Haapiiraa 11

Mau tiaturiraa e mau peu ta te Atua e ore e au

Eaha te mau tiaturiraa e te mau peu tia ore? (1)

E tia anei i te mau kerisetiano ia tiaturi e e Toru Tahi te Atua? (2)

No te aha te mau kerisetiano mau e ore ai e faatupu i te Noele, te Pakate, aore ra te mau oroa mahana fanauraa? (3, 4)

E haamauiui anei te feia pohe i te feia ora? (5)

Ua pohe anei Iesu i nia i te satauro? (6)

Eaha te faufaaraa ia faaoaoa i te Atua? (7)

1. E ere te mau tiaturiraa e te mau peu atoa i te mea ino. Tera râ, eita te Atua e farii i te reira mai te peu e no roto mai i te haapaoraa hape aore ra te patoi ra i te mau haapiiraa a te Bibilia.—Mataio 15:6.

2. Te Toru Tahi: E Toru Tahi anei o Iehova—oia hoi e toru taata i roto i te hoê Atua? Eita! O Iehova, te Metua, o ˈna anaˈe “te Atua mau ra.” (Ioane 17:3; Mareko 12:29) O Iesu Ta ˈna Tamaiti fanau tahi, e tei raro aˈe mai oia i te Atua. (Korinetia 1, 11:3) E rahi aˈe te Metua i te Tamaiti. (Ioane 14:28) E ere te varua moˈa i te hoê taata; o te puai ohipa râ o te Atua.—Genese 1:2; Ohipa 2:18.

3. Te Noele e te Pakate: Aita o Iesu i fanauhia i te 25 no titema. Ua fanauhia oia i te area o te 1 no atopa, i te tau o te matahiti i reira te mau tiai mamoe e vaiiho ai i ta ratou mau nǎnǎ i rapaeau i te po. (Luka 2:8-12) Aita roa ˈtu Iesu i faaue i te mau kerisetiano ia faatupu i te oroa o to ˈna fanauraa. Maoti râ, ua faaue oia i ta ˈna mau pǐpǐ ia faahaamanaˈo i to ˈna poheraa. (Luka 22:19, 20) No roto mai te Noele e ta ˈna mau peu i te mau haapaoraa hape no tahito ra. Hoê â huru no te mau peu a te Pakate, mai te mau huero moa e te mau rapiti. Aita te mau kerisetiano matamua i faatupu i te Noele aore ra te Pakate, e hoê â huru no te mau kerisetiano mau i teie mahana.

4. Te mau oroa mahana fanauraa: E piti noa oroa mahana fanauraa tei faahitihia i roto i te Bibilia, e na te mau taata ïa o tei ore i haamori ia Iehova. (Genese 40:20-22; Mareko 6:21, 22, 24-27) Aita te mau kerisetiano matamua i faatupu i te oroa mahana fanauraa. No roto mai te peu e faatupu i te oroa mahana fanauraa i te mau haapaoraa hape no tahito ra. Te pûpû nei te mau kerisetiano mau i te mau taoˈa horoa e te arearea nei ratou i te tahi atu mau taime o te matahiti.

5. Te mǎtaˈu i te feia pohe: Eita te feia pohe e nehenehe e rave i te ohipa aore ra e putapû. Eita tatou e nehenehe e tauturu ia ratou, e eita ratou e nehenehe e haamauiui ia tatou. (Salamo 146:4; Koheleta 9:5, 10) E pohe te nephe; eita oia e ora noa i muri aˈe i te pohe. (Ezekiela 18:4) I te tahi râ mau taime, e faahua te mau melahi iino, piihia demoni, e e varua ratou no te feia pohe. E mea hape te mau peu atoa i taaihia i te mǎtaˈu aore ra i te haamoriraa i te feia pohe.—Isaia 8:19.

6. Te satauro: Aita o Iesu i pohe i nia i te satauro. Ua pohe oia i nia i te hoê pou, aore ra te hoê raau. Te auraa o te parau heleni i hurihia na roto i te parau “satauro” i roto e rave rau mau Bibilia, o te hoê noa ïa pou raau. No roto mai te taipe o te satauro i te mau haapaoraa hape no tahito ra. Aita te satauro i faaohipahia aore ra i haamorihia e te mau kerisetiano matamua. No reira, i to oe manaˈoraa, e tano anei ia faaohipa i te satauro i roto i te haamoriraa?—Deuteronomi 7:26; Korinetia 1, 10:14.

7. E mea fifi paha ia faarue vetahi o teie mau tiaturiraa e mau peu. Peneiaˈe e tamata te mau fetii e te mau hoa i te faahepo ia oe ia ore oe e taui i ta oe mau tiaturiraa. Tera râ, e mea faufaa aˈe ia faaoaoa i te Atua i te faaoaoa i te taata.—Maseli 29:25; Mataio 10:36, 37.

[Hohoˈa i te api 22]

E ere te Atua i te Toru Tahi

[Hohoˈa i te api 23]

No roto mai te Noele e te Pakate i te mau haapaoraa hape no tahito ra

[Hohoˈa i te api 23]

Aita e tumu no te haamori i te feia pohe aore ra no te mǎtaˈu ia ratou