Hoê manaˈo haava haapiihia i te mau aratairaa Bibilia

1-2. (1) Eaha te ô faahiahia ta Iehova i horoa ia Adamu raua Eva? (2) E nafea raua ia faaite i to raua mauruuru no teie ô?

MEA taa ê roa te taata i te mau animara e te mau matini. Eita te mau animara e feruri i ta ratou e rave nei. Hoê â huru no te mau matini, tei hamanihia no te tahi mau ohipa taa maitai. Area te taata, ua poiete Iehova ia ratou e ua horoa o ˈna i te hoê ô faahiahia mau: te tiamâraa e maiti. Maoti teie ô, e nehenehe ratou e rave i ta ratou iho mau faaotiraa. Te faaite ra te Bibilia ua poietehia te taata matamua ra o Adamu ia au i to te Atua hohoˈa e to ˈna huru. (Gen. 1:26, 27) No reira, ua nehenehe Adamu raua Eva ta ˈna vahine e rave i ta raua iho mau faaotiraa.

² Aita Iehova i horoa na raua hoê tapura ture era aˈe te roa. Te mea noa ta ˈna i ani ia raua, ia aupuru i te fenua, ia fanau i te tamarii e ia auraro ia ˈna. Na ˈna ïa e faaoti eaha ta raua e nehenehe e rave aore ra eita. (Gen. 1:28; 2:16, 17) E nafea ïa Adamu raua Eva e faaite ai i to raua mauruuru? Ma te faaohipa maitai ïa i teie ô, te tiamâraa e maiti. E nehenehe ïa ta raua e auraro i ta Iehova i ani atu. Mea na reira hoi raua e faaite ai i to raua mauruuru no te mau mea atoa ta Iehova i horoa mai, to raua here ia ˈna e to raua hinaaro e faaoaoa i to ˈna aau.—Mas. 23:15.

3. Eaha ta Adamu raua Eva i rave?

³ Mai ta te Bibilia e faaite ra aita Adamu raua Eva i faaohipa maitai i teie ô. Inaha ua faaroo ore raua ia Iehova. Ua haapao noa raua ia raua iho. Aita raua i here ia Iehova aore ra i faaite noa ˈˈe i te mauruuru. (Gen. 3:1-7) Tae roa mai i teie mahana, te mauiui nei te taata no ta raua faaotiraa.—Roma 5:12.

4. (1) Ia au i te Galatia 6:5, eaha te titauhia ia rave tatou? (2) Eaha ta tatou e hiˈopoa mai i roto i teie tumu parau?

⁴ Mea huru fifi to tatou oraraa. Pauroa te mahana, titauhia ia rave e rave rahi faaotiraa. (A taio i te Galatia 6:5.) Te mea iti e te mea rahi. E nafea râ ia faaoaoa ia Iehova i roto i ta tatou mau faaotiraa? Na mua roa, titauhia ia farii tatou i ta Iehova tauturu. (Mas. 16:3; Ier. 10:23) A hiˈo na ia Iesu. E taata tia roa o ˈna, ua imi râ o ˈna i te tauturu a to ˈna Metua. (Heb. 5:7) Mai te peu ua na reira Iesu ei taata tia roa, eaha ˈtu â ïa tatou ei taata hara. E hiˈo ïa tatou eaha te tauturu mai ia rave i te mau faaotiraa tano: to tatou ïa manaˈo haava.

EAHA TE MANAˈO HAAVA?

5. Eaha te manaˈo haava, e eaha to ˈna faufaaraa? (Roma 2:14, 15)

⁵ E tauturu mai to tatou manaˈo haava ia ite eaha te mea maitai e te mea ino. E manaˈo haava to tatou pauroa, tae noa ˈtu te taata aita i ite i te mau ture a te Atua. (Kor. 2, 4:2, nota) E au te manaˈo haava i te hoê haava i roto ia tatou o te faahapa mai ia rave tatou i te mea tano ore, aore ra o te faaite mai e ohipa maitai ta tatou i rave. (A taio i te Roma 2:14, 15.) E faaara mai o ˈna eiaha tatou e rave i te mea ino. (Sam. 1, 26:8-11) Aore ra e faaitoito mai o ˈna ia rave tatou i te mea tia. No reira, eita e navai noa te tiamâraa e maiti no te faaoaoa ia Iehova. E titau-atoa-hia te manaˈo haava e tano no te tauturu ia tatou ia ite eaha te mea maitai e te mea ino.

6. Eaha te nehenehe e tupu i nia i to tatou manaˈo haava?

⁶ I te tahi râ taime, e hape to tatou manaˈo haava no te mea e taata hara tatou. E hape atoa o ˈna no to tatou huru oraraa na mua ˈˈe, to tatou taˈere aore ra to tatou mau hinaaro tano ore. Te na ô ra te Bibilia e nehenehe te manaˈo haava e “paruparu,” e “viivii,” e “tapaohia i te auri ama” aore ra e “ino.” (Kor. 1, 8:12; Tito 1:15; Tim. 1, 4:2; Heb. 10:22) Eita ïa tatou e nehenehe faahou e rave i te faaotiraa tano. Mai te hoê faito mea hape, o te ore e faaite mai i te numera mea tano. No reira, mea faufaa ia atuatu maitai tatou i to tatou manaˈo haava. (Pet. 1, 3:16) E nafea ïa?

E NAFEA IA HAAPII I TO TATOU MANAˈO HAAVA?

7-8. (1) Eaha te tauturu ia tatou ia haapii i to tatou manaˈo haava? (2) E nafea te mau aratairaa Bibilia e tauturu ai ia tatou? A horoa i te hoê hiˈoraa. (A hiˈo atoa i te hohoˈa.)

⁷ E nafea ia haapii i te manaˈo haava? Ma te taio pinepine ïa i te Bibilia no te ite eaha te mea maitai e te mea ino no Iehova. Ia haapii tatou i ta ˈna mau ture, e taa ia tatou to ˈna manaˈo. Mai ta tatou i ite i roto i te tumu parau na mua ˈtu, ua haamauhia te mau ture no te tahi noa mau tupuraa. No reira, e titau-atoa-hia ia imi tatou i te tumu i muri mai i tera mau ture, ia taa maitai hoi ia tatou eaha to Iehova manaˈo e to ˈna huru aau.—Isa. 55:9.

⁸ E nehenehe to tatou oraraa e faaauhia i te hoê tere na te medebara. A feruri na aita e eˈa, aita e purumu e aita e tapao purumu. E nehenehe tatou e hiˈo i te mahana aore ra te apǎpǎraa fetia no te aratai ia tatou. Eita râ e navai. Mai te peu râ ua horoahia mai te hoê hohoˈa fenua e tapao to nia iho, mea maitai aˈe ïa. E faaite mai o ˈna mea tano to tatou tere. E faaara mai o ˈna ia hape noa ˈtu tatou. Ta tatou fa i roto i te oraraa, e faaoaoa ïa i to Iehova aau. E au te Bibilia i te hoê hohoˈa fenua o te faaite papu ia tatou e nafea ia faaoaoa ia Iehova. E au te mau aratairaa Bibilia i te mau tapao i te roaraa o to tatou tere. Ia haapao tatou i teie mau aratairaa, e raea iho â ia tatou tera fa, oia hoi e rave i to Iehova hinaaro.

9. Ia au i te Roma 9:1, eaha te tahi atu tauturu ta tatou e nehenehe e fanaˈo?

⁹ No te haapii i to tatou manaˈo haava, e hinaaro tatou i te tauturu a te varua moˈa o Iehova. (A taio i te Roma 9:1.) Maoti to ˈna varua moˈa, e taa ia tatou to ˈna manaˈo. E itoito-atoa-hia tatou ia rave i to Iehova hinaaro. (Phil. 2:13) Eaha râ te rave no te fanaˈo i te varua moˈa o Iehova?

10. E nafea ia fanaˈo i te varua moˈa? (Luka 11:10, 13)

¹⁰ A ani i to Iehova varua moˈa. (A taio i te Luka 11:10, 13.) Ia papu ia tatou e horoa mai iho â Iehova i to ˈna varua moˈa. (Ioa. 3:34) E horoa noa oia i te reira i te feia e pee ra i ta ˈna aratairaa. (Mas. 1:23; Iak. 1:5) Eaha ˈtu â te tauturu ia tatou?

11. (1) Eaha ta tatou fa matamua i roto i te oraraa? (2) No te aha e titauhia ia haapii-maitai-hia to tatou manaˈo haava?

¹¹ A imi noa i ta Iehova farii maitai. (Mas. 8:34, 35) Tera ta tatou fa matamua i roto i te oraraa. Ia haamanaˈo noa tatou i teie fa i roto i te mau tuhaa atoa o to tatou oraraa, e haere ia tatou ia haapii i to tatou manaˈo haava. Ia imi tatou i to Iehova manaˈo e ia haapao tatou i ta ˈna e au, i reira ïa to tatou manaˈo haava e afaro ai. Ia hiˈo tatou i te fifi o te oraraa, e taa ia tatou no te aha mea faufaa te hoê manaˈo haava haapii-maitai-hia. Pinepine tatou i te faaruru i te mau tupuraa aita e faahitihia ra i roto i te Bibilia. Ei hiˈoraa, e titauhia ia maiti tatou i te faaanaanataeraa, te ohipa, te haapiiraa aore ra te mau hoa e amuimui atu. E nafea râ ia ite ua mauruuru Iehova i ta tatou i maiti?—Kor. 2, 1:12.

12. E nafea tatou ia ite e tauturu papu to tatou manaˈo haava? (Ephesia 5:10)

¹² A feruriruri i te Parau a te Atua. (Sal. 49:3) Ia taio oe i te Bibilia, a imi i te mau aratairaa o te tauturu ia oe ia taa eaha to Iehova manaˈo. (A taio i te Ephesia 5:10.) Ma te na reira, ia û tatou i te fifi, e tauturu mai te mau aratairaa Bibilia ia ite ua haapii-maitai-hia anei to tatou manaˈo haava no te rave i te faaotiraa e tano. (Mas. 2:4-9, 11-13) Na te mau aratairaa Bibilia e tarai i to tatou manaˈo haava, a tauturu atu ai ia tatou ia faaea noa i nia i te eˈa o te ora.—Heb. 5:14.

13. I mua i te hoê faaotiraa, eaha ta tatou e ore e rave? A horoa i te hoê hiˈoraa.

¹³ Eiaha e rave i te faaotiraa a imi atu ai i te aratairaa Bibilia. Eiaha tatou e pee i te hiˈoraa o te ati Iseraela tei faaea i Iuda i te haamouraahia Ierusalema i 607 hou te tau o Iesu. Ua parau hoi ratou ia Ieremia: “Ia faaite mai Iehova to oe Atua ia matou i te eˈa ia na reira matou i te haere e eaha ta matou e rave e tia ˈi.” (Ier. 42:3-6) Tera râ, ua faaoti ê na ratou eaha te rave. I to Iehova pahonoraa ˈtu, aita ratou i afaro. Ua faaoti iho â ratou mai ta ratou i hinaaro. E ua roohia ratou i te ati i muri mai. (Ier. 42:19-22; 43:1, 2, 4) No reira, hou tatou a rave ai i te hoê faaotiraa, e imi anaˈe i te mau aratairaa Bibilia o te faaite mai eaha to Iehova manaˈo.

14. No te aha e titauhia ia niu i ta tatou mau faaotiraa i nia i te Bibilia?

¹⁴ A niu i ta oe mau faaotiraa i nia i te Bibilia. (Mat. 7:24-29; Iak. 1:23-25) Ia na reira oe, te vaiiho ra ïa oe i te varua moˈa o te Atua ia aratai ia oe. E tamau noa Iehova i te horoa mai i to ˈna varua moˈa. (Ohi. 5:32) Ia ore râ oe ia tâuˈa i to Iehova manaˈo, e “faainoino” aore ra e patoi oe i te ohipa a te varua moˈa. (Eph. 4:30; Isa. 63:10; Ohi. 7:51) E tae roa paha Iehova i te tatara i ta ˈna haamaitairaa. (Sal. 51:11; Tes. 1, 5:19) E tâpû ati ïa to muri mai, no te mea e hinaaro tatou i te puai e te itoito ta te varua moˈa e horoa mai.—Eph. 3:16.

E NAFEA IA ITEHIA MAI TE MAU ARATAIRAA BIBILIA?

15-16. (1) E nafea ia itehia mai te mau aratairaa Bibilia? (2) Eaha te mau aratairaa Bibilia e tauturu i te hoê piahi ia faaea i te puhipuhi i te avaava?

¹⁵ A faaohipa i te mau ravea maimiraa. No te ite mai i te mau aratairaa Bibilia, e titauhia ia faahohonu i ta tatou haapiiraa Bibilia. Ei hiˈoraa, eaha te rave aita anaˈe i taa i ta oe piahi mea ino ia puhipuhi i te avaava? E manaˈo paha o ˈna: ‘Aita hoi te Bibilia e faahiti ra i te reira. Nafea ïa vau e ite ai mea ino?’ E nafea oe ia tauturu ia ˈna ia imi i te mau aratairaa Bibilia? A faaohipa ïa i te buka Maimiraa Bibilia no te mau Ite no Iehova. E nehenehe oe e aratai ia ˈna i te upoo parau “Avaava.” I roto i tera tuhaa, te vai ra te tumu parau “Eaha to te Atua manaˈo i te puhipuhiraa avaava?” (A hiˈo i Te Pare Tiairaa o te 1 no Tiurai 2014.) Eaha te mau irava e aratairaa ta ˈna e ite ra?

¹⁶ E faahiti mai tatou e pae manaˈo. (1) Eiaha e riro ei tîtî no te tahi peu e aratai ia oe i te pohe. (Roma 6:16) (2) E ara tatou i te mau peu o te tuino i te tino. (Kor. 2, 7:1) (3) Hinaaro Iehova ia haamori tatou ia ˈna ma te taatoa. (Mat. 22:37) (4) Eiaha vetahi ê ia fifihia no ta tatou mau ohipa. (Mat. 22:39; Kor. 1, 10:24) (5) E horoa mai Iehova i te puai no te rave i te mea maitai. (Phil. 4:13) Parau mau, aita te puhipuhiraa avaava i faahitihia i roto i te Bibilia. E tauturu râ te mau aratairaa i te piahi ia taa i to Iehova manaˈo no nia i tera peu.

17. Ia faaineine te hoê taeae e tuahine i to raua faaipoiporaa, eaha te mau aratairaa Bibilia e tauturu ia raua?

¹⁷ Ia faaineine te hoê taeae e tuahine i to raua faaipoiporaa, eaha te mau aratairaa Bibilia e tauturu ia raua? E nehenehe raua e faaohipa i te buka Maimiraa Bibilia. I raro aˈe i te upoo parau “Oroa faaipoiporaa,” mea rahi te tumu parau e faahiti ra i te mau aratairaa Bibilia. E faahiti noa râ tatou e ono. (1) E titauhia ia faahanahanahia Iehova. (Kor. 1, 10:31, 32) (2) E ara tatou ia tura noa to tatou ahu e faaneheneheraa. (Tim. 1, 2:9; Pet. 1, 3:3, 4) (3) Eiaha tatou e pee i te mau peu a teie nei ao faaterehia e Satani. (Ioa. 17:14; Iak. 1:27; Ioa. 1, 2:15, 16) (4) E titauhia ia naho maitai teie oroa. (Kor. 1, 14:40) (5) E haapae tatou i te inu-hua-raa i te ava e te mau arearearaa ahoahoa. (Gal. 5:21) (6) Mea au atoa ia maiti tatou i te hoê tiaau ia tere maitai te oroa.—Ioa. 2:8, 9.

18-19. (1) Eaha te tahi atu buka faufaa e vai nei ia tatou? (2) Eaha te mau aratairaa o te tauturu ia oe ia ite eaha te mau oroa e tano ia apiti atu? (A hiˈo i te tumu parau tarenihia “E taa anei ia oe eaha to Iehova manaˈo?”)

¹⁸ Te vai ra te tahi atu buka faufaa, Te Bibilia e te oraraa Kerisetiano. E irava Bibilia to roto e tano no te mau tupuraa e rave rau. Ia maiti oe hoê tumu parau, e ite oe i te mau uiraa e te mau manaˈo tumu o te mau irava ta oe e nehenehe e faaohipa. Ei hiˈoraa, ia uiui te hoê Kerisetiano no nia i te hoê oroa, e haere o ˈna i te upoo parau “Oroa.” E ite mai o ˈna i teie tumu parau “Te mau oroa ta te mau Kerisetiano e patoi.”

¹⁹ I roto i tera tuhaa, te vai nei teie uiraa: “No te aha eiaha e apiti i te mau oroa a te haapaoraa hape?” (Kor. 1, 10:21; Kor. 2, 6:14-18; Eph. 5:10, 11) I muri iho, e faahitihia te tahi mau hiˈoraa. Te vai atoa ra te tuhaa “Te mau oroa aiˈa.” Maoti te mau irava faahitihia, e taa i te hoê Kerisetiano mea tano anei ia apiti atu i te mau oroa ta te faatereraa e nunaa e faatupu, te mau oroa haamanaˈoraa o te mau tamaˈi a te mau nunaa, aore ra te mau oroa o te faahanahana ra i te feia tiaraa teitei. Te mauruuru nei tatou i ta Iehova faanahonahoraa i te horoaraa mai i teie mau ravea maimiraa no te haapii i to tatou manaˈo haava!

IA PAPU IA OE UA TARAI-MAITAI-HIA TO OE MANAˈO HAAVA

20. E nafea tatou ia ite ua haapii-maitai-hia to tatou manaˈo haava?

²⁰ Te mauruuru nei tatou ia Iehova no teie ô, te tiamâraa e maiti. Ua ite râ tatou no te faaohipa maitai i tera ô, e titauhia ia haapii maitai i to tatou manaˈo haava. I reira ïa tatou e rave ai i te mau faaotiraa o te faaoaoa ia Iehova, e o te tuati i to ˈna hinaaro. No reira, e hinaaro tatou i ta ˈna tauturu. E tamau anaˈe ïa i te ani i to ˈna varua moˈa e i te vaiiho i te reira ia ohipa i nia ia tatou. E tauturu atoa mai te mau aratairaa Bibilia ia haapii i to tatou manaˈo haava. Ia faaohipa tatou i teie mau ô ma te tano, i reira ïa tatou e ite ai i te puai o te Parau a te Atua i roto i to tatou oraraa.—Tim. 2, 3:16, 17; Heb. 4:12.