A faaohipa i te Bibilia ma te aravihi

1. No te aha e mea faufaa roa ˈi te Bibilia?

¹ E tauturu mai te faaohiparaa ma te aravihi i te parau faaurua a te Atua ia poro e ia haapii atu i te parau mau ma te maramarama e ia faaite atu i te mau haapiiraa e tutuu hape a te taata.—Tim. 2, 2:15; Pet. 1, 3:15.

2. Eaha te tauturu mai ia ite ohie i te mau irava?

² A haamatau atu â: I te ohipa tatou e aravihi ai. Ia taio tatou i te taatoaraa o te Parau a te Atua, e ite tatou i te manaˈo tumu o te Bibilia. E tauturu atoa mai te reira ia haamanaˈo e ia ite ohie mai i te mau irava. A haamaitai ai outou i to outou ite i te mau Papai, e poro outou ma te anaanatae e te papu atu â i roto i te tuhaa fenua e ma te faanaho-ore-hia.—Tes. 1, 1:5.

3, 4. (a) E nafea ia haamatau atu â i te Bibilia? (b) Ua faaohipa anei outou i te tahi atu mau ravea?

³ I te mau putuputuraa, a haamatau ia outou ia rave e ia pee i te taioraa i roto i te Bibilia. I roto i ta outou iho haapiiraa e faaineineraa i te mau putuputuraa a te amuiraa, a taio i te mau irava i faahitihia e a feruriruri e nafea ia faaohipa i te reira. No e rave rahi, e faaohie te taio-roa-raa i te mau irava i roto i te Bibilia, eiaha râ i nia i te roro uira aore ra i te papie, i te maimi-faahou-raa ˈtu i roto i te taviniraa.—Ioa. 14:26.

⁴ Ua faanaho te tahi mau utuafare i te tamau aau i te mau irava Bibilia. E faaohipa vetahi i te mau tareta: e buka, pene, irava to te hoê pae e te irava iho i te tahi atu pae. Te tahi i muri i te tahi, e tamata ratou i te faahiti aau i te irava aore ra i te haamanaˈo ihea te reira i te papairaahia. E aravihi-atoa-hia ia faaineine tatou i te mau faaiteraa e ia pahono i te hoê patoiraa aore ra i te hoê uiraa ma te faaohipa i te Bibilia.

5. No te aha e faaaravihi atu â ˈi i te faaohipa i te Bibilia?

⁵ Aita e buka faufaa aˈe i te Bibilia. Aita e papai ê atu e nehenehe ai te taata e paari no te ora. (Tim. 2, 3:15) I te mea e aita te rahiraa o te taata i ite i te mau taoˈa faufaa rahi e vai ra i roto i te Bibilia, e tumu maitai ïa ia faaaravihi atu â tatou ia tatou no te faaite eaha ta te Bibilia e pûpû mau ra.—Mas. 2:1-5.