No te aha te mau Ite no Iehova e ore ai e haere i te tamaˈi?
Eita te mau Ite no Iehova e haere i te tamaˈi. Teie te tahi mau tumu:
Te auraroraa i te Atua. Te na ô ra te Bibilia e “e tiapai” te mau tavini a te Atua “i ta ratou ˈoˈe ei auri arote” e “e ore hoi ratou e haapii faahou i te tamaˈi.”—Isaia 2:4.
Te auraroraa ia Iesu. Ua parau Iesu i te aposetolo Petero: “A faahoˈi i ta oe ˈoˈe i roto i te vehî, te feia atoa hoi e rave i te ˈoˈe, e pohe ïa i te ˈoˈe.” (Mataio 26:52) Ua faaite Iesu i ǒ nei e eita ta ˈna mau pǐpǐ e rave i te mauhaa tamaˈi.
E auraro ta Iesu mau pǐpǐ i ta ˈna faaueraa eiaha e riro i to teie nei ao ma te tapea i te tiaraa amui ore i te pae poritita. (Ioane 17:16) Aita ratou e patoi ra i ta te mau faehau e rave nei aore ra e haafifi ra i te feia i maiti e haere i te nuu.
Te here ia vetahi ê. Ua faaue Iesu i ta ˈna mau pǐpǐ “ia here [ratou] te tahi i te tahi.” (Ioane 13:34, 35) E riro ïa ratou ei fetii taeae nunaa rau o te ore roa ˈtu e aro i to ratou taeae aore ra tuahine.—Ioane 1, 3:10-12.
Te hiˈoraa o te mau Kerisetiano matamua. Ia au i te hoê buka ite rahi (Encyclopedia of Religion and War), aita te mau pǐpǐ matamua a Iesu i haere i te tamaˈi aore ra i rave i te tau faehau. Aita hoi te reira e tu ra e to Iesu manaˈo no nia i te here e i ta ˈna faaueraa e here i te enemi. Ua parau atoa te taata Heleni maimi i te pae faaroo ra o Peter Meinhold no nia i tera mau pǐpǐ matamua a Iesu: “No ratou, aita roa ˈtu e nehenehe e riro ei Kerisetiano e ei faehau atoa.”
Ta ratou e rave ra no te taatoaraa
E mero maitai te mau Ite no Iehova o te huiraatira. Aita ratou e haafifi ra i te hau o te fenua i reira ratou e ora ˈi. Te faatura nei matou i te mana faatere ia au i teie mau faaueraa Bibilia:
“Ia auraro te taata atoa i te feia mana.”—Roma 13:1.
“A faahoˈi ïa i ta Kaisara ia Kaisara ra, ta te Atua râ i te Atua ïa.”—Mataio 22:21.
Te auraro nei ïa matou i te ture, te aufau nei i ta matou tute e te turu nei i ta te faatereraa e rave nei no te maitai o te huiraatira.