E faataa ê anei te mau Ite no Iehova i te mau utuafare?

Ei Ite no Iehova, te tauturu nei matou i to matou iho mau utuafare e to te tahi atu. Te faatura nei matou i te Atua tei haamau i te utuafare. (Genese 2:21-24; Ephesia 3:14, 15) I roto i te Bibilia, te horoa mai ra Iehova i te mau aratairaa tei tauturu e rave rahi taata na te ao nei ia oaoa e ia haapuai i to ratou faaipoiporaa.

Nafea te mau Ite no Iehova e tauturu ai i te mau utuafare ia haapuai i to ratou mau taairaa?

Te tutava nei matou i te pee i te aˈoraa Bibilia, e tauturu mai hoi te reira ia riro ei hoa faaipoipo e ei metua maitai aˈe. (Maseli 31:10-31; Ephesia 5:22–6:4; Timoteo 1, 5:8) E tauturu atoa te aˈoraa Bibilia î i te paari i te mau utuafare e ere hoê â faaroo to te mau mero. (Petero 1, 3:1, 2) Teie te manaˈo o te tahi mau taata e ere i te Ite no Iehova, ua riro râ to ratou hoa faaipoipo ei Ite no Iehova:

• Te na ô ra Clauir no Beresilia: “I na matahiti matamua e ono o to mâua faaipoiporaa, ua tatamaˈi noa mâua. I to Ivete râ riroraa ei Ite no Iehova, ua rahi atu â to ˈna here e to ˈna faaoromai. Auaˈe oia i taui i ora mai ai to mâua faaipoiporaa.”

• Teie ta Agness, no Zambie, i parau mai: “Ua patoi au i to Chansa, o ta ˈu ïa tane, haamataraa i te haapii i te Bibilia e te mau Ite no Iehova. No ˈu, e faataa ê ratou i te mau utuafare. Tera râ, mai reira mai, ua ite au e ua tauturu mai te Bibilia ia mâua i roto i te faaipoiporaa.”

I roto i ta matou taviniraa, te faaite nei matou i te taata e nafea te faaohiparaa i te mau aˈoraa Bibilia î i te paari e tauturu ai ia ratou

• ia maiti i te hoê hoa faaipoipo ma te paari

• ia oaoa i roto i te matahiti faaipoiporaa matamua

• ia vai hau noa e te fetii o te hoa faaipoipo

• ia haapao i te moni

• ia faaea i te tatamaˈi

• ia haapii i te faaore i te hapa

• ia haapii i ta ratou mau tamarii

E peapea anei te faaipoiporaa ia taui hoê o na hoa faaipoipo i te faaroo?

I te tahi taime, e. Ei hiˈoraa, ia au i te tahi parau faataa a te taiete Sofres i 1998, 1 faaipoiporaa i nia e 20 te faaruru nei i te mau fifi rahi a riro ai hoê o na hoa faaipoipo ei Ite no Iehova.

Ua tohu Iesu e e faaruru te feia o te pee i ta ˈna mau haapiiraa i te tahi mau haapeapearaa i roto i to ratou utuafare. (Mataio 10:32-36) Ia au i te taata tuatapapa ra o Will Durant, i te tau o te Hau emepera Roma, ua parihia te haapaoraa Kerisetiano i te faataa ê i te mau utuafare.a I teie mahana, tera atoa te parihia ra i vetahi o te mau Ite no Iehova. Te auraa anei ïa e o te hoa faaipoipo tei riro ei Ite no Iehova te tumu o te fifi?

A hiˈopoa ˈi te Tiripuna Europa o te mau tiaraa o te taata e faataa ê anei te mau Ite no Iehova i te mau utuafare, ua fariihia e e pinepine o te mau fetii e ere i te Ite no Iehova te faatupu ra i te mau fifi. Aita ratou e “farii e e faatura ra i te tiamâraa o to ratou fetii ia faaohipa i to ˈna faaroo.” Ua parau atoa te Tiripuna e tera iho â te tupu ra i roto i te mau utuafare amahamaha i te pae faaroo. E ere o te mau Ite no Iehova anaˈe i roto i tera tupuraa.b Noa ˈtu râ, te tutava nei te mau Ite no Iehova i te pee i te aˈoraa Bibilia: “Eiaha te ino ia tahoohia ˈtu i te ino i te taata atoa. . . . A tutava i te rave i te mea e tia ia outou tataitahi no te parahi hau noa e te taata atoa.”—Roma 12:17, 18.

No te aha te mau Ite no Iehova e tiaturi ai e e mea tia ia faaipoipo noa ratou e te taata hoê â haapaoraa to ratou

Te pee nei te mau Ite no Iehova i te faaueraa Bibilia ia faaipoipo ‘i roto noa i te Fatu,’ oia hoi e te hoê taata hoê â faaroo to ratou (Korinetia 1, 7:39). No ǒ mai i te Bibilia teie faaueraa faufaa roa. Ei hiˈoraa, ia au i te tahi tumu parau i roto i te hoê vea no 2010, mea maitai aˈe te mau taairaa o na hoa faaipoipo tei tahoê i te pae faaroo.—Journal of Marriage and Family.c

Aita râ te mau Ite no Iehova e faaitoito ra i to ratou mau hoa Kerisetiano ia faataa ê i to ratou apiti e ere i te Ite no Iehova. Te na ô ra te Bibilia: “Mai te peu e ua faaipoipohia te hoê taeae i te hoê vahine e ere i te tuahine i roto i te faaroo, e ua farii taua vahine ra ia noho noa raua, eiaha ïa te taeae e faarue ia ˈna. E mai te peu e ua faaipoipohia te hoê vahine i te hoê tane e ere i te taeae i roto i te faaroo, e ua farii taua tane ra ia noho noa raua, eiaha ïa te vahine e faarue i ta ˈna iho tane.” (Korinetia 1, 7:12, 13) E auraro te mau Ite no Iehova i tera faaueraa.