No te aha te tamaˈi e te faahuehueraa e tupu noa ˈi?

TE HARA

Ua poiete te Atua i to tatou na metua matamua, o Adamu raua Eva, ia au i to ˈna huru. (Genese 1:27) Te auraa, e faatupu ïa raua i te mau huru maitatai o te Atua, mai te hau e te here. (Korinetia 1, 14:33; Ioane 1, 4:8) Tera râ, aita raua i faaroo ia ˈna e ua hara raua. Te faahopearaa, ua raea tatou paatoa i te hara e te pohe. (Roma 5:12) No te hara e tupu mai ai te manaˈo e te ohipa ino.—Genese 6:5; Mareko 7:21, 22.

TE MAU FAATERERAA TAATA

Aita te Atua i poiete ia tatou e na tatou e faatere ia tatou iho. Te na ô ra te Bibilia: “Aita e tiaraa to te taata e haere ra ia aratai i to ˈna mau taahiraa.” (Ieremia 10:23) Te auraa, eita e haere i te mau faatereraa a te taata ia faaore i te tamaˈi e te faahuehueraa.

SATANI E TA ˈNA MAU DEMONI

Te parau ra te Bibilia “te vai nei . . . to te ao atoa i raro aˈe i te mana o te varua ino.” (Ioane 1, 5:19) O Satani te Diabolo taua “varua ino” ra, e taparahi taata atoa o ˈna. (Ioane 8:44) O ˈna ïa e te mau demoni te tumu e tupu ai te tamaˈi e te faahuehueraa.—Apokalupo 12:9, 12.