Ua ite anei outou?

No te aha i pûpûhia ˈi na Iuda e 30 moni ario no te hoo ia Iesu?

I to Iuda Isakariota farereiraa i te mau tahuˈa rarahi no te ite ehia moni ta ratou e horoa ˈtu no te hoo ia Iesu, ua pûpû atu ratou e “toru ahuru moni ario” na ˈna. (Mataio 26:14, 15) E au ra e te faaite ra tera moni i to ratou riri rahi ia Iesu e e ere oia i te mea faufaa roa no ratou.

E sekela ario paha te parauhia ra i ǒ nei, te moni matauhia e te mau ati Iuda. Eaha te nehenehe e hoo mai e 30 sekela? Ua haamau te Ture a Mose i te reira no te moni o te hoê tavini. E nehenehe atoa e hoo i te hoê tâpû fenua no e toru ahuru sekela.—Exodo 21:32; Mataio 27:6, 7.

I to te peropheta Zekaria titauraa ia aufau te mau ati Iseraela taiva ia ˈna no ta ˈna ohipa ei tiai i te nunaa a te Atua, ua faito ratou ia ˈna “i na moni ario e toru ahuru.” E ohipa opuahia te reira no te faahaama i te peropheta o te Atua, ei faaiteraa e no ratou e tavini oia tirara ˈtu ai. No reira, ua faaue Iehova ia Zekaria: “E huri [atu i te reira] i roto i te fare o te potera: e hoo maitai tena tei hoohia mai au e ratou ra.” (Zekaria 11:12, 13) Te haamanaˈo maira te ohipa ta Zekaria i rave ma te faaroo i tera faaueraa i ta Iuda e rave e te moni tei noaa ia ˈna no te hooraa ˈtu i te Taata ta Iehova i maiti ei tiai no Iseraela.—Mataio 27:5.