Ua ite anei outou?

No te aha Iesu i horoi ai i te avae o ta ˈna mau aposetolo?

I Iseraela i tahito, mea rahi te taata au noa o te rave i ta ratou mau ohipa o te mau mahana atoa aita to ratou e tiaa. I oomo na vetahi i te tamaa, oia hoi te iri i raro aˈe i te tiaa tei taamuhia i nia i te avae e te poro avae. I te mea e mea repo puehu aore ra mea vari te mau purumu e te mau aua, e repo iho â ïa te avae o te taata.

E peu matauhia ïa ia tatara te hoê taata i to ˈna tamaa hou a tomo ai i roto i te hoê fare. No te farii maitai atu, e mea tia ia horoihia te avae o te hoê manihini. Na te fatu fare aore ra na te hoê tavini e rave i taua ohipa ra. Te faahiti ra te Bibilia i teie peu matauhia. Ei hiˈoraa, ua na ô Aberahama i te mau ratere i ǒ na e: “E tii matou i te hoê maa pape ei horoi i to outou avae, e faaea noa na outou i raro aˈe i teie nei raau: e tii hoi au i te tahi maa maa iti, ia etaeta ˈˈe outou.”—Genese 18:4, 5; 24:32; Samuela 1, 25:41; Luka 7:37, 38, 44.

Maoti teie haamaramaramaraa, te taa ra ia tatou no te aha Iesu i horoi ai i te avae o ta ˈna mau pǐpǐ i ta ˈna oroa Pasa hopea e o ratou. I taua taime ra, aita e fatu fare e aita e tavini no te rave i teie ohipa, e e au ra e aita hoê aˈe o te mau pǐpǐ i hinaaro e rave i te reira. No reira, i to ˈna raveraa i te hoê auˈa pape e te hoê ahu no te horoi e no te tamǎrô i te avae o ta ˈna mau pǐpǐ, ua horoa ˈtu Iesu i te hoê haapiiraa o te here e te haehaa.—Ioane 13:5-17.