E nafea ia vai taiva ore ia tamatahia to tatou faaroo?

1-2. Eaha tei tupu i to Iesu haapiiraa i te taata i Kaperenaumi?

“MEA huru ê roa teie parau, o vai hoi te farii i te reira?” (Ioa. 6:60) Teie ta e rave rahi pǐpǐ a Iesu i parau ia ˈna a faaroo ai i ta ˈna haapiiraa i Kaperenaumi. Ua parau hoi o ˈna: “Ia ore outou e amu i te tino o te Tamaiti a te taata nei e e inu i to ˈna toto, aita ïa e ora i roto ia outou. O te amu i to ˈu tino e o te inu i to ˈu toto, e noaa ïa ia ˈna te ora mure ore, e e faatia faahou mai au ia ˈna i te mahana hopea.”—Ioa. 6:53, 54.

² Ua huru ê roa te rahiraa o te mau pǐpǐ a Iesu i ta ˈna mau parau e ua faaea ratou i te pee ia ˈna. Te auraa anei, aita ratou i tiaturi ia ˈna? Eita. Hou Iesu a faahiti ai i teie mau parau, ua au roa ratou i ta ˈna i rave e ua parau roa ˈtu: “Teie mau â te Peropheta o te haere mai i roto i te ao nei.” (Ioa. 6:14) Tapao faaite ïa ua tiaturi iho â ratou ia Iesu. Tera râ, i te tamataraahia to ratou faaroo, ua faarue ratou ia ˈna.

3. Eaha ta te mau aposetolo a Iesu i rave, e no te aha? (A hiˈo atoa i te hohoˈa.)

³ Mea ê roa râ te huru o te mau aposetolo. I to Iesu aniraa ia ratou eita anei ratou e hinaaro atoa e faarue ia ˈna, ua pahono Petero: “E te Fatu, e haere ïa matou ia vai ra? Tei ia oe ra hoi te mau parau o te ora mure ore. Ua tiaturi matou e ua ite e o oe te tavini Moˈa a te Atua.” (Ioa. 6:68, 69) Ua tapao anei outou? Aita Petero i parau e ua taa ia ˈna e i te mau aposetolo te mau parau a Iesu. Noa ˈtu aita i papu ia ratou eaha te auraa o teie parau e amu i to ˈna iˈo e e inu i to ˈna toto, ua vai taiva ore ratou. No te aha? No te mea ua taa ia ratou o Iesu “te Mesia a te Atua.”—Luka 9:20, 35.

4. E nafea to tatou taiva ore e tamatahia ˈi?

⁴ E tamatahia to tatou taiva ore ia Iehova ia faaruru tatou i te tahi mau tupuraa. Ei hiˈoraa, mai te aha to tatou huru ia horoahia mai te tahi tatararaa apî no nia i te hoê irava Bibilia, ia ravehia te tahi mau tauiraa no nia i te pororaa, aore ra ia ore tatou ia taa no te aha Iehova e vaiiho ai ia roohia tatou i te fifi? E tamata-atoa-hia to tatou faaroo ia haamauiui mai te hoê hoa piri ia tatou aore ra ia rave ino mai te hoê taata ta tatou e faatura ra.

5. A faataa na no te aha mea faufaa ia pautuutu maitai to tatou faaroo. (Kolosa 1:23)

⁵ Ia taa ia tatou no te aha mea faufaa ia faatupu i te hoê faaroo papu, e rave mai tatou i te hiˈoraa o te hoê fare patuhia i te hoê vahi atâta. Ia ore teie fare ia parari i te aueueraa fenua, mea faufaa ia patuhia te reira i nia i te niu papu. Hoê â huru no to tatou faaroo. Ia mau papu tatou i mua i te mau fifi faahitihia i te paratarafa na mua ˈtu, mea faufaa ia pautuutu maitai to tatou faaroo. No reira, e atuatu maitai tatou i to tatou faaroo no te tamau noa i te tavini ia Iehova noa ˈtu te fifi.—Kor. 1, 15:58; a taio i te Kolosa 1:23.

6. Eaha tei tauturu i te mau aposetolo ia vai taiva ore ia Iesu?

⁶ Eaha tei tauturu i te mau aposetolo ia vai taiva ore ia Iesu? Noa ˈtu mea rahi tei faarue ia ˈna, ua papu ia ratou na Iehova i poiete i te mau mea atoa, mea tano ïa ia haamorihia o ˈna. Ua tiaturi atoa ratou o Iesu te Tamaiti a te Atua, e “parau o te ora mure ore” ta ˈna e te turu ra Iehova ia ˈna. I roto i teie tumu parau, eita tatou e hiˈo mai i te mau tupuraa atoa o te nehenehe e tamata i to tatou faaroo. E hiˈopoa râ tatou e toru haapiiraa o te tauturu mai ia tapea i te hoê faaroo papu: (1) O Iehova te Atua poiete. (2) No ǒ mai ia Iehova ra te Bibilia. (3) Te turu nei Iehova i to ʼna nunaa. Ua papu anaˈe ia tatou teie mau haapiiraa, e vai taiva ore ïa tatou noa ˈtu eaha ta tatou e faaruru.

O IEHOVA TE ATUA POIETE

7. Eaha ta te Apokalupo 4:11 e haamanaˈo mai ra, eaha râ te tupu ia ore tatou ia tiaturi i teie irava?

⁷ A taio i te Apokalupo 4:11. Te haamanaˈo mai ra teie irava na Iehova i poiete i te mau mea atoa. Mea tano iho â ïa ia haamori tatou ia ˈna. Hau atu, ia feruriruri tatou i to ˈna puai mana hope, e papu atu â ia tatou e mana iho â to ˈna no te faaora ia tatou i te mau fifi atoa. Tera râ, te turai ra Satani i te taata ia tiaturi aita e Atua. Ua tae atoa te tahi mau aivanaa i te parau ua tupu noa mai te mau mea atoa. No reira, aita anaˈe i papu ia tatou o Iehova te Atua poiete e mea here na ˈna ia tatou, e feaa tatou te vai mau ra anei te Atua e e nehenehe anei ta ˈna e tauturu ia tatou i roto i te ati.—Heb. 11:6.

8-9. Eaha te rave ia feaa noa ˈtu oe no nia ia Iehova? (A hiˈo atoa i te hohoˈa.)

⁸ Ia feaa noa ˈtu oe no nia ia Iehova, a rave oioi i te mau maimiraa i roto i ta tatou mau papai. I ǒ oe e ite ai i te mau haapapuraa o Iehova iho â te Atua poiete. Mea rahi te mau haamaramaramaraa i roto i na buka rairai La vie a-t-elle été créée? e Cinq questions à se poser sur l’origine de la vie. Te vai atoa ra te anairaa video “Mea poietehia anei?” i nia i te jw.org. Te na ô ra Jessica, te hoê tuahine apî no Marite: “Ia ˈu i taio i te buka rairai Origine de la vie, ua papu roa ia ˈu te vai ra iho â hoê Atua poiete î i te paari. Ua ite ê na vau na Iehova i poiete i te mau mea atoa. Tera râ, te vai ra te mau haapapuraa i roto i teie buka rairai o tei tauturu ia ˈu. I teie nei, aita roa ˈtu e feaaraa.” Ua hiˈopoa faahou te tahi mau taeae e tuahine i te buka Y a-t-il un Créateur qui se soucie de vous? Peneiaˈe ua taio atoa oe i teie mau papai. Mai te peu e e, e nehenehe oe e faahohonu atu â i teie haapiiraa.

⁹ I roto i ta oe iho haapiiraa, e nehenehe ïa ta oe e hiˈopoa i te mau haapapuraa e faaite ra te vai mau ra te hoê Atua. Eita teie haapiiraa e haapuai noa i to oe faaroo. E tauturu atoa râ ia oe ia haapii hau atu â no nia ia Iehova e to ˈna mau huru maitatai. (Roma 1:20) I muri iho, e faaohipa oe i ta oe i apo mai no te tauturu i te feia aita e tiaturi ra i te Atua. Eaha te manaˈo e tapea mai? Te horoa mai ra Iehova i te mau haapapuraa o ˈna iho â to tatou Atua poiete.

Ata mǎhu e repo puehu: IAC/RGO/David Malin Images; iˈa e pereoo: Mercedes-Benz USA; manureva: Kristen Bartlett/University of Florida

NO Ǒ MAI IA IEHOVA RA TE BIBILIA

10. Eaha to tatou manaˈo i te Bibilia? (Timoteo 2, 3:16, 17)

¹⁰ A taio i te Timoteo 2, 3:16, 17. Ua haapapai Iehova i te hoê poroi no te huitaata na roto i te Bibilia. E pahono teie buka i te mau uiraa faufaa roa ˈˈe o te oraraa. E faaite atoa mai o ˈna eaha to te Atua hinaaro e eaha ta ˈna e titau mai ra ia tatou. Inaha, ua papu ia tatou o Iehova te Fatu o te Bibilia, teie ïa te buka faufaa roa ˈˈe. Hinaaro tatou e taa maitai i ta ˈna Parau, e te tutava nei tatou i te faaohipa i te reira i roto i to tatou oraraa.

11. Eaha te haapapu ra ia oe no ǒ mai te Bibilia i te Atua ra?

¹¹ No te aha tatou e papu ai no ǒ mai te Bibilia ia Iehova ra? Ua rau te tumu. Mea tano te mau aamu atoa faahitihia i roto i te Parau a te Atua. (Luka 3:1, 2) Mea tano atoa tei parauhia i roto no nia i te natura. (Ioba 26:7) Noa ˈtu ehia taime to Satani tamataraa i te faaore i te Bibilia, teie te buka opere-roa ˈˈe-hia na te ao nei. E 40 taata tei papai i te Bibilia i te roaraa 1 600 matahiti. Noa ˈtu râ, tuati maitai to ratou manaˈo tataitahi. E horoa mai o ˈna i te mau aˈoraa e tano no te mau tau atoa, e te faufaahia ra e mirioni taata e tae roa mai i teie nei. (Mas. 13:20; 15:21; Mat. 7:12) Ua tupu e rave rahi parau tohu Bibilia. Tapao faaite ïa, e nehenehe iho â teie buka e tiaturihia. (Ios. 23:14) Oia mau, aita e feaaraa no ǒ mai te Bibilia i te Atua!

12. Eaha te rave ia feaa noa ˈtu tatou no nia i te Bibilia?

¹² Eaha te rave ia feaa noa ˈtu tatou no nia i te Bibilia? E pure anaˈe ia Iehova e ia haa tatou ia au i ta tatou mau pure. Te na ô ra Jordan, hoê taeae apî tei paari i roto i te parau mau: “Eita vau e tiaturi hanoa i tei parauhia mai ia ˈu. Mea faufaa no ˈu ia hiˈopoa maitai i te mau mea atoa. Papu, feaa iho â vau i te tahi taime. Tera râ, oioi vau i te rave i te mau maimiraa i roto i ta tatou mau papai no te ite i te pahonoraa o ta ˈu mau uiraa e no te tatara roa i te manaˈo feaa.” Ia papu maitai ia tatou o Iehova te Fatu o te Bibilia, e puai atu â ïa to tatou faaroo.—Kor. 1, 3:12, 13.

TE TURU NEI IEHOVA I TO ˈNA NUNAA

13. Eaha te mau uiraa e titauhia ia feruri no nia i te mau Ite no Iehova?

¹³ Ia feaa tatou o te mau Ite no Iehova te faanahonahoraa ta te Atua e faaohipa ra i teie mahana, eiaha e vaiiho i teie manaˈo ia uˈana mai. A ui ia oe iho: ‘O vai te tutava nei i te pee maite i te mau ture aveia o te Bibilia? O vai te tiaturi ra i ta te Bibilia e haapii ra? (Tim. 2, 4:3, 4) O vai te rave nei i te hinaaro o Iehova i teie mahana?’—Mat. 7:20, 21.

14. O vai ta te Atua e faaohipa nei no te faatupu i te parau tohu o te Mataio 24:14?

¹⁴ No te ite o vai te rave nei i te hinaaro o te Atua, e ui anaˈe: ‘O vai te rohi nei i roto i te ohipa pororaa ia au i ta Iesu i tohu no nia i te mau mahana hopea?’ (Mat. 24:14) Mea papu roa te pahonoraa. Te faaohipa nei Iehova i to ˈna nunaa, oia hoi te mau Ite no Iehova, no te faatupu i teie parau tohu. O tatou anaˈe te poro nei i te parau apî oaoa o te Faatereraa arii a te Atua na roto hau atu 240 fenua. Hau atu i te 100 matahiti tatou i te na reiraraa. No tatou, aita ˈtu ohipa faufaa roa ˈˈe maori râ te pororaa.—Mat. 28:19, 20.

15. E nafea te mau Ite no Iehova ia haamoˈa i te iˈoa o te Atua? (Mataio 6:9; Isaia 43:10)

¹⁵ A taio i te Mataio 6:9 e te Isaia 43:10. Te piihia ra tatou te mau Ite no Iehova, e e haapeuraa na tatou e amo i te iˈoa o te Atua. Aita te rahiraa o te taata i matau i teie iˈoa. O tatou râ, ua faahoˈi iho â tatou i te iˈoa o te Atua i to ˈna vairaa i roto i te Bibilia. Inaha te itehia ra te iˈoa Iehova hau atu 7 000 taime i roto i Te Bibilia, Huriraa o te ao apî.

16. No te aha e nehenehe tatou e parau te pee nei te mau Ite no Iehova i te faaueraa i roto i te Ioane 13:34, 35? (A hiˈo atoa i te hohoˈa.)

¹⁶ A taio i te Ioane 13:34, 35. I roto i ta Iehova faanahonahoraa, te itehia ra te here e te tahoê. Area teie ao, ua amahamaha ïa e ua î i te ino. Noa ˈtu aita tatou i paari i te hoê â fenua, e ere atoa hoê â oraraa to tatou, te tutava nei tatou paatoa i te faatupu i te hau e te here taeae. Ua haere ê na anei oe i te putuputuraa i te tahi atu amuiraa, peneiaˈe to oe revaraa i te ara? Mai te peu e e, ua ite ïa oe i te here e te auhoêraa e vai ra i rotopu i te mau taeae e tuahine. E haapapuraa teie te faaohipa nei te Atua i te mau Ite no Iehova no te faatupu i to ˈna hinaaro i teie mahana. Ia haamanaˈo tatou i te reira, e vai taiva ore tatou ia Iehova noa ˈtu eaha te fifi.

EIAHA ROA ˈTU E FAARUE IA IEHOVA

17-18. Eaha te tahi mau fifi ta tatou e faaruru nei, eaha râ ta tatou e nehenehe e tiaturi papu?

¹⁷ Te ora nei tatou i te mau mahana hopea mea fifi ia faaruru. Te auraa ïa, tatou pauroa te faaruru i te fifi. (Tim. 2, 3:1, 13) E farerei paha tatou i te tahi atu mau tupuraa fifi. E rave atoa paha ta Iehova faanahonahoraa i te tahi mau faaotiraa aita tatou e taa ra. E mauiui atoa paha tatou no ta te hoê hoa Kerisetiano i parau aore ra i rave. Eita paha tatou e ite i te ravea o to tatou fifi, aore ra aita ta tatou mau uiraa i pahonohia.

¹⁸ Noa ˈtu e aueue rii tatou i mua i teie mau tupuraa, e vai taiva ore noa tatou ia Iehova no te mea ua papu ia tatou o ˈna te Atua poiete, no ǒ mai ia ˈna ra te Bibilia e o te mau Ite no Iehova to ˈna nunaa. No reira, mai ia Petero e parau tatou ia Iehova: “E te Fatu, e haere ïa matou ia vai ra? Tei ia oe ra hoi te mau parau o te ora mure ore.”