Te maitai e te ino: Na te aha e aratai ra i te rahiraa o te taata?

Te farii nei te taatoaraa e mea ino aore ra mea maitai te tahi mau haerea. Ei hiˈoraa, te taparahiraa taata, te maferaraa e te rave-ino-raa i te tamarii, e faautuahia ïa. Area te parau-tia, te hamani maitai e te aumauiui, mea maitai ïa. I roto râ i te tahi atu mau tuhaa, mai te taotoraa i te hoê apiti, te haerea afaro aore ra te tiaraa metua, mea rahi o te tiaturi ra na te taata tataitahi e faaoti eaha te mea ino e te mea maitai. Pinepine te taata i te rave i ta ratou mau faaotiraa ia au i to ratou huru aau aore ra te manaˈo o te feia e haaati ra ia ratou. Mea maitai anei râ tera huru raveraa?

TO TATOU HURU AAU

Pinepine na to tatou mau huru aau e aratai ia tatou, aore ra to tatou manaˈo haava, oia hoi te tiaraa ia ite eaha te mea maitai e te mea ino. (Roma 2:14, 15) Ei hiˈoraa, ua ite te mau tamarii e mea tano ore te tahi ohipa e ia rave ratou i te hoê ohipa ino, e faahapa ratou ia ratou. A paari ai, e haapii tatou eaha te mea maitai e te mea ino ma te amuimui i to tatou mau fetii, hoa, aore ra i roto i ta tatou haapaoraa. Ia rave tatou i te mau faaotiraa, i reira e itehia ˈi e tuati anei te reira i ta tatou i haapii aore ra eita.

E turai to tatou manaˈo haava ia tatou ia faaite i te aumauiui, te mauruuru e te aumihi i nia ia vetahi ê e ia ore e maitiiti i te taata. E tapea atoa te reira ia tatou ia haamauiui i te feia ta tatou e here ra aore ra ia rave i te hoê ohipa e haama ˈi tatou, a faahapa ˈtu ai ia tatou.

E aratairaa papu anei to tatou mau huru aau? Te na ô ra te hoê taurearea o Garrick te iˈoa: “I roto i to ˈu oraraa, na ˈu e faaoti eaha te mea maitai e te mea ino.” I muri mai râ ua fifihia o ˈna. Te faataa ra oia: “Ua rave au i te peu taotoraa tia ore, te raau taero, te haavîraa uˈana e ua inu hua i te ava.”

TO VETAHI Ê MANAˈO

Pinepine atoa tatou i te pee i to vetahi ê manaˈo i ta tatou mau faaotiraa. Ma te na reira e fanaˈo tatou i to ratou ite i te oraraa e to ratou paari. E auhia mai ïa tatou e to tatou utuafare e hoa.

E aratairaa papu anei to vetahi ê manaˈo? I to ˈna taurearearaa, ua matau roa Priscila i te rave mai to ˈna mau hoa, oia hoi e taoto e rave rahi apiti. Aita râ o ˈna i oaoa i roto i to ˈna oraraa. Ua parau o ˈna: “Ma te rave mai ia ratou, ua inohia to ˈu upoo, a rave atu ai i te mau ohipa maamaa e te atâta.”

TE VAI RA ANEI TE RAVEA MAITAI AˈE?

Parau mau, ia faaoti tatou eaha te mea maitai e te mea ino, e haapao tatou i to tatou mau huru aau e to vetahi ê manaˈo. Tera râ, eita teie raveraa e tauturu ia tatou. I te tahi taime, e mauiui tatou aore ra vetahi ê no te faahopearaa o ta tatou mau faaotiraa. (Maseli 14:12) E manaˈo paha tatou e vetahi ê mea maitai tera faaotiraa. Aita râ e haapapuraa aita e fifi i muri mai. E taui atoa to tatou manaˈo. Inaha, te mau ohipa ta tatou i manaˈo mea ino, te fariihia nei. E ta tatou i manaˈo mea maitai, aita ïa e tano faahou ra.

Te vai ra anei te hoê aratairaa papu o te tauturu ia tatou ia ite eaha te mea maitai e te mea ino? Te vai ra anei te hoê aratairaa ta tatou e nehenehe e tiaturi, a ore atu ai e tatarahapa?

Te vai ra te hoê aratairaa papu no te taata atoa ati aˈe te ao nei. E faaite mai to muri nei tumu parau ihea tatou e fanaˈo ai i teie aratairaa o te tauturu ia tatou ia faaoti eaha te mea maitai e te mea ino.