Nafea te Atua poiete e faaite ai i ta ˈna parau fafau î i te here?

Mai te poieteraahia mai â te huitaata, ua paraparau noa te Atua poiete i te taata na roto i te arai o te mau melahi e te mau peropheta. Hau atu â, ua maiti o ˈna ia papaihia ta ˈna parau e te mau haamaitairaa ta ˈna i fafau. Mea faufaa teie mau parau fafau no ǒ mai i te Atua no to tatou a muri aˈe. Ihea oe e ite ai i te mau parau fafau a te Atua i teie mahana?

E itehia te poroi a te Atua no tatou, i roto i te Bibilia. (Timoteo 2, 3:16) Mea nafea to te Atua faaohiparaa i te mau peropheta no te papai i ta ˈna poroi? (Petero 2, 1:21) Ua tuu te Atua i to ˈna mau manaˈo i roto i te feruriraa o te feia papai ia nehenehe ratou e papai rima roa i te reira. Hoê â huru i teie mahana. Ia ani te hoê paoti ohipa i ta ˈna papai parau ia papai i te hoê rata na nia i to ˈna iˈoa, ua papu ïa ia tatou e o o ˈna te fatu o taua rata ra. Oia atoa, noa ˈtu ua faaohipa te Atua i te mau taata no te papai i ta ˈna Parau, o o ˈNa te Fatu o te mau Papai moˈa.

UA PARARE ROA TE PARAU A TE ATUA

No te faufaaraa o te Parau a te Atua, te hinaaro nei te Atua ia taio e ia taa i te mau nunaa atoa i te reira. I teie mahana, ua parare roa e te taiohia nei ta ˈna “parau apî oaoa e te mure ore . . . i te fenua, i te mau nunaa e opu e reo atoa.” (Apokalupo 14:6) Maoti te haamaitairaa a te Atua, ua parare te taatoaraa aore ra te tahi mau tuhaa o te Bibilia na roto hau atu 3 000 reo, ia faaauhia i te tahi atu buka na te ao nei.