Mea maitai no tatou ia vai piri noa i te mau taeae e tuahine

1-2. Eaha te mea faufaa no Iehova, e eaha ta ˈna e hinaaro ra ia rave tatou?

MEA faufaa no Iehova to tatou huru i nia ia vetahi ê. Ua haapii hoi Iesu ia here tatou i to tatou taata tupu mai ia tatou iho. (Mat. 22:37-39) E hamani maitai tatou ia vetahi ê, oia atoa te feia aita e tavini ra ia Iehova. Ia na reira tatou, te pee ra ïa tatou i te hiˈoraa o Iehova. E faahiti o ˈna “i to ˈna mahana i nia i te feia ino e te feia maitai atoa e e haamairi oia i te ûa i nia i te feia parau-tia e te feia parau-tia ore atoa.”—Mat. 5:45.

² Mea here na Iehova i te mau taata atoa, i te feia iho â râ o te auraro ia ˈna. (Ioa. 14:21) Te hinaaro ra o ˈna ia pee tatou i to ˈna hiˈoraa. No reira, te faaitoito mai ra Iehova ia “here rahi” tatou i te mau taeae e tuahine e ia faaite roa ˈtu i to tatou “here” ia ratou. (Pet. 1, 4:8; Roma 12:10) Ia feruri tatou i teie here, e puta mai paha to tatou here no to tatou utuafare aore ra no te hoê hoa piri.

3. Ia haamanaˈo tatou i te aha no nia i te here?

³ E au te here i te hoê tiare. Ia tupu maitai teie tiare e titauhia ia atuatu maite tatou i te reira. Ua horoa te aposetolo Paulo i teie aˈoraa i te mau Kerisetiano: “A tamau noa i te here te tahi i te tahi ei taeae.” (Heb. 13:1) Mea papu, te hinaaro ra Iehova ia tamau tatou i te here ia vetahi ê. Ta tatou ïa e hiˈopoa mai i roto i teie tumu parau. E ite mai tatou no te aha mea faufaa ia faahoa tatou i te mau taeae e tuahine e e nafea ia tamau i te na reira.

NO TE AHA IA VAI PIRI TATOU TE TAHI I TE TAHI?

4. Ia au i te Salamo 133:1, e nafea tatou e haafaufaa noa ˈi i te auhoêraa e vai ra i rotopu ia tatou? (A hiˈo atoa i te hohoˈa.)

⁴ A taio i te Salamo 133:1. Ua tu to tatou manaˈo i to te papai Salamo tei faahiti e “mea maitai” e “mea au” ia faahoa i te feia o te here nei ia Iehova. E ara râ tatou. No te aha? Teie te tahi hiˈoraa. E nehenehe te tahi taata e haafaufaa ore i te hoê tumu raau nehenehe mau. I matau noa na paha o ˈna i te ite i teie tumu raau i te mau mahana atoa. Hoê â huru no tatou. E nehenehe tatou e haafaufaa ore i te auhoêraa e vai ra i rotopu ia tatou. Inaha hoi, pinepine tatou i te farerei i te mau taeae e tuahine, peneiaˈe e rave rahi taime i te hebedoma. E nafea ïa tatou e tamau noa ˈi i te faaite i to tatou here i te mau taeae e tuahine? E rahi atu â to tatou here ia ratou ia rave tatou i te taime no te feruri no te aha mea faufaa roa ratou no tatou e i roto i te amuiraa.

5. Eaha tei tupu i nia ia vetahi ê i to ratou iteraa e te here mau ra tatou te tahi i te tahi?

⁵ Ua putapû roa vetahi i to ratou iteraa i te here e vai ra i rotopu ia tatou, a haere mai ai ratou i te putuputuraa no te taime matamua. Maoti te reira, e taa paha ia ratou e tei ia tatou ra te parau mau. Ua parau hoi Iesu: “I te mea e mea here outou te tahi i te tahi, e ite ïa te taata atoa e e pǐpǐ outou na ˈu.” (Ioa. 13:35) Teie te hiˈoraa o Chaithra. Tei te haapiiraa tuatoru o ˈna a haamata ˈi i te haapii i te Bibilia. Farii atura o ˈna i te titau-manihini-raa no te haere i te hoê tairururaa e toru mahana. I te hoperaa te mahana matamua, ua parau o ˈna i te tuahine e haapii ra ia ˈna: “Aita to ˈu na metua i tauahi noa ˈˈe ia ˈu. Hoê noa mahana vau i ǒ nei, e mea rahi te taata tei tauahi mai ia ˈu. Ua ite roa vau i te here o Iehova na roto ia ratou e te hinaaro nei au e riro ei mero no teie utuafare pae varua.” Ua tamau ïa Chaithra i ta ˈna haapiiraa, ua rave atoa i te mau tauiraa i roto i to ˈna oraraa e ua bapetizohia o ˈna i 2024. Oia mau, ia ite te taata i ta tatou mau ohipa maitatai, e te here e vai ra i rotopu ia tatou, e hinaaro roa ratou e tavini ia Iehova.—Mat. 5:16.

6. E nafea tatou e paruruhia ˈi ia vai piri noa i te mau taeae e tuahine?

⁶ E paruruhia tatou ia vai piri noa tatou i te mau taeae e tuahine. Ua parau Paulo i to ˈna mau hoa Kerisetiano: “A tamau noa . . . i te faaitoito te tahi i te tahi i tera e tera mahana, . . . ia ore hoi te aau o te hoê o outou ia etaeta i te puai haavare o te hara.” (Heb. 3:13) Oia nei, ia toaruaru tatou a hahi ê roa ˈtu ai, e nehenehe Iehova e faaohipa i te hoê hoa Kerisetiano no te tauturu e no te faaitoito ia tatou.—Sal. 73:2, 17, 23.

7. Eaha te taairaa e vai ra i rotopu i te here e te auhoêraa? (Kolosa 3:13, 14)

⁷ Te fanaˈo nei tatou e rave rahi haamaitairaa no te mea te tutava ra tatou i te faaite i te here te tahi e te tahi. (Ioa. 1, 4:11) Ei hiˈoraa, e turai to tatou here ia “faaoromai noa te tahi i te tahi” e maoti te reira e vai noa ˈi te auhoêraa i rotopu ia tatou. (A taio i te Kolosa 3:13, 14; Eph. 4:2-6) No reira, aita ˈtu vahi e itehia ˈi teie huru tahoê e oaoa maori râ i ta tatou mau putuputuraa.

IA FAATURA TATOU TE TAHI I TE TAHI

8. E nafea Iehova e tauturu ai ia tatou ia vai piri noa i to tatou mau taeae e tuahine?

⁸ Noa ˈtu to tatou huru tia ore, maoti Iehova e vai noa ˈi te auhoêraa i rotopu i te mau taeae e tuahine na te ao nei. (Kor. 1, 12:25) Te parau ra te Bibilia: “Ua haapiihia [tatou] e te Atua ia here te tahi i te tahi.” (Tes. 1, 4:9) Te auraa, e faaohipa Iehova i te Bibilia no te faaite ia tatou e nafea ia vai piri noa te tahi i te tahi. E “haapiihia [tatou] e te Atua” ia hiˈopoa maitai tatou i ta ˈna mau haapiiraa e ia faaohipa tatou i te reira. (Heb. 4:12; Iak. 1:25) O ta te mau Ite no Iehova ïa e tutava ra i te rave.

9. Eaha ta tatou e haapii mai i te Roma 12:9-13 no nia i te faufaaraa ia faatura ia vetahi ê?

⁹ E nafea te Parau a te Atua e haapii ai ia tatou ia vai piri noa te tahi i te tahi? A hiˈo na eaha ta te aposetolo Paulo i faahiti i roto i te Roma 12:9-13. (A taio.) A tapao na e ua parau Paulo: “Ia ru outou i te faatura ˈtu te tahi i te tahi.” Eaha ïa te auraa? Te auraa, e titauhia ia imi tatou i te mau ravea atoa no te faaite i to tatou here ia vetahi ê ma te faaore i te hapa, ma te farii maitai ia ratou e ma te faatupu i te aau horoa noa. (Eph. 4:32) Eita tatou e tiai roa na te mau taeae aore ra tuahine e tapiri mai ia tatou. Na tatou râ e rave i te taahiraa matamua. Mai ta Iesu hoi i parau: “E rahi aˈe te oaoa ia horoa ˈtu ia horoahia mai.”—Ohi. 20:35.

10. E nafea tatou e faaite ai i te itoito rahi no “te faatura ˈtu te tahi i te tahi”? (A hiˈo atoa i te hohoˈa.)

¹⁰ Papu, ua parau Paulo ia ru tatou i te faatura ˈtu te tahi i te tahi. I muri mai râ, ua parau o ˈna: “Eiaha ia faahupehupe i te rave i ta outou ohipa.” Te auraa, e titauhia ia faaite tatou i te itoito rahi no te rave i te hoê ohipa. Ia horoahia mai te tahi hopoia na tatou, e haapao maitai tatou i te reira. Te faaitoito mai ra te Maseli 3:27, 28: “Eiaha e tapea i te maitai i te feia mea tano ia hamani maitai oe mai te peu e nehenehe ta oe e tauturu atu.” No reira, ia ite tatou e te hinaaro ra te tahi taata i te tauturu, e imi ïa tatou i te mau ravea atoa no te tauturu ia ˈna i tera iho â taime. Eita ïa tatou e haamarirau, e tiai aore ra e tiaturi na vera ma e tauturu ia ˈna.—Ioa. 1, 3:17, 18.

11. Eaha te tauturu ia tatou ia vai piri noa te tahi i te tahi?

¹¹ Te tahi atu ravea e faatura ˈi tatou ia vetahi ê ma te faaore oioi ïa i ta ratou mau hapa. Te parau ra te Ephesia 4:26: “Eiaha te mahana ia topa e te riri noa ra outou.” No te aha hoi? Te faaite ra te irava 27: “Eiaha roa e tuu i te Diabolo i te tahi ravea no te faahema ia outou.” No reira, i roto i ta ˈna Parau, pinepine Iehova i te faaitoito ia tatou ia faaore i te hapa te tahi i te tahi. Te na ô ra te Kolosa 3:13: “Ia hapa noa mai te tahi ia oe, a faaore noa ˈtu ïa i ta ˈna hapa.” Oia mau, ia na reira tatou e piri noa ïa tatou ia vetahi ê. Te tutava atoa ra tatou “ia vai â te autahoê ta te varua moˈa e faatupu, e te hau e tahoê ra ia [tatou].” (Eph. 4:3) No reira, ia faaore tatou i ta vetahi ê mau hapa te haa ra tatou ia vai noa te hau e te auhoêraa i rotopu ia tatou e ratou.

12. E nafea Iehova e tauturu ai ia tatou ia faaore i ta vetahi ê hapa?

¹² Parau mau, ia haamauiui te hoê taata ia tatou e ere roa ˈtu i te mea ohie ia faaore i ta ˈna hapa. E haere râ ia tatou ia na reira maoti te varua o te Atua. Ua ite mai tatou e te ani ra te Bibilia ia “here mau [tatou] te tahi i te tahi” e “eiaha roa ˈtu e faahupehupe i te rave i te ohipa.” Tera râ, te parau atoa ra te Bibilia ‘ia faaitoitohia tatou e te varua moˈa.’ Eaha ïa te auraa? Te auraa, maoti te varua moˈa o te Atua e itoito-roa-hia ˈi tatou no te rave i te mea maitai. (Roma 12:11) E nehenehe hoi te varua moˈa o te Atua e tauturu ia tatou ia faaite i te here e ia faaore i te hapa a vetahi ê. No reira, mea faufaa ia tamau tatou i te ani ia Iehova ia tauturu mai.—Luka 11:13.

“EIAHA E FAATUPU I TE AMAHAMAHA I ROTOPU IA OUTOU”

13. Eaha te tumu e amahamaha ˈi te amuiraa?

¹³ I roto i te amuiraa, te vai ra “te mau huru taata atoa,” e mea taa ê te taata tataitahi. (Tim. 1, 2:3, 4) Ia ore tatou ia vai ara, e nehenehe teie mau taa-ê-raa e faaamahamaha i te amuiraa i roto i te tahi mau tuhaa haihai mai te maitiraa i te ahu anei, te huru faaneheneheraa, te mau ravea rapaauraa ta tatou i farii aore ra te mau faaanaanataeraa. (Roma 14:4; Kor. 1, 1:10) Inaha, ua haapii te Atua ia here tatou te tahi i te tahi, e ara ïa tatou eiaha roa ˈtu ia manaˈo e mea maitai aˈe ta tatou mau faaotiraa i ta vetahi ê.—Phil. 2:3.

14. Eaha ta tatou e tutava i te rave e no te aha?

¹⁴ Eita te amuiraa e amahamaha mai te peu e tutava tatou i te faaitoito ia vetahi ê i te mau taime atoa. (Tes. 1, 5:11) Aita i maoro aˈenei, e rave rahi hoa Kerisetiano tei atea ê ia Iehova aore ra tei tuuhia i rapae i te amuiraa e ua hoˈi mai i roto i ta Iehova faanahonahoraa. E oaoa ïa tatou i te farii maitai ia ratou! (Kor. 2, 2:8) A hiˈo na i tei tupu no te hoê tuahine. A tahi ra o ˈna a hoˈi faahou mai ai i te putuputuraa i muri aˈe ahuru matahiti. Te na ô ra o ˈna: “Ma te mata ataata, ua haere mai pauroa te mau taeae e tuahine e farii maitai ia ˈu.” (Ohi. 3:19) Eaha ïa te huru o teie tuahine i muri mai? Te faatia ra o ˈna: “Mai te huru ra e ua ite roa vau i te rima o Iehova o te tauturu mai ia ˈu ia oaoa faahou.” Oia nei, ia tutava tatou i te faaitoito ia vetahi ê e nehenehe Iesu e faaohipa ia tatou no te tamahanahana i te feia atoa “e rohirohi e e teimaha nei.”—Mat. 11:28, 29.

15. Eaha ˈtu â ta tatou e rave ia vai hoê noa te amuiraa? (A hiˈo atoa i te hohoˈa.)

¹⁵ Ia vai hoê noa te amuiraa, e titau-atoa-hia ia vai ara tatou i ta tatou mau parau. Te na ô ra te Ioba 12:11: “E ore anei te tariˈa e hiˈopoa i te mau parau mai te arero e tamata i te maa?” Ei hiˈoraa, ia tunu tatou i te maa, e tamata tatou i te reira no te ite mea au anei, hou a horoa ˈi na vetahi ê. Hoê â huru no ta tatou mau parau, e feruri maitai tatou hou a paraparau ai. (Sal. 141:3) Ta tatou fa, e faahiti noa i te mau parau faaitoito e tamahanahana “a faufaahia ˈtu ai te feia e faaroo ra.”​—Eph. 4:29.

16. O vai ma te titauhia ia faahiti i te mau parau faaitoito?

¹⁶ O te mau tane faaipoipo e te mau metua iho a râ te titauhia ia haapao maitai i ta ratou mau parau. Ia faahiti noa ratou i te mau parau faaitoito e tia ˈi! (Kol. 3:19, 21; Tito 2:4) Ei tiai mamoe, e titau-atoa-hia i te mau matahiapo ia faaitoito e ia tamahanahana i te nǎnǎ a Iehova. (Isa. 32:​1, 2; Gal. 6:1) Te na ô ra te Maseli 15:23: “Te hoê parau e faahitihia i te taime tano, auê te au e!”

A FAAITE I TE HERE NA ROTO I TE ‘OHIPA E TE PARAU MAU’

17. E nafea tatou e haapapu ai e mea here iho â na tatou i te mau taeae e tuahine?

¹⁷ Ua faaitoito te aposetolo Ioane “ia here tatou, eiaha ïa ei parau noa, ei here ohipa râ e te parau mau.” (Ioa. 1, 3:18) Te hinaaro ra tatou e faaite i te here mau i to tatou mau taeae e tuahine. E nafea ïa? Ia pinepine tatou i te amuimui i te mau taeae e tuahine, e piri atu â tatou te tahi i te tahi e e puai atu â to tatou here ia ratou. E amui anaˈe ïa ia ratou i te mau putuputuraa e i roto i te pororaa. E tutava atoa tatou i te rave i te taime no te farerei ia vetahi ê. Ia na reira tatou, te faaite ra ïa tatou e “ua haapiihia [tatou] e te Atua ia here te tahi i te tahi.” (Tes. 1, 4:9) Hau atu, e tamau tatou i te ite e “mea maitai e mea au ia parahi amui te mau taeae ei hoê!”—Sal. 133:1.