E nafea ia rave i te mau faaotiraa maitai?

Te pahonoraa a te Bibilia

Te horoa mai ra te Bibilia i te aratairaa maitai roa no te rave i te mau faaotiraa. E nehenehe te reira e tauturu ia tatou ia noaa mai te paari e te maramarama. (Maseli 4:5) I roto i te tahi mau tupuraa, e faaite roa mai te Bibilia eaha te mea maitai roa ˈˈe ia rave. Aore ra, e horoa mai te Bibilia i te aˈoraa o te tauturu ia tatou ia rave i te faaotiraa î i te paari.

I roto i teie tumu parau

• Te mau aratairaa o te tauturu ia rave i te hoê faaotiraa maitai

• E titauhia anei ia ˈu ia taui hoê faaotiraa ta ˈu i rave ê na?

• Eaha te rave i mua i te hoê faaotiraa tano ore mea fifi ia taui?

Te mau aratairaa o te tauturu ia rave i te hoê faaotiraa maitai

• Eiaha e ru. Te parau ra te Bibilia: “E haapao maitai . . . te taata feruriraa haroˈaroˈa i to ˈna mau taahiraa tataitahi.” (Maseli 14:15) Mai te peu e ru oe a rave ai i te hoê faaotiraa, eita paha oe e haapao i te tahi mau haamaramaramaraa faufaa mau. A rave i te taime no te feruri maite i nia i te mau mea atoa ta oe e nehenehe e rave.—Tesalonia 1, 5:21.

• Eiaha e faaoti noa ia au i to oe mau huru aau. Te faaara ra te Bibilia eita tatou e nehenehe e tiaturi i to tatou aau. (Maseli 28:26; Ieremia 17:9) Ei hiˈoraa, eita tatou e rave i te faaotiraa maitai ia riri, ia ahoaho, ia paruparu, ia ru aore ra ia rohirohi roa tatou.—Maseli 24:10; 29:22.

• A pure no te fanaˈo i te feruriraa paari. (Iakobo 1:5) Te oaoa nei te Atua i te pahono i taua mau pure ra. Ei Metua here, aita o ˈna e hinaaro ra ia fifihia ta ˈna mau tamarii. “Na Iehova hoi e horoa i te paari. No roto mai i to ˈna vaha te ite e te haroˈaroˈa.”a (Maseli 2:6) Te horoa ra o ˈna i te paari na mua roa na roto i ta ˈna Parau, te Bibilia.—Timoteo 2, 3:16, 17.

• 

  A rave i te mau maimiraa. No te rave i te mau faaotiraa maitai, mea faufaa ia noaa mai te mau haamaramaramaraa papu. Mai ta te Bibilia e parau ra, “e faaroo te taata feruriraa paari e e apo rahi mai oia i te haapiiraa.” (Maseli 1:5) Ihea oe e ite ai i te mau manaˈo papu o te tauturu iho â ia oe?

  A tahi, a hiˈo na i ta te Bibilia e parau ra no nia i te manaˈo ta oe e feruri ra. Inaha ua ite to tatou Atua poiete eaha te mea maitai roa ˈˈe no tatou, e itehia ïa te mau aˈoraa papu roa ˈˈe i roto i ta ˈna Parau. (Salamo 25:12) No te tahi mau faaotiraa, te horoa ra te Bibilia i te aratairaa papu roa, peneiaˈe na roto i te tahi ture taa maitai. (Isaia 48:17, 18) I roto râ i te tahi atu mau tupuraa, aita te Bibilia e parau roa ˈtu eaha te rave. E horoa ra te Bibilia i te aratairaa na roto i te hoê faaueraa tumu. E nehenehe te reira e tauturu ia tatou ia rave i te faaotiraa maitai, noa ˈtu e ere hoê â faaotiraa ta vetahi ê. No te ite i te mau irava Bibilia o te tauturu mai, a rave i te mau maimiraa i roto i te mau tumu parau aore ra papai niuhia i nia i te Bibilia, mai te mau mea piahia i nia i teie reni natirara.b

  No te tahi mau faaotiraa, e titauhia paha ia oe ia imi i te haamaramaramaraa i roto i te tahi atu mau papai papu. Ei hiˈoraa, hou a hoo mai ai i te tahi taoˈa moni roa, e mea î i te paari ia rave i te mau maimiraa no nia i tera taoˈa e te taiete e hoo nei i te reira, oia atoa i te mau faatureraa ia ino te taoˈa aore ra ia hinaaro oe e faahoˈi i te reira. Papu, e feruri atoa oe tera iho â anei te taoˈa ta oe e hinaaro mau ra.

  Te parau ra te Bibilia: “E ore te mau opuaraa e tupu ia ore ia anihia te manaˈo.” (Maseli 15:22) No reira, hou a rave ai i te tahi faaotiraa, a ani i te manaˈo o te mau taata tiaturihia. Ei hiˈoraa, mea î i te paari ia ani i te manaˈo o te hoê taote hou a rave ai i te tahi faaotiraa i te pae o te ea. (Mataio 9:12) I roto i te tahi mau tupuraa, e nehenehe oe e tauaparau e te taata tei faaruru hoê â tupuraa e to oe. Tera râ, a haamanaˈo e ere na te feia ta oe e ani i te manaˈo e rave i te faaotiraa. Na oe iho e faaoti e e ite i te mau faahopearaa o ta oe i maiti i te rave.—Galatia 6:4, 5.

• 

  A feruri maite i te mau tupuraa atoa. Ia au i te mau haamaramaramaraa atoa ta oe e fanaˈo, a papai i te mau maitiraa e vai ra, te mea maitai e te mea ino i te maitiraa tataitahi. Ma te haavare ore, a hiˈopoa i te mea e nehenehe e tupu a rave ai i tera e tera faaotiraa. (Deuteronomi 32:29) Ei hiˈoraa, eaha te tupu i nia ia oe, to oe utuafare aore ra vetahi ê a rave ai i tera faaotiraa? (Maseli 22:3; Roma 14:19) A pahono i tera uiraa ma te feruri i te mau faaueraa tumu Bibilia, e rave ïa oe i te faaotiraa î i te paari e te here.

• A rave i te hoê faaotiraa. I te tahi mau taime, eita paha tatou e hinaaro e rave i te faaotiraa no te mea aita tatou i papu roa. Ia na reira tatou, e nehenehe tatou e ere i te hoê tupuraa faufaa roa aore ra e faaruru i te hoê huru tupuraa au ore mau. Ia ore oe e rave i te hoê faaotiraa, e nehenehe te reira e faaauhia i te raveraa i te hoê faaotiraa ino. Ma te faaohipa i te hiˈoraa o te faaapu, te parau ra te Bibilia: “Eita te taata o te mataitai i te mataˈi e ueue i te huero maa, e eita te taata o te hiˈo i te ata e ooti.”—Koheleta 11:4.

A haamanaˈo atoa e eita te hoê faaotiraa maitai roa e riro ei faaotiraa tia roa. Pinepine, e aratai te mau faaotiraa ta tatou e rave ia haapae i te tahi atu mea. (Koheleta 9:11) A faaohipa i te mau haamaramarama papu e vai ra ia oe, e a rave i te faaotiraa maitai roa ˈˈe.

E titauhia anei ia ˈu ia taui hoê faaotiraa ta ˈu i rave ê na?

E, no te mea e nehenehe te mau tupuraa e taui aore ra aita paha te mau faahopearaa i tupu mai tei manaˈohia. No reira, e feruriraa paari ia hiˈo faahou i te tupuraa e ia maiti i te tahi atu ravea o te horoa mai i te mau faahopearaa e hinaarohia ra.

Tera râ, te vai ra te tahi mau faaotiraa eita e nehenehe e taui. (Salamo 15:4) Ei hiˈoraa, te titau ra te Atua i te tane e vahine faaipoipo ia faatura i ta raua euhe o te faaipoiporaa.c (Malaki 2:16; Mataio 19:6) Ia tupu noa mai te fifi, e titauhia te tutavaraa no te faatitiaifaro oioi i te reira e ia maoro ˈtu â to raua faaipoiporaa.

Eaha te rave i mua i te hoê faaotiraa tano ore mea fifi ia taui?

I te tahi mau taime, e hapehia tatou a rave ai i te hoê faaotiraa. (Iakobo 3:2, nota) Peneiaˈe e tatarahapa aore ra e faahapa tatou ia tatou iho. (Salamo 69:5) Oia mau, e nehenehe tera mau huru manaˈo e tauturu mai ia ore e rave faahou hoê â huru faaotiraa. (Maseli 14:9) Te faaara ra te Bibilia eiaha tatou ia faahapa rahi roa ia tatou iho ‘a horomii-roa-hia ˈi i te oto rahi.’ (Korinetia 2, 2:7)d “E Atua aroha hamani maitai e te aumihi o Iehova.” (Salamo 103:8-13) A huti i te haapiiraa i te hoê faaotiraa tano ore mea fifi ia taui, e a rave i tei maraa ia oe no te haamaitai mai.