HAAPIIRAA 26
No te aha e itehia ˈi te ino e te mauiui?
Ia tupu te hoê ati manaˈo-ore-hia, e ui iho â te taata: “No te aha te reira i tupu ai?” E oaoa ra tatou i te pahonoraa ta te Bibilia e horoa mai ra no teie uiraa!
1. Mea nafea Satani i te faaôraa i te ino i te ao nei?
Ua orure hau te Diabolo ra o Satani ia Iehova. No to ˈna hinaaro e faatere ia vetahi ê, i turai ai oia ia Adamu raua Eva ia apiti ia ˈna i roto i ta ˈna orure-hau-raa. Ua na reira Satani ma te haavare ia Eva. (Genese 3:1-5) Ua turai Satani ia Eva ia manaˈo e aita Iehova e hinaaro ra te maitai no ˈna. Ua parau Satani e e oaoa aˈe te taata ahani ratou i faaroo ore i te Atua. Ua haavare Satani ia Eva ma te parau e ore oia e pohe, o te haavare matamua ïa tera. No reira te Bibilia i pii ai ia Satani “e haavare e te metua no te haavare.”—Ioane 8:44.
2. Eaha ta Adamu raua Eva i faaoti i te rave?
Ua haamaitai rahi Iehova ia Adamu raua Eva. Ua parau oia e e nehenehe ta raua e amu i to te mau tumu raau atoa o te ô i Edene, hoê noa tumu tei opanihia ia raua. (Genese 2:15-17) Ua faaoti râ raua i te amu i te maa hotu o taua tumu raau. “Pofai ihora [Eva] i te maa hotu e amu atura.” I muri iho, “amu ihora” Adamu i te reira. (Genese 3:6) Ua faaroo ore raua i te Atua. No te mea e taata tia roa Adamu raua Eva, mea ohie no raua i te rave i te mea tano. Ua faaoti râ raua i te faaroo ore i te Atua, a rave ai raua i te reira, ua hara e ua patoi raua i to ˈna tiaraa e faaite ia raua eaha te mea maitai e te mea ino. Ua faatupu teie faaotiraa i te mauiui rahi no raua.—Genese 3:16-19.
3. Mea nafea te faaotiraa a Adamu raua Eva i ohipa ˈi i nia ia tatou?
A hara ˈi Adamu raua Eva, ua riro mai raua ei taata tia ore, no reira to raua huaai i riro ai ei taata tia ore. Te parau ra te Bibilia no Adamu: “Mai te hara i ô mai i te ao nei na roto i te taata hoê ra e te pohe na roto i te hara, e ua raea roa te mau taata atoa i te pohe.”—Roma 5:12.
Ua rau te tumu o to tatou mauiui. Te tahi taime no te faaotiraa ino ta tatou aore ra ta te tahi mau taata i rave. E i te tahi taime, no te mau tupuraa manaˈo-ore-hia.—A taio i te Koheleta 9:11.
A FAAHOHONU ATU Â
A hiˈo no te aha e ere te Atua te tumu o te ino e te mauiui na te ao nei i teie mahana, e eaha to ˈna huru ia mauiui tatou.
4. Te vai ra hoê o ˈna te tumu o to tatou mauiui
Te manaˈo ra te rahiraa e na te Atua e faatere ra i te ao nei. Tera iho â anei? A pata i te VIDEO.
A taio i te Iakobo 1:13 e te Ioane 1, 5:19, e a aparau i teie uiraa:
O te Atua anei te tumu o te mauiui e te ino?
5. Eaha tei tupu a faatere ai Satani?
A taio i te Genese 3:1-6, e a aparau i teie mau uiraa:
Eaha te haavare ta Satani i parau?—A hiˈo i te mau irava 4 e te 5.
Eaha ta Satani i rave ia manaˈo te taata aita Iehova e hinaaro ra i to ratou maitai?
No Satani, mea faufaa anei ia riro Iehova ei Faatere no te taata ia oaoa ratou?
A taio i te Koheleta 8:9, e a aparau i teie uiraa:
I te roaraa o te tau, aita Iehova i faatere i teie nei ao, eaha tei tupu?
Mea tia roa Adamu raua Eva e ua ora raua i roto i te paradaiso. Ua faaroo râ raua ia Satani e ua orure hau ia Iehova
I muri aˈe i te orure-raa-hau, ua î te ao i te hara, te mauiui e te pohe
E faaore Iehova i te hara, te mauiui e te pohe. E ora faahou te taata ma te tia roa i roto i te paradaiso
6. Te haapeapea ra Iehova no to tatou mauiui
E haapeapea anei te Atua ia mauiui tatou? A hiˈo eaha ta te arii Davida e te aposetolo Petero i papai. A taio i te Salamo 31:7 e te Petero 1, 5:7, e a aparau i teie uiraa:
Eaha to oe huru ia ite oe e te hiˈo e te haapeapea ra Iehova i to tatou mauiui?
7. E faaore te Atua i te mauiui atoa o te taata
A taio i te Isaia 65:17 e te Apokalupo 21:3, 4, e a aparau i teie uiraa:
No te aha mea mahanahana ia ite e faaore Iehova i te mauiui ta te hara i faatupu?
Ua ite anei oe?
A parau ai Satani i te haavare matamua, ua haavare oia ia Iehova. Oia hoi, ua turai oia i te taata ia manaˈo i te mau mea tano ore no nia ia Iehova ma te parau e ere Iehova i te hoê Faatere tia e te here. Ia faaore anaˈe Iehova i te mauiui o te taata i mua nei, e haamoˈa oia i to ˈna iˈoa. Oia hoi e haapapu oia e o ta ˈna faatereraa te mea maitai aˈe. O te haamoˈaraa i to Iehova iˈoa te mea faufaa roa ˈˈe i roto i te ao nui nei.—Mataio 6:9, 10.
TE MANAˈO O VETAHI: “Tei roto te mauiui i te opuaraa a te Atua no tatou.”
Eaha ta oe e parau?
HAAPOTORAA
O te Diabolo ra o Satani e na taata matamua te tumu o te ino na te ao nei. Te haapeapea rahi ra Iehova no to tatou mauiui e e fatata oia i te faaore i te reira.
Haamanaˈoraa
Eaha te haavare ta te Diabolo ra o Satani i parau ia Eva?
Mea nafea te orure-raa-hau a Adamu raua Eva i ohipa ˈi i nia ia tatou paatoa?
Nafea tatou e ite ai e te haapeapea ra Iehova no to tatou mauiui?
HIˈOPOA
A haapii i te tatararaa ta te Bibilia e horoa ra no te hara.
A taio hau atu â no nia i ta te Diabolo ra o Satani i faahiti i te ô i Edene.
“No te aha te Atua e vaiiho ai ia mauiui tatou?” (Te Pare Tiairaa Mati 2014)
A hiˈo i te pahonoraa tamahanahana mau o te hoê uiraa fifi mau.
A hiˈo eaha ta te hoê taata i haapii no nia i te mauiui ta ˈna i ite ati aˈe ia ˈna.