈna i te ora e ua hoˈi Iesu i te raˈi 40 mahana i muri aˈe.
No roto mai teie faatiaraa i na Evanelia e maha o te mau Papai Heleni Kerisetiano, matauhia i te parau Te Faufaa Apî. Ua tupu mau anei te reira? E uiraa maitai tera o te tia ia feruri maite. Mai te peu e ere i te mea mau, mea faufaa ore te faaroo e e moemoeâ noa ïa te tiaturiraa o te ora mure ore i roto i te paradaiso. (Korinetia 1, 15:14) Mai te peu râ mea mau, e a muri aˈe oaoa te tiai maira i te huitaata e no oe atoa ïa. Mea mau anei te faatiaraa a te mau Evanelia?
MEA PAPU TE FAATIARAA
Mea taa ê roa te mau aai hamanihia e te taata i te faatiaraa a te mau Evanelia. I roto, te itehia ra ua rave-maite-hia te mau maimiraa no te haapapu i te mau ohipa i tupu. Ei hiˈoraa, ua faaitehia te iˈoa o te mau vahi mau e te mataitaihia ra e rave rahi o ratou i teie mahana. Ua faahiti-atoa-hia te tahi mau taata ta te mau aivanaa i te pae o te tuatapaparaa i haapapu ua ora mau ratou.—Luka 3:1, 2, 23.
Ua faahiti atoa te feia papai o te senekele matamua e te piti i te parau no Iesu.a Ua tano te faatiaraa a te mau Evanelia no nia i te taparahiraahia o Iesu i te mau raveraa a to Roma i tera tau no te haapohe i te taata. Aita atoa te tahi mea i hunahia, ua faaitehia râ te taatoaraa o te ohipa i tupu, oia atoa vetahi mau huru paruparu o te mau pǐpǐ a Iesu. (Mataio 26:56; Luka 22:24-26; Ioane 18:10, 11) Te faaite ra tera mau tuhaa atoa, mea mau ta te feia papai Evanelia i parau e mea papu ta ratou i faatia no nia ia Iesu.
UA TUPU MAU ANEI TE TIA-FAAHOU-RAA O IESU?
Noa ˈtu e farii te rahiraa e taata mau Iesu e ua pohe oia, te feaa ra vetahi i to ˈna tia-faahou-raa. Aita atoa te mau aposetolo i tiaturi oioi i te faaiteraahia ˈtu ua tia faahou mai Iesu. (Luka 24:11) Ua faaea râ ratou i te feaa no te mea ua ite ratou e te tahi atu mau pǐpǐ ia Iesu e rave rahi taime i muri aˈe i to ˈna tia-faahou-raa. I te tahi mahana, hau atu 500 taata tei ite ia ˈna i te hoê â taime.—Korinetia 1, 15:6.
Noa ˈtu e tapeahia e e haapohehia ratou, ua faaite te mau pǐpǐ a Iesu ma te itoito i to ˈna tia-faahou-raa i te taatoaraa, oia atoa i te feia i taparahi pohe roa ia ˈna. (Ohipa 4:1-3, 10, 19, 20; 5:27-32) E na reira anei te mau pǐpǐ ahiri aita ratou i papu ua tia faahou mai Iesu? Te faaite ra te numera o tei riro mai ei Kerisetiano i tera tau e teie mahana, aita te mau pǐpǐ i feaa noa ˈˈe.
Te faaite ra te mau tuhaa atoa mea mau te faatiaraa a te mau Evanelia no nia i to Iesu poheraa e to ˈna tia-faahou-raa. Ma te taio maite i te reira, e papu atu â oe ua tupu mau tera mau ohipa. E tiaturi atu â oe ia ite atoa no te aha oia i pohe ai. E faataa ˈtu te tuhaa i muri nei i te reira.
a Ua papai Tacite o tei fanauhia i 55 i muri aˈe i te Mesia, ua mauiui te “Kirito, no reira mai te iˈoa [Kerisetiano], i te utua ino mau i raro aˈe i te faatereraa a Tibère i te rima o te tahi o to tatou mau tavana, o Ponotio Pilato.” Ua faahiti-atoa-hia Iesu e Suétone (senekele matamua), te taata tuatapapa ati Iuda Josèphe (senekele matamua) e Pline le Jeune, tavana no Bitunia (senekele piti).