3 | Te tauturu a te mau hiˈoraa Bibilia

TE FAATAA RA TE BIBILIA . . . E tane e e vahine haapao maitai “mai ia tatou te huru.”—IAKOBO 5:17.

Eaha te auraa?

Ua î te Bibilia i te aamu o te mau tane e vahine tei faaruru e rave rau fifi o tei faatoaruaru roa ia ratou. A taio ai i teie mau aamu, e itehia mai paha ia tatou te tahi o tei faaruru i te hoê â tupuraa e to tatou.

E nafea te reira e tauturu ai?

Pauroa tatou te hinaaro ra ia taa vetahi ê i to tatou mau huru aau, i te taime iho â râ e faaruru ai tatou i te hoê maˈi manava. Ia taio tatou i te tahi mau hiˈoraa Bibilia, e ite tatou e hoê â manaˈo e huru aau to ratou e to tatou. E ite ïa tatou e e ere o tatou anaˈe te faaruru i te reira e eita tatou e moˈemoˈe faahou.

I roto i te Bibilia, ua tapaohia te parau a te tahi mau taata aau faatoaruaru. Ua manaˈo aˈena anei outou, ‘Eita e haere faahou ia ˈu ia faaoromai?’ Tera atoa ta Mose, ta Elia e ta Davida i manaˈo.—Numera 11:14; Te mau arii 1, 19:4; Salamo 55:4.
Te faahiti ra te Bibilia i te hiˈoraa o te hoê vahine o Hana te iˈoa. Te parauhia ra e “ua rahi roa to [ˈna] mauiui” no te mea eita ta ˈna tamarii e noaa e e faaooo-noa-hia o ˈna e te tahi atu vahine a ta ˈna tane faaipoipo.—Samuela 1, 1:6, 10.
Te faahiti ra te Bibilia i te hiˈoraa o te hoê tane o Ioba te iˈoa. Noa ˈtu e taata faaroo puai oia, ua parau roa o ˈna no te toaruaru rahi: “Mea faufau na ˈu to ˈu oraraa. Aita vau e hinaaro faahou ra i te ora.”—Ioba 7:16.

Ia ite tatou mea nafea i noaa ˈi i teie mau hiˈoraa Bibilia i te haavî i to ratou mau manaˈo toaruaru, e puaihia tatou no te faaoromai tamau i te tupuraa hepohepo.

E nafea te Bibilia e tauturu ai?—Kevin

To ˈu faarururaa i to ˈu huru tauiui noa

“E maˈi manava to ˈu e tauiui noa ˈi to ˈu huru, i te 50 matahiti i te iteraahia mai te reira. I te tahi taime, mea itoito roa vau. I te tahi râ taime, aita vau e hinaaro faahou e ora.”

E nafea te Bibilia e tauturu ai ia ˈu?

“Mea au na ˈu te hiˈoraa o te aposetolo Petero. No ta ˈna mau hape, ua manaˈo o ˈna mea faufaa ore o ˈna. Ua tamata oia i te faatitiaifaro i to ˈna huru feruriraa ma te amuimui i to ˈna mau hoa tei tâuˈa mau ia ˈna. Ia uˈana to ˈu maˈi, e manaˈo atoa vau e mea faufaa ore au no to ˈu huru tia ore. Mai ia Petero, e tapiri au i te mau hoa tei ineine i te tauturu ia ˈu ia faaoromai tamau.

“E tauturu rahi atoa mai te hiˈoraa o te arii Davida. Pinepine o ˈna i te toaruaru no te mau hapa ta ˈna i rave. Te taa ra ia ˈu to ˈna mau huru aau no te mea i te tahi taime, e rave e e parau vau i te tahi mea ta ˈu e tatarahapa i muri iho. Ua tamahanahanahia vau e te mau parau a Davida i roto i te Salamo 51. I te irava 3, te parau ra Davida: ‘Ua ite maitai hoi au i ta ˈu mau hapa, e tei mua noa ta ˈu hara ia ˈu.’ Hoê â huru no ˈu. Ia toaruaru roa vau, e manaˈo ïa vau e mea faufaa ore au. E haamanaˈo atoa râ vau i ta Davida mau parau i roto i te irava 10: ‘A faatupu i te hoê aau viivii ore i roto ia ˈu, e te Atua e, e a tuu i te hoê feruriraa apî e te aueue ore i roto ia ˈu.’ Mai tera atoa vau ia pure au i te Atua. E ani au ia ˈna ia tauturu mai ia taui i ta ˈu hiˈoraa ia ˈu iho. E itoito-atoa-hia vau i te mau parau o te irava 17. Te na ôhia ra: ‘Eita oe e patoi i te hoê aau tatarahapa e te haehaa, e te Atua e.’ Te haapapu ra teie irava ia ˈu e mea here roa na te Atua ia ˈu.

“Ma te tiatonu i nia i te mau hiˈoraa Bibilia e te tauturu ta te Atua e horoa mai, e puai atu â to ˈu tiaturiraa no a muri aˈe. E ere ïa te mau parau fafau a te Bibilia i te moemoeâ no ˈu, maoti hoi te reira e mau papu noa ˈi au.”