Tuuraahia Iesu ia haapohehia e aratairaahia e haapohe

Noa ˈtu ua hamani-ino-hia e ua faaooohia Iesu, e te imi noa ra Pilato i te tuu ia ˈna, aita te mau tahuˈa tiaau e te feia e turu ra ia ratou i fati. Ua hinaaro iho â ratou ia pohe Iesu, a tuô noa ˈi: “I nia i te pou! I nia i te pou!” Pahono atura Pilato: “Na outou iho e rave ia ˈna no te haapohe atu, aita hoi e tumu e faautua ˈi au ia ˈna.”—Ioane 19:6.

Aita Pilato i tiaturi i te mau ati Iuda e parau ra e mea tano ia haapohehia Iesu no te mea ua orure oia i te Hau Roma. E ere anei râ e ua hara Iesu i te pae o te haapaoraa? Pari atura ïa ratou ia Iesu i te faaino i te Atua, te parau atoa i parihia ˈi Iesu i mua i te Sunederi. Na ô atura ratou: “E ture ta matou, e ia au i ta matou ture, ia pohe oia e tia ˈi, no te mea ua parau oia e e tamaiti oia na te Atua.” (Ioane 19:7) A tahi ra Pilato a faaroo ai i teie pariraa.

Hoˈi atura oia i roto i to ˈna aorai, e imi atura i te hoê ravea e tuu i teie taata tei hamani-ino-hia, ta ta ˈna hoi vahine i moemoeâ. (Mataio 27:19) Eaha ˈtura no teie pariraa a te ati Iuda e o “te Tamaiti a te Atua” teie taata tei tapeahia? Ua ite Pilato e no Galilea mai Iesu. (Luka 23:5-7) Ui noa ˈtura râ oia ia Iesu: “Nohea mai oe?” (Ioane 19:9) Ua manaˈo anei Pilato e peneiaˈe i ora na Iesu na mua ˈˈe mai te hoê atua ra te huru?

Na Iesu iho i parau ia Pilato e e arii o ˈna, e ere râ ta ˈna Faatereraa arii no teie nei ao. Mamû noa ˈtura Iesu, aita hoi e faufaa ia tatara ˈtu â i ta ˈna i parau aˈenei. Puta roa ihora Pilato aita hoi Iesu i hinaaro e pahono, e parau iria maira: “Eita oe e pahono mai? Aita oe i ite e e mana to ˈu no te tuu ia oe aore ra no te haapohe ia oe?”—Ioane 19:10.

Parau noa ˈtura Iesu: “Aita to oe e mana i nia ia ˈu mai te peu aita taua mana ra i horoahia mai ia oe ra e te Atua. No reira, te taata tei tuu ia ˈu ia oe ra, e hara rahi aˈe ïa ta ˈna.” (Ioane 19:11) Aita Iesu e manaˈo ra i te hoê noa taata, ia Kaiapha râ, te feia i turu ia ˈna, e Iuda Isakariota. E utua rahi aˈe ta ratou i ta Pilato.

Ua maere Pilato i te huru o Iesu e ta ˈna mau parau. Rahi noa ˈtura ïa to ˈna mǎtaˈu e atua paha Iesu. Imi faahou atura oia i te hoê ravea no te tuu ia ˈna. Faahiti maira râ te nahoa i te hoê parau ta Pilato i mǎtaˈu na. Patiatia maira ratou: “Ia tuu oe i tena taata, e ere ïa oe i te hoa no Kaisara. Te taata o te faaarii ia ˈna iho, te patoi ra ïa ia Kaisara.”—Ioane 19:12.

Aratai faahou maira te tavana ia Iesu i rapaeau, parahi ihora i te vahi haavaraa, e parau atura i te nahoa: “Teie to outou arii!” Aita râ te nahoa na te mǎrû, tuô maira ratou: “Haapohe ia ˈna! Haapohe ia ˈna! I nia i te pou!” Taparu atura Pilato: “E haapohe au i to outou arii?” Mea au ore na te ati Iuda te faatereraa Roma. Haapapu noa maira râ te mau tahuˈa tiaau: “O Kaisara to matou arii, aita ˈtu.”—Ioane 19:14, 15.

No te taiâ, fati ihora Pilato no te onoono o te nahoa, e tuu atura ia Iesu ia haapohehia. Tatara ˈtura te mau faehau i te ahu vareau o Iesu e faaahu ihora ia ˈna i to ˈna ahu tapoˈi. A aratai-ê-hia ˈi Iesu, na ˈna iho i amo i ta ˈna pou haamauiuiraa.

Fatata i te avatea taua Mahana pae ra 14 no Nisana, aita Iesu i taoto mai inanahi mai, e ua faaruru oia i te mauiui rahi. A tautoo noa ˈi oia i te amo i te pou, te iti roa ra to ˈna puai. Faaue atura te mau faehau i te hoê taata na pihai iho mai, o Simona no Kurene i Afirika, ia amo i te pou i te vahi haapoheraa. E rave rahi te na muri atu ra, te tupaipai ra vetahi i to ratou ouma ma te oto, a taˈi noa ˈi.

Parau atura Iesu i te mau vahine e oto ra: “Tamahine ma no Ierusalema, a faaea na i te taˈi no ˈu. A taˈi râ no outou iho e no ta outou mau tamarii. Inaha hoi, te piri mai ra te mau mahana e na ô ai te taata: ‘E oaoa te mau vahine eita ta ratou tamarii e noaa, te mau vahine aita i fanau, e te mau vahine aita ta ratou e aiû!’ I reira ïa te taata e parau ai i te mau mouˈa: ‘A mairi mai i nia ia matou!’ e i te mau aivi: ‘A tapoˈi mai ia matou!’ I te mea e e tupu te reira e mea ota te raau, mai te aha ïa te huru ia mǎrô te raau?”—Luka 23:28-31.

O te nunaa ati Iuda ta Iesu e parau ra. E au ratou i te hoê tumu e pohe ra mea ota rii â te raau, te ora noa ra hoi Iesu e e rave rahi ati Iuda o te tiaturi ra ia ˈna. Ia pohe râ Iesu e ia faarue ta ˈna mau pǐpǐ i te haapaoraa ati Iuda, e mǎrô te nunaa i te pae varua mai te hoê tumu raau pohe. Ia faaohipa te Atua i te nuu Roma no te haamou i tera nunaa, mea rahi te taˈi!