Eaha te titauhia ia outou no te taa i te Bibilia?

Te pahonoraa a te Bibilia

Te faataa ra te Bibilia eaha te titauhia ia outou no te taa i te Bibilia. Noa ˈtu eaha to outou tupuraa, e ere te poroi a te Atua i roto i te Bibilia “i te mea fifi roa no [outou], e ere atoa mea atea ia [outou].”—Deuteronomi 30:11.

Te mau ravea no te taa i te Bibilia

1. A faatano i te huru hiˈoraa. A farii i te Bibilia ei Parau a te Atua. Titauhia te haehaa no te mea e patoi te Atua i te feia teoteo. (Tesalonia 1, 2:13; Iakobo 4:6) Tera râ, eiaha e tiaturi noa i nia i ta outou e taio ra aore ra e faaroo ra ma te ore e imi i te haapapuraa. Te hinaaro ra te Atua ia faaohipa outou i “to outou feruriraa atoa.”—Roma 12:1, 2.

2. A pure no te ani i te paari. Te parau ra te Bibilia i te Maseli 3:5: “Eiaha e turui i nia i to oe iho maramarama.” Titauhia râ, “ia tamau noa . . . i te ani atu i te Atua” te paari no te taa te Bibilia.—Iakobo 1:5.

3. A tamau i te haapii. E maitai atu â ta outou haapiiraa Bibilia mai te peu e tamau outou i te na reira i te oreraa e tamau i te rave.—Iosua 1:8.

4. A haapii ia au i te hoê tumu parau. Te hoê haapiiraa ia au i te hoê tumu parau ma te hiˈopoa eaha ta te Bibilia e parau ra no nia i te hoê tumu parau taa maitai, o te hoê ïa ravea no te haapii eaha ta te Bibilia e parau ra. Haamata na te “haapiiraa ta tatou i ite na,” e i muri iho e “haere ru anaˈe ïa i mua i te paari i te pae varua.” (Hebera 6:1, 2) E ite outou e nehenehe outou e faaau i te tahi irava i te tahi atu irava, no te ite e e rave rahi tuhaa o te Bibilia e faataa ra i te tahi atu, oia atoa te mau tuhaa “mea fifi ia taa.”—Petero 2, 3:16.

5. A ani i te tauturu ia vetahi ê. Te faaitoito ra te Bibilia ia farii i te tauturu no ǒ mai ia vetahi ê no te taa i te Bibilia. (Ohipa 8:30, 31) E pûpû te mau Ite no Iehova i te hoê haapiiraa Bibilia tamoni ore. Mai te mau Kerisetiano matamua, e faaohipa ratou i te mau irava no te tauturu i te tahi atu ia taa maitai eaha ta te Bibilia e haapii mau ra.—Ohipa 17:2, 3.

Eita e titauhia ia outou . . .

1. Te maramarama rahi aore ra ia haere atea i te haapiiraa. Ua taa i na 12 aposetolo a Iesu i te mau Papai e ua haapii ratou ia vetahi ê. Tera râ, no vetahi “aita [ratou] i haere i te haapiiraa e aita to [ratou] e tiaraa teitei.”—Ohipa 4:13.

2. Te moni. Nehenehe outou e haapii i te Bibilia ma te tamoni ore. Ua parau Iesu i ta ˈna mau pǐpǐ: “Mea horoa-noa-hia mai ta outou, a horoa noa atoa ïa.”—Mataio 10:8.